مسعود عالم بی بی سی اردو، لیپہ

	زلزلے میں بچوں کی اکثریت معذور ہو گئی ہے

وادئ لیپہ ایک طرف سے تو اتنی قریب ہے کہ لائن آف کنٹرول بننے سے پہلے لوگ پیدل یہاں سے وادئ نیلم کے راستے مظفر آباد جا کر اسی روز واپس آ جایا کرتے تھے لیکن اب یہ نسبتاً مختصر راستہ ایل او سی نے روک رکھا ہے اور وادئ لیپہ جانے کے لیے مظفر آباد سرینگر روڈ پر نیلی سے دریائے جہلم عبور کر کے شاریاں، لمنیاں، اور ریشیاں سے ہوتے ہوئے ساڑھے دس ہزار فٹ بلند پہاڑ کی چوٹی سے گزر کر پھر اترائی کا سفر شروع ہوتا ہے کیونکہ لیپہ تقریباً چھ ہزار فٹ کی بلندی پر ہے۔

	زلزلے میں بچوں کی اکثریت متاثر ہوئی ہے

یہ راستہ تقریباً پانچ سے چھ گھنٹے کا ہے اور یہ انتہائی دشوار گزار کچا ٹریک ہے جس پر جگہ جگہ لینڈ سلائیڈنگ ہوتی رہتی ہے۔ ہم لمنیاں سے قریباً شام کے چار بجے گزرے تھے اور اس سے دو تین گھنٹے بعد لینڈ سلائیڈ ہوئی جس سے یہ راستہ اگلے دن تک کے لیے بند ہو گیا۔ اور یہ اچھے موسم میں ہوا۔ بارش میں تو کئی جگہ لینڈ سلائیڈنگ کا خطرہ رہتا ہے۔ پھر پہاڑ کی چوٹی سے کئی میل نیچے تک ابھی سے برف جمی ہے۔ جنوری سے مئی یا جون تک تو یہ راستہ مستقل بند رہتا ہے۔ اس لیے لیپہ میڈیا تو کیا باقی کشمیریوں کی نظروں سے بھی عموماً اوجھل رہتا ہے۔

	لوگ اپنی مدد آپ کے تحت گھروں کی تعمیر کر رہے ہیں

وادئ لیپہ میں اگر چھوٹی چھوٹی آبادیوں کو بھی شامل کر لیں تو ستائیس گاؤں ہیں۔ یہاں کا بڑا شہر یا قصبہ لیپا ہے جو وادی کے ہموار حصے پر واقع ہے۔ اس میں بیشتر گھروں کو نقصان تو پہنچا ہے لیکن وہ گرے نہیں۔ اس کی ایک وجہ تو یہ بتائی جاتی ہے کہ یہاں مکانوں کی تعمیر میں لکڑی کا استعمال بہت زیادہ ہوتا ہے۔ یہاں تک کہ بنیادیں بھی لکڑی کے شہتیروں پر رکھی جاتی ہیں شاید اسی وجہ سے یہاں جانی نقصان باقی کشمیر کی نسبت بہت ہی کم ہوا ہے۔ اس کے برعکس بوائز کالج کی پتھر سے بنی عمارت جو صرف دس سال پرانی تھی، منہدم ہو گئی ہے۔

پھر زلزلے سے پہلے یہاں مکئی اور چاول کی فصل تیار ہو چکی تھی جس سے فائدہ یہ ہوا کہ زیادہ تر لوگوں کے پاس سردیوں کے لیے خوراک کا ذخیرہ موجود ہے۔ ورلڈ فوڈ پروگرام نے بھی یہاں خوراک ذخیرہ کرنے کا کام شروع کیا تھا جو راستے بند ہونے کی وجہ سے رک گیا تھا لیکن اب ہیلی کاپٹر کے ذریعے خوراک کی فراہمی دوبارہ شروع کر دی گئی ہے۔ لیپہ پراپر کے لوگ یوں بھی نسبتاً خوشحال ہیں۔ یہاں کے سیب اور اخروٹ اپنی کوالٹی کے لیے مشہور ہیں اور ان کی کاشت کرنے والے کھاتے پیتے لوگوں میں شمار ہوتے ہیں۔ بیشتر کے پاس گائے بکریاں ہیں اور گھروں کے باہر شلجم جیسی سبزیاں بھی اگائی جاتی ہیں جنہیں سکھا کر سردیوں میں کھانے کے لیے استعمال کیا جاتا ہے۔

	بہت سے گھر ایسے ہیں جہاں کوئی بھی زندہ نہیں بچا

لیکن لیپہ پراپر سے آگے جائیں تو پہاڑوں کی ڈھلوان پر واقع بستیوں کو شدید نقصان پہنچا ہے، اور یہاں لوگ بنیادی امداد نہ پہنچنے کی شکایت بھی کرتے ہیں۔ لیپہ سے دو تین کلومیٹر دور، ایل او سی کے عین اوپر موجی اور چھتر گام جیسے دیہات ہیں جن میں کوئی گھر بھی سلامت نہیں بچا۔ یہاں رہنے والے محنت کش لوگ ہیں جن کے جوان شہروں میں جا کر مزدوری کرتے ہیں، بڑے بوڑھے کھیتی باڑی کرتے ہیں اور عورتیں گھروں اور جانوروں کو سنبھالتی ہیں۔ یہ لوگ اب تک خیموں میں رہ رہے ہیں جن میں سے بیشتر کپڑے کے بنے ہوئے ہیں اور وہ سردی روکنے کے لیے ناکافی ہیں۔

ان لوگوں سے بات کریں تو ان کے مسائل دوسرے متاثرہ کشمیریوں سے مختلف نہیں۔ امدادی کام اب بھی اسی بدنظمی سے چل رہا ہے جس کا الزام فوجی حکام پر شروع دنوں میں لگایا جاتا رہا ہے۔ مثال کے طور پر فوج کا کہنا ہے کہ جستی چادروں کی تقسیم بلند علاقوں سے شروع ہو کر نیچے آئے گی۔ لیکن یہ لوگ جو ایک طرف ایل او سی اور دوسری جانب سے ساڑھے دس ہزار فٹ بلند پہاڑ کے بیچ گھرے ہوئے ہیں، اب بھی جستی چادروں کی راہ دیکھ رہے ہیں۔

	لوگ مدد کے لیے حکومت کی جانب دیکھ رہے ہیں

اصل میں اتنی بڑی قدرتی آفت کے بعد بھی یہاں کے لوگوں کا بڑا مطالبہ وہی ہے جو زلزلے سے پہلے ہوا کرتا تھا، اور وہ یہ کہ انہیں کشمیر کے باقی حصوں سے رابطے کی سہولت فراہم کی جائے۔ میں نے لیپہ کے ایک رہائشی شوکت علی مغل سے پوچھا کہ ایسا کیا ہو سکتا ہے جس سے ان کی بیشتر مشکلات حل ہو جائیں، تو ان کا کہنا تھا کہ سردیوں میں لیپہ کے لوگوں کو مظفر آباد تک سفر کے لیے ہیلی کاپٹر سروس فراہم کی جائے، چاہے اس کے لیے انہیں کرایہ ہی ادا کرنا پڑے۔