ریاض سہیل بی بی سی اردو ڈاٹ کام، کراچی

نوابشاہ کے نواحی علاقے دولت پور کے رہائشی ملک نذیر علی نے پانچ ماہ قبل اپنی پڑوسن عارفہ خانزادہ نامی ایک لڑکی کے ساتھ پسند کی شادی کی تھی۔ ڈر کے مارے دونوں ایک عرصے تک روپوشی کی زندگی گزارتے رہے۔گزشتہ روز وہ جب اپنےگھر پہنچے تو ان پر مبینہ تشدد کیاگیا۔

نذیر ملک اور عارفہ کا کہنا ہے کہ انہوں نے کورٹ میرج کی ہے۔ اب برادری کے لوگ ان کی جان کے دشمن ہوگئے ہیں۔انہوں نے بتایا کہ ان کی اپنے ہی شہر میں داخلے پر پابندی تھی۔ پانچ ماہ بعد ہم عید کرنے کے لیے آئے تو حملہ کیا گیا ہے۔

ملک نذیر کا کہنا تھا ہے اس کی قمیض اتار کر دولت پور شہر میں گشت کرایا گیا اور دھمکی دی گئی ہے کہ دو دن میں شہر چھوڑ دیں ورنہ سخت نتائج بھگتنا پڑیں گے۔ عارفہ نے بتایا کہ برادری کے لوگ اس کو مارنے آئے تھے مگر وہ گھر سے باہر نہیں نکلی۔

تحصیل پولیس افسر محراب پور نے نوجوان کو برہنہ حالت میں گشت کرانے سے لاعلمی کا اظہار کیا ہے۔ تاہم اس کا کہنا ہے کہ ملک نذیر پر تشدد کے الزام میں دس افراد پر مقدمہ درج کرلیاگیا ہے اور مزید تحقیقات جاری ہیں۔ نذیر ملک اور عارفہ کا کہنا ہے کہ ان کی زندگی کو خطرہ لاحق ہے۔ انہیں تحفظ فراہم کیا جائے۔

حقوق نسواں کی تنظیموں نے اس واقعہ کی مذمت کی ہے۔ عورت فاؤنڈیشن کے کوآرڈینیٹر لالہ حسن پٹھان کا کہنا ہے کہ ذاتی زندگی میں فیصلے کا حق نہ دینے پر سندھ میں گزشتہ نو ماہ میں پچاس کے قریب جوڑوں نے گھر چھوڑ کر کورٹ میرج کی ہے، جب کہ دو سو اکہتر خواتین کو کارو کاری کے الزامات میں قتل کیا گیا ہے جو ایک تشویشناک بات ہے۔