حسین عسکری بی بی سی اردو ڈاٹ کام، کراچی

عدالت کے باہر پولیس کی بھاری نفری موجود تھی

دونوں ڈاکٹروں کے خلاف القاعدہ تنظیم کے لوگوں کا طبی علاج کرنے، ان سے رابطے رکھنے اور اس تعلق کو چھپانے کے حوالے سے ایک نیا مقدمہ درج کیا گیا ہے جس کی ایف آئی آر گلشن اقبال تھانے میں درج کی گئی ہے۔

ان پر الزام ہے کہ انہوں نے القاعدہ سے تعلق رکھنے والے لوگوں کا علاج کیا جن کے بارے میں وہ جانتے تھے کہ وہ قانون نافذ کرنے والے اداروں کو مطلوب ہیں۔
عدالت نے دونوں ڈاکٹروں اور جنداللہ نامی تنظیم سے مبینہ تعلق رکھنے والے نو ملزمان کے خلاف جمعہ چالان پیش کرنے اور اس موقع پر تمام ملزمان کو بھی عدالت میں پیش کرنے کا حکم دیا۔

جمعرات کو عدالت میں پیشی کے موقع پر ڈاکٹر اکمل اور ڈاکٹر ارشد کو ان کی گرفتاری کے بعد پہلی دفعہ ان کے اہل خانہ اور وکیل سے ملنے کی اجازت دی گئی۔

اس موقع پر سخت حفاظتی اقدامات کئے گئے تھےاور عدالت کے آس پاس پولیس اہلکاروں کو بڑی تعداد میں تعینات کیا گیا تھا۔

ڈاکٹر اکمل اور ڈاکٹر ارشد سترہ جون کی شب کو لاپتہ ہو گئے تھے۔ تاہم دو جولائی کو پولیس نے ان کی گرفتاری کی تصدیق کی تھی اور تین جولائی کو انہیں انسداد دہشت گردی کی عدالت میں پیش کیا گیا تھا۔