عزیزاللہ خان بی بی سی اردو ڈاٹ کام، کوئٹہ

بارشیں اور طغیانی میں کم سے کم پانچ افراد ہلاک

پیر کے روز صوبہ سرحد اور بلوچستان کی سرحد پر واقع شہر ژوب میں شدید بارش ہوئی ہے۔ ندی نالوں اور دریائے ژوب میں طغیانی آنے سے پانچ افراد ہلاک اور دو زخمی ہوئے ہیں۔ شہر میں کاروباری زندگی معطل ہو کر رہ گیا ہے جبکہ مواصلاتی نظام کو شدید نقصان پہنچا ہے۔

ژوب سے ملنے والی اطلاعات کے مطابق شین غر کے علاقے میں ایک پِک اپ گاڑی کو طغیانی بہا کر لے گئی جس میں سوار دو خواتین اور ایک بچہ ہلاک ہو گیا ہے جبکہ دو خواتین کو بچا لیا گیا۔

اسی طرح ایک شخص اپنی گائے کو بچانے کے لیے پانی میں کود گیا لیکن گائے کو بچاتے بچاتے خود طغیانی کی نظر ہو گیا۔ اس کے علاوہ ایک نوجوان کی ہلاکت کی اطلاع ہے جبکہ ایک شخص کو طغیانی بہا لے جا رہی تھی جسے علاقے کے لوگوں نے بچا لیا ہے۔

ژوب ایک طرف کوہ سلیمان دوسری طرف افغانستان تیسری جانب سے خانو زئی اور کان مہترزئی کے پہاڑوں میں گھرا ہوا شہر ہے۔ اس کے قریب سے بے شمار ندیاں اور نالے گزرتے ہیں۔ گزشتہ سات سال سے خشک سالی کی وجہ سے لوگ ان ندی نالیوں کے قریب رہتے ہیں اور ان آبی گزرگاہوں سے گاڑیاں بھی گزرتی ہیں۔

بارشوں سے سڑکوں کو شدید نقصان پہنچا ہے اور ژوب اور ڈیرہ اسما عیل خان کا درمیانی راستہ کٹ چکا ہے۔

ژوب سے ڈیرہ اسماعیل خان جانے والی شاہراہ پر مغل کوٹ تک بلوچستان حکومت نے سڑک تو مکمل کر لی تھی لیکن پل بنانے کے احکامات نہیں جاری ہوئے تھے اور اب سڑک بھی تباہ ہوچکی ہے ۔ مغل کوٹ سے ڈیرہ اسماعیل خان تک سڑک کئی سالوں سے بن رہی ہے لیکن مکمل ہونے کا نام ہی نہیں لیتی۔

بلوچستان میں گزشتہ سات سال سے شدید خشک سالی پائی جاتی ہے لیکن بعض علاقوں میں شدید بارشیں ہوئی ہیں۔