عزیزاللہ خان
بی بی سی اردو ڈاٹ کام، کوئٹہ |  |
|  خانوزئی کے ایک دیہات میں ایک کچا مکان گرنے سے ایک ہی خاندان کے آٹھ افراد ہلاک ہوئے۔ |
صوبہ بلوچستان میں بارشوں سے کچے مکانات گرے ہیں جس کی وجہ سے ایک ہی خاندان کے آٹھ افراد سمیت کم سے کم دس افراد ہلاک ہوئے ہیں۔ کوئٹہ سے کوئی اسی کلومیٹر دور شمال میں خانوزئی کے ایک دیہات میں ایک کچا مکان گرنے سے کمال خان ان کی بیوی تین بیٹے اور تین بیٹیاں ہلاک ہوگئے ہیں جبکہ ایک بیٹا زخمی ہوا ہے۔ خانوزئی سے لیویز کے اہلکار نے بتایا ہے کہ یہ واقعہ رات کے وقت پیش آیا ہے لیکن راستے بند ہونے اور مواصلاتی نظام میں خرابی کی وجہ سے آج شام انھیں اس کی اطلاع موصول ہوئی ہے۔ لیویز اہلکار اختیار خان نے کہا ہے کہ جاں بحق ہونے والے افراد کے رشتہ داروں کو زیارت میں اطلاع دے دی گئی ہے جس کے بعد ان کی تدفین ہوگی اس وقت لاشیں اسی علاقے میں پڑی ہیں۔ اس کے علاوہ شیلا باغ کے علاقے میں ایک مکان کی چھت گرنے سے ایک ایف سی کی اہلکار ہلاک اور تین افراد زخمی ہوئے ہیں۔ اہلکار کا تعلق صوبہ سرحد کے شہر سوات سے بتایا گیا ہے۔ اس کے علاوہ لسبیلہ میں ایک شخص پانی کے ریلے میں ڈوب کر ہلاک ہوا ہے۔ دریں اثنا بارشوں سے مکانوں کے گرنے اور ہلاکتوں کی خبریں موصول ہوئی ہیں لیکن ان کی تصدیق نہیں ہو سکی۔ بلوچستان میں آٹھ سالہ حشک سالی کے بعد معمول سے بڑھ کر بارشیں ہوئی ہیں جس سے کئی علاقوں میں مواصلاتی نظام خراب ہو گیا ہے اکثر علاقوں میں راستے بند ہو گئے ہیں۔ اس سال بلوچستان کے بیشتر شمالی اور کچھ جنوبی علاقوں میں برف باری بھی ہوئی ہے۔ | 
یہ صفحہ دوست کو ای میل کیجیئے
پرِنٹ کریں
