شوکت عزیز نے گزشتہ روز اٹک سے کاغذات نامزدگی جمع کرائے

یہ نشست ان کے لیے ارباب غلام رحیم کے بھانجے ارباب ذکا اللہ نے خالی کی ہے اور اس پر اٹھارہ اگست کو انتخابات ہوں گے۔

مٹھی سے بی بی سی کے نامہ نگار علی حسن نے بتایا کہ وہاں سخت حفاظتی انتظامات کیے گئے ہیں۔

وزیراعظم چودھری شجاعت حسین اور شوکت عزیز منگل کی شام کراچی پہنچے تھے۔

کراچی میں بی بی سی اردو ڈاٹ کام کے نامہ نگار حسین عسکری نے اطلاع دی تھی کہ چودھری شجاعت اور شوکت عزیز کی آمد پر شہر کی کئی اہم شاہراہوں کو حفاظتی اقدامات کے طور پر عام ٹریفک کے لیے بند کر دیا گیا تھا جس کی وجہ سے شہر میں جگہ جگہ ٹریفک جام ہو گیا۔

شہر میں یہ صورتحال کئی گھنٹے جاری رہی۔ ٹریفک میں پھنسے ہوئے لوگ حکومت اور انتظامیہ کو برا بھلا کہہ رہے تھے ۔ عام لوگوں کا کہنا تھا کہ صدر اور وزیر اعظم کی آمد کے موقح پر ہمیشہ یہی صورتحال ہوتی ہے۔

صدر پرویز مشرف اور سابق وزیر اعطم ظفر اللہ جمالی سمیت کئی سربراہان مملکت اکثر کہتے رہے ہیں کہ ان کی شہر میں آمد کے موقح پر حفاظتی اقدامات کے نام پر عام لوگوں کو پریشان نہ کیا جائے۔ تاہم جب بھی وہ شہر میں آتے ہیں شہر کی کئی اہم شاہراہوں کو بند کر دیا جاتا ہے جس سے عام لوگوں کو سخت مشکلات کا سامنا کرنا پڑتا ہے۔