بینو جوشی بی بی سی ، جموں

	کشمیر میں انڈین فوج کو یہ خصوصی اختیارات جولائی 1990 میں دیے گئے تھے

یہ بات ریاست کے وزیر اعلیٰ عمر عبداللہ نے اسمبلی میں حزب اختلاف کی جماعت پیپلز ڈیموکریٹر پارٹی کی جانب سے انسانی حقوق کے بارے میں شروع کی گئی بحث کے دوران کہی ہے۔

عمر عبد اللہ نے اسمبلی کے اراکین کو بتایا’ہم نے آرمڈ سپیشل پاورز ایکٹ اور ڈسٹربڈ ایریاں ایکٹ سے متعلق کام شروع کر دیا ہے‘۔

ایوان میں وادی کے بیشتر اراکین فوج کو دیے گئے خصوصی اختیارات کو ختم کرنے کا مطالبہ کر رہے تھے، ان کا یہ بھی کہنا تھا کہ فوج کو اس کے کیمپوں ميں واپس بھیج دیا جائے۔

عمر عبد اللہ نے مزید کہا ’پہلا قدم اٹھاتے ہوئے سرینگر میں سی آر پی ایف کی جگہ ریاستی پولیس کو تعینات کیا گیا ہے‘۔

اس سے قبل حزب اختلاف کی جماعت پی ڈی پی کی رہنما محبوبہ مفتی نے حکومت پر سخت الفاظ میں نکتہ چینی کرتے ہوئے کہا تھا’ کشمیر میں لوگوں کو گھروں سے زبردستی نکالا جاتا ہے اور ختم کر دیا جاتا ہے، اس عمل سے کشمیر میں دہشت کا ماحول بنایا جا رہا ہے، اسے فوری طور پر روکا جائے‘۔

محبوبہ نے مزید کہا کہ حکومت کو فورا فوج کو دیے گئے خصوصی اختیارات واپس لینا چاہيں ’اس سے کم میں کشمیری عوام کو سکون نہيں مل سکے گا‘۔

فوج کو حاصل خصوصی اختیارات انہیں متنازع علاقوں میں آپریشن کرنے کی اجازت دیتے ہیں۔ کشمیر میں فوج کو یہ خصوصی اختیارات جولائی 1990 میں دیے گئے تھے۔