زلزلہ کے وقت بچے سکولوں میں پہنچ چکے تھے۔

یونیسف نے کہا کہ بچ جانے والے بچوں میں بیس ہزار ایسے ہوں گے جو ساری زندگی کے لیے معذور ہو گئے۔ ان میں کئی کے اعضا کاٹ دیئے گئے ہیں۔

یونیسف کے مطابق جو بچے اس زلزلہ میں بچ گئے ان میں ایک بڑی تعداد زخمی ہیں اور کچھ اپنے والدین ، دوستوں اور رشتہ داروں کے مرنے کی وجہ شدید صدمے کا شکار ہیں۔

یونیسف نے خبردار کیا ہے کہ اگر بچ جانے والوں کے لیے علاج، صاف پانی اور حفاظتی ٹیکوں کا بر وقت بندوبست نہ کیا گیا تو مزید بچے مر سکتے ہیں۔
ہلاک ہو نے والے بچوں میں پندرہ ہزار سے زیادہ کا تعلق پاکستان اور اس کے زیر انتظام کشمیر سے تھا جبکہ تیرہ سو بچے بھارت کے زیر انتظام کشمیر میں ہلاک ہوئے ۔

اس زلزلہ میں پاکستان اور اس کے زیر انتظام کشمیر میں پچپن ہزار لوگ ہلاک اور اٹھہتر ہزار زخمی ہوئے ہیں۔

یونیسف کا کہنا ہے کہ پاکستان کی حکومت کے اندازوں کے مطابق زلزلے میں چھ ہزار سات سو سکول متاثر ہوئے۔ زلزلہ ایسے وقت آیا تھا جب بچے سکول میں پڑھائی کے لیے جمع ہو چکے تھے۔

یونیسف کے ایگزیکٹو ڈائریکٹر این ونیمن کے مطابق جو بچے بچ گئے ہیں وہ شدید صدمے میں ہیں۔ اس زلزلے میں ان کے دوست، استاد اور غزیز و اقارب ہلاک ہو گئے ہیں۔

یونیسف کے ایگزیکٹو ڈائریکٹر نے کہا ہے کہ اگر بچ جانے والے بچوں کی بروقت امداد نہ دی گئی، تو ان کی زندگیوں کو ایک مرتبہ پھر خطرہ لاحق ہو سکتا ہے۔

اقوام متحدہ نے زلزلہ زدگان کی مدد کے لیے دنیا سے پانچ سو پچاس ملین ڈالر کی اپیل کی ہے لیکن اسے ابھی تک 327 ملین ڈالر کی یقین دہانی کرائی گئی ہے۔