مبشر زیدی بی بی سی اردو ڈاٹ کام ، اسلام آباد

ایم ایم اے کی حکومت حسبہ بل کا نفاذ چاہتی ہے

بی بی سی اردو سروس سے ایک انٹرویو میں وفاقی وزیر مملکت برائے اطلاعات نے کہا کہ حسبہ قانون سے سرحد کا حکمران اتحاد لوگوں کو دہشت زدہ کر کے اپنے تابع اور زیر رسوخ لانا چاہ رہے ہیں۔انہوں نے کہا کہ اس قانون کے تحت صوبائی محتسب کو لا محدود اختیارات تفویض کئے گئے ہیں جس سے متوازی نظام عدل قائم ہو جائے گا۔انہوں نے کہا کہ محتسب کی تعیناتی میں وزیر اعلیٰ کے احکامات کو لازمی قرار دینا اس بات کا ثبوت ہے کہ یہ سیاسی عہدہ ہو گا۔

انہوں نے کہا کہ محتسب کے اختیارات کو کسی بھی عدالت میں چیلنج نہ کیے جانے کی جو شق اس مجوزہ قانون میں رکھی گئی ہے وہ خلاف آئین ہے اور عدالتی نظام سے متصادم ہے۔

انہوں نے مذید کہا کہ اس قانون میں خواتین کو تحفظ دینے کی بات کی گئی ہے مگر اس قانون میں کسی بھی سطح پر خواتین سے مشاورت نہیں کی گئی۔

وفاقی وزیر نے کہا کہ اس قانون کو بناتے وقت بہت سی بنیادی چیزوں کو نظر انداز کیا گیا ہے۔ انہوں نے کہا کہ اس مجوزہ قانون کے تحت جو حسبہ فورس بنائی جائے گی اس کے بارے میں واضح نہیں ہے کہ وہ کس کے ماتحت ہو گی۔

وفاقی وزیر نے کہا کہ وفاقی حکومت اس سلسلے میں کچھ کرنے سے پہلے اس معاملے کو صوبائی سطح پر سلجھانے کی کوشش کرے گی۔ ان کا کہنا تھا کہ اسلامی نظریاتی کونسل نے اس بل پر جو اعتراضات کئے تھے ان کو سرحد حکومت نے دور نہیں کیا ہے۔

انیسہ زیب طاہر خیلی نے کہا کہ اس بل کو عوامی بحث کے لیے بھی پیش نہیں کیا گیا جس سے یہ ثابت ہوتا ہے کہ سرحد حکومت اس بل کو بلڈوز کرنا چاہتی ہے۔انہوں نے کہا کہ آئین کے آرٹیکل 143میں یہ صاف طور پر لکھا ہوا ہے کہ وفاقی قوانین کو صوبائی قوانین پر سبقت حاصل ہے۔

وفاقی وزیر کا یہ بھی دعوی ہے کہ اس بل سے ایک نیا ’پنڈورہ بکس‘ کھلے گا اور اس سے فرقہ واریت فروغ پائے گی۔

وفاقی حکومت کے علاوہ ملک کی تمام بڑی سیاسی جماعتوں نے جن میں حکمران مسلم لیگ، پاکستان پیپلز پارٹی، مسلم لیگ نواز اور عوامی نیشنل پارٹی شامل ہیں، اس بل کی مخالفت کی ہے اور خدشہ ظاہر کیا ہے کہ اس قانون سے صوبہ سرحد میں طالبان طرز حکومت قائم ہو جائے گی۔