مبشر زیدی بی بی سی اردو ڈاٹ کام ، اسلام آباد

شیخ رشید کہتے ہیں کہ انہوں نے کشمیریوں کو صرف پناہ دی تھی

دفتر خارجہ نے اس درخواست کی نا منظوری کے حوالے سے کسی بھی طرح کا رد عمل دینے سے انکار کیا۔اس سے لگتا ہے کہ پاکستان کی حکومت اس معاملے سے اپنے آپ کو علیحدہ رکھنا چاہتی ہے کیونکہ شیخ رشید ایک وزیر کی حیثیت سے نہیں بلکہ ایک کشمیری کی حیثیت سے سرینگر جانا چاہتے تھے۔

شیخ رشید سے رابطہ ممکن نہیں ہو سکا ہے۔

بھارتی فیصلے سے کچھ گھنٹے قبل انہوں نے بی بی سی سے بات کرتے ہوئے کہا تھا کہ وہ نہیں چاہتے کہ ان کے دورے سے پاکستان اور بھارت کے درمیان امن مذاکرات کا عمل کھٹائی میں پڑ جائے۔

شیخ رشید نے کل پاکستان کے صدر جنرل پرویز مشرف سے بھی ملاقات کی ہے جس میں صدر نے بھی یہی کہا ہے کہ پاکستان اور بھارت کے درمیان جاری امن مذاکرات کو کوئی نقصان نہیں پہنچنا چاہئے۔ ان کی صدر سے ملاقات کے بعد سرکاری ذرائع نے بی بی سی کو بتایا تھا کہ پاکستان کی حکومت شیخ رشید کے دورے کو پاک-بھارت عمل کے تناظر میں نہیں دیکھ رہی ہے۔

سرکاری ذرائع کے مطابق بھارت کی حکومت نے سفارتی ذرائع سے پاکستان کی حکومت کو یہ پیغام دیا تھا کہ شیخ رشید کے بھارت کے زیر انتظام دورے سے کانگریس حکومت کے لیے مشکلات کھڑی ہو سکتی ہیں کیونکہ حزب مخالف جماعت بی جے پی نے شیخ رشید کے دورے پر مظاہرے کرنے کا اعلان کیا تھا۔

شیخ رشید کے دورہ سرینگر پر اس وقت ایک تنازعہ کھڑا ہوگیا تھا جب اس ماہ کے دوسرے ہفتے میں پاکستان کے ایک قومی انگریزی روزنامے میں پاکستان کے دورے پر آئے ہوئے جموں کشمیر لبریشن فرنٹ کے سربراہ یاسین ملک سے منسوب ایک بیان شائع ہوا جس میں کہا گیا تھا کہ بھارت کے زیرانتظام کشمیر میں عسکریت کے ابتدائی عرصے میں شیخ رشید کشمیری عسکریت پسندوں کے لیے ایک ٹریننگ کیمپ چلا رہے تھے۔

دونوں ممالک کو امید ہے کہ مذاکرات ناکام نہیں ہوں گے

مسڑ ملک کا کہنا تھا نے انھوں نے یہ کبھی نہیں کہا کہا کہ شیخ رشید عسکریت پسندوں کو تربیت دینے میں ملوث رہے ہیں البتہ ان کا کہنا تھا کہ انھوں نے ہمیں خوراک اور پناہ فراہم کی۔

لیکن اس کے فوراً بعد پاکستان کے فوج کے سابق سربراہ مرزا اسلم بیگ نے یہ بیان دے دیا کہ شیخ رشید احمد اسلام آباد سے کچھ دور فتح جنگ روڈ پر واقع اپنے فارم ہاؤس پر کشمیری عسکریت پسندوں کے لیے ایک ٹریننگ کیمپ چلاتے تھے جو انیس سو نوے میں اس وقت کے وزیراعظم نوازشریف کہ کہنے پر بند کروایا گیا ۔

شیخ رشید ان الزامات کی شروع سے تردید کرتے آرہے ہیں اور کہتے ہیں کہ انھوں نے بھارت کے زیر انتظام کشمیری عسکریت پسندوں کو صرف پناہ دی اور کھانا کھلایا۔