ہارون رشید
بی بی سی اردو ڈاٹ کام، پشاور |  |
| | | حکام کو شک ہے کہ یہ واقعہ باہمی دشمنی کا شاخسانہ ہوسکتا ہے (فائل فوٹو) |
پاکستان کے قبائلی علاقے جنوبی وزیرستان میں حکام کا کہنا ہے کہ نامعلوم افراد کی فائرنگ سے سات افراد ہلاک ہوگئے ہیں۔ مرنے والوں میں ایک ہی خاندان کے چار افراد بھی شامل ہیں۔ یہ واقعہ وانا کے مغرب میں کڑیکوٹ کے مقام پر جمعرات کی صبح پیش آیا۔ عینی شاہدین کے مطابق سفید گاڑی میں سوار افراد نے ایک مقامی گروہ کے سربراہ موسی کڑیخیل کی گاڑی پر فائرنگ کر دی جس سے اس میں سوار تمام سات افراد ہلاک ہوگئے۔ ہلاک ہونے والوں میں موسی کے علاوہ ان کے والد عبداللہ جان، بھائی نور محمد، بیٹا، کزن عبدالرحمن اور ڈرائیور کے علاوہ ایک راہ گیر سید رحمان خوجل خیل شامل ہیں۔ حملہ آور فرار ہونے میں کامیاب ہوگئے۔ اس حملے کی وجہ معلوم نہیں ہوسکی لیکن حکام کو شک ہے کہ یہ واقعہ باہمی دشمنی کا شاخسانہ ہوسکتا ہے۔ گزشتہ ماہ شمالی وزیرستان میں مقامی شدت پسندوں نے مبینہ بھتہ خوروں کے خلاف کارروائی کرتے ہوئے پندرہ افراد کو ہلاک کر دیا تھا۔ ادھر جنوبی وزیرستان کے محسود علاقے کڑما میں نامعلوم افراد کی فائرنگ سے ایک شخص صالح محسود بھی ہلاک ہوگئے۔ جنوبی وزیرستان میں نامعلوم افراد کی جانب سے اس قسم کے حملے کافی عرصے سے جاری ہیں اور حکام انہیں روکنے میں قدرے بے بس نظر آتے ہیں۔ | 
’وزیرستان میں آپریشن بند کریں‘
