مبشر زیدی بی بی سی اردو ڈاٹ کام،اسلام آباد

سارا زین کا کہنا ہے کہ وہ پاکستان میں ہر دروازے کو کھٹکھٹاچکی ہیں لیکن کہیں سے کوئی جواب نہیں ملا

ہیومن رائٹس واچ کے مطابق پچیس سالہ کاشان افضل اور تئیس سالہ زین افضل، دونوں بھائیوں پر اسلامی شدت پسندوں کے ساتھ تعلق کے الزامات ہیں۔

ہیومن رائٹس واچ نے امریکی حکومت سے بھی مطالبہ کیا ہے کہ وہ اس سلسلے میں اپنی پوزیشن واضح کرے کیونکہ ان نوجوانوں کے اہل خانہ کا کہنا ہے کہ ان کو امریکی حکم پر حراست میں لیا گیا ہے۔

تاہم زین افضل کی اہلیہ سارا افضل نے بی بی سی سے بات کرتے ہوئے کہا کہ ان کے شوہر اور جیٹھ کو ایجنسیوں نے اغوا کیا ہے۔ انہوں نے کہا کہ ان کے شوہر زین اکتوبر دو ہزار ایک میں حزب المجاہدین تنظیم کے کارکنوں کے ہمراہ افغانستان جہاد کے لیے گئے تھے مگر وہ دس دن میں ہی واپس آ گئے تھے۔

انہوں نے کہا کہ گزشتہ برس ان کے شوہر کو مئی کے مہینے میں بھی اغوا کیا گیا تھا اور ان کو پوچھ گچھ کے بعد رہا کر دیا گیا تھا۔سارا کے مطابق گزشتہ برس تیرہ اگست کو زین اور کاشان کو دوبارہ اغوا کیا گیا اور اس مرتبہ اغوا کار ان کے امریکی پاسپورٹ اور شناختی دستاویزات سمیت کئی چیزیں اپنے ساتھ لے گئے جس کے بعد سے وہ اب تک لاپتہ ہیں۔

انھوں نے کہا کہ کراچی کے علاقے ناظم آباد کے تھانے رضویہ میں جب وہ اس کیس کی رپورٹ لکھوانے گئیں تو پولیس نے ایف آئی آر درج کرنے سے یہ کہ کر انکار کر دیا کہ یہ کام خفیہ اداروں کا ہے جس میں پولیس کوئی مداخلت نہیں کر سکتی۔

مغویوں کا بڑا بھائی جو کچھ عرصے سے لاپتہ ہے

سارا نے کہا کہ انھوں نے پاکستانی صدر جنرل پرویز مشرف اور امریکی صدر جارج بش کو زین اور کاشان کی رہائی کے لیے متعدد خطوط بھی لکھے ہیں مگر ان میں سے کسی ایک کا جواب بھی انھیں موصول نہیں ہوا ہے۔

سارا نے کہا کہ انہوں نے اپنے شوہر اور جیٹھ کی رہائی کے لیے ہر دروازہ کھٹکھٹایا ہے مگر کہیں سے بھی ان کو انصاف نہیں ملا۔