عزیزاللہ خان بی بی سی اردو ڈاٹ کام کوئٹہ

	بلوچستان میں فوج کی موجودگی بڑھ گئی ہے

پولیس حکام نے بتایا ہے کہ نوشکی میں زخمی ہونے والوں کا تعلق صوبہ پنجاب سے ہے۔ ڈپٹی سپرنٹنڈنٹ پولیس غفور کرد نے کہا ہے یہ واقعہ لگ بھگ رات ساڑھے آٹھ بجے اس وقت پیش آیا جب نا معلوم افراد نے دستی بم حمام کے پاس پھینک دیا۔

اسی طرح دوسرا دھماکہ ایک مٹھائی کی دکان کی پاس ہوا ہے۔ یہ مٹھائی کی دکان بھی پنجاب سے تعلق رکھنے والے ایک شخص کی بتائی گئی ہے۔

اس سے پہلے ضلع بولان کے علاقے مچھ میں اس طرح کے واقعات پیش آچکے ہیں جن میں پنجاب سے تعلق رکھنے والے افراد کو نشانہ بنایا گیا ہے۔

گزشتہ رات نامعلوم افراد نے مچھ میں پنجاب سے تعلق رکھنے والے حاجی بشیر نامی ایک شخص کے مکان کے قریب دستی بم پھینک دیا تھا لیکن کوئی جانی نقصان نہیں ہوا تھا۔

اس سے دو روز پہلے ضلع بولان میں ڈھاڈر اور مچھ کے درمیان نامعلوم افراد نے ایک مسافر کوچ سے تین افراد کو اتار کو گولی مار کر ہلاک کر دیا تھا۔ لیویز کے ایک اہلکار نے بتایا ہے کہ ملزمان نے شناخت کرکے تینوں افراد کو ہلاک کیا ہے۔

تینوں افراد کی شناخت نہیں ہو سکی۔ یہ بتایا گیا ہے کہ تینوں افراد مزدور تھے۔ دریں اثناء میرک بلوچ نامی شخص نے ٹیلیفون پر بتایا ہے کہ مچھ اور نوشکی دھماکے کی ذمہ داری وہ بلوچ لبریشن آرمی کی طرف سے قبول کرتے ہیں۔

جمعرات کو حب میں دھماکہ واپڈا کے گرڈ سٹیشن کے قریب ہوا ہے جس سے دیوار کو نقصان پہنچا ہے جبکہ سبی میں راکٹ زرعی ماڈل فارم میں گرا ہے۔ دونوں دھماکوں میں کوئی جانی نقصان نہیں ہوا ہے۔