عزیزاللہ خان بی بی سی اردو ڈاٹ کام، کوئٹہ

کوئٹہ میں اس سال جنوری میں اچھی خاصی برف باری ہوئی تھی

بلوچستان میں شدید خشک سالی سے باغبانی زراعت اور مال مویشیوں کو سخت نقصان پہنچا ہے جبکہ بعض علاقوں میں زیر زمین پانی کی سطح خطرناک حد تک نیچے گر گئی ہے۔

جمعرات سہ پہر جب بادلوں نے برسنا شروع کیا تو لوگوں نے خوشیاں منائیں اور شکر ادا کیے۔محکمہ موسمیات کے اہلکاروں نے کہا ہے کہ یہ کوئی زیادہ بارش نہیں تھی یہ نظام آگے چل کر بہت برسے گا۔

محکمہ موسمیات کے مطابق موسم کا یہ نظام مغرب سے بحیرہ روم سے پیدا ہو کر ایران کے راستے بلوچستان میں داخل ہوا ہے۔اگلے سال جنوری فروری میں نسبتا اچھی بارش کی پیشن گوئی بھی کی گئی ہے۔

کوئٹہ میں اس سال جنوری میں برف باری ہوئی تھی جس کے بعد اس شہر میں ایک بوند بارش نہیں برسی۔ اس دوران بارشوں کے لیے دعائیں کی جاتی رہیں۔ ماہ رمضان کے آخر میں کوئٹہ شہر کے باہرمسلسل دو روز تک نماز استسقاء ادا کی جاتی رہی۔ عید کے بعد بھی شہر سے باہر بارش کے لیے نماز استسقاء ادا کی گئی تھی۔

شہر میں نکاسی آب کا بہتر نظام نہ ہونے کی وجہ سے نالیوں اور گلیوں میں پانی بھر گیا۔ اکثر مقامات پر پانی گھروں میں داخل ہوتا رہا۔ کوئٹہ کی صورتحال یہ ہے کہ دو روز قبل نہ بادل تھے اور نہ بارش لیکن زیر زمین بچھائی گئی ٹیلیفون کی تاروں میں گٹر کا پانی بھر گیا تھا جس سے شہر کے کچھ علاقوں میں ٹیلیفون کا نظام بارش سے پہلے سے خراب ہو چکا تھا۔

طبی ماہرین کا کہنا ہے کہ اس بارش سے بیماریوں میں کمی واقع ہو گی۔ خشک اور سرد موسم کی وجہ سے شہر میں کئی بیماریاں پھیلی ہوئی ہیں۔