اعجاز مہر بی بی سی اردو ڈاٹ کام، اسلام آباد

وزیر اعظم نے متاثرہ علاقوں کا فضائی دورہ کیا

انہوں نے پیر کی صبح مری، گلیات اور دیگر علاقوں کا فضائی دورہ کیا اور مانسہرہ میں متاثرہ لوگوں سے ملاقات بھی کی۔

دورے کے بعد صحافیوں سے بات کرتے ہوئے وزیراعظم نے بتایا کہ انہوں نے حکام کو ہدایت کی ہے کہ جب تک متاثرہ علاقوں کا رابطہ بحال نہ ہو اس وقت تک ان کی مدد جاری رکھی جائے۔

انہوں نے ایک سوال پر کہا کہ ابتدائی اطلاعات کے مطابق صوبہ سرحد، شمالی علاقہ جات، پاکستان کے زیرانتظام کشمیر اور پہاڑی علاقوں میں ہلاک ہونے والے لوگوں کی تعداد ڈیڑھ سے دو سو ہوسکتی ہے۔ ان کے مطابق بلوچستان میں ہلاک ہونے والوں کی تعداد اس میں شامل نہیں ہے۔

بلوچستان اور دیگر علاقوں میں بارشوں سے ہلاکتوں کے بارے میں اخبارات میں شائع ہونے والی تعداد پر صدر جنرل پرویز مشرف نے اعتراض کیا تھا اور کہا تھا کہ اخبارات جتنی تعداد بتا رہے ہیں جانی نقصان اتنا نہیں ہوا۔

سرکاری طور پر ہلاک شدگان کی تعداد پہلی بار وزیراعظم نے بتائی ہے جو اخبارات میں شائع ہونے والی تعداد سے تقریباً ملتی جلتی ہے۔

وزیراعظم نے بتایا کہ انہوں نے سڑکوں سے برف ہٹانے اور رابطے بحال کرنے کے لیے فوری طور پر بلڈوزر بھیجنے کے احکامات بھی جاری کیے ہیں۔

وزیراعظم کے اس دورے کی وجہ سے برطانوی وزیرخارجہ جیک سٹرا سے ان کی ملاقات طے شدہ وقت پر نہیں ہوپائی۔