ریاض مسرور بی بی سی اُردو ڈاٹ کام، سرینگر

	پولیس کا کہنا ہے کہ احسن ڈار کی گرفتاری جموں کشمیر پولیس کے لئے اب تک کی سب سے بڑی کامیابی ہے۔

پولیس کا کہنا ہے کہ مسلح گروپ حزب المجاہدین کے بانی ماسٹر احسن ڈار کو مصدقہ اطلاع ملنے پر بانڈی پورہ سے بارہمولہ آتے ہوئے گرفتار کرلیا گیا۔

پولیس نے دعویٰ کیا ہے کہ کئی سال تک پاکستان میں رہائش کے بعد احسن ڈار کشمیر میں سرگرم زیرزمین مسلح گروپوں کو مزید فعال بنانے کے لئے دوبارہ کشمیر آئے تھے۔

شمالی زون کے ڈی آئی جی عبدالغنی میر نے بدھ کے روز بارہمولہ میں ایک پریس کانفرنس کے دوران بتایا : ’ احسن ڈار کی گرفتاری جموں کشمیر پولیس کے لئے اب تک کی سب سے بڑی کامیابی ہے۔‘

احسن ڈار دراصل مقامی جماعت اسلامی کے سینئر رکن ہیں جو مسلح شورش میں شمولیت سے پہلے جماعت کے زیرنگرانی چلنے والے ایک سکول میں استاد کی حیثیت سے کام کرتے تھے۔

مسٹر میر نے بتایا کہ ڈار کے پاکستانی خفیہ ایجینسی آئی ایس آئی کے ساتھ قریبی مراسم ہیں اور انہوں نے ہی اُنیس سو نواسی میں پاکستان نواز مسلح تنظیم حزب المجاہدین کی بنیاد ڈالی۔ ماسٹر احسن ڈار حزب کے پہلے چیف کمانڈر تھے۔

پولیس کے مطابق ڈار نے پہلی بار اُنیس سو چوراسی میں کنٹرول لائن عبور کی اور پاکستان میں خفیہ اداروں کے ساتھ رابطہ قائم کیا، بعد ازاں وہ واپس آئے اور اُنیس سو اٹھاسی میں دوبارہ پاکستان گئے جہاں انہوں نے ہتھیاروں کی تربیت حاصل کی اور واپس وادی آئے۔ یہاں انہیں گرفتار کرلیا گیا لیکن وہ ہسپتال سے علاج و معالجہ کے دوران پولیس کو چکمہ دے کر بھاگ گئے اور واپس پاکستان پہنچے۔

پولیس کا کہنا ہے پاکستان پہنچتے ہی اس نے حزب المجاہدین نامی پاکستان نواز مسلح تنظیم کی بنیاد ڈالی لیکن بعض ساتھیوں کے ساتھ اختلاف کی وجہ سے وہ تنظیم سے الگ ہوگئے اور مسلم مجاہدین نام کی الگ تنظیم بنائی۔

پولیس نے ڈار کو مسلم مجاہدین کے چیف کی حیثیت سے اُنیس سو ترانوے میں گرفتار کرلیا۔ اُنیس سو ننانوے میں وہ رہا ہوگئے، لیکن انہوں نے دوبارہ مسلح شورش میں شمولیت اختیار کرلی اور اپنے بیوی بچوں سمیت پاکستان چلئےگئے۔

مسٹر میر نے مزید بتایا کہ احسن ڈار کی تحویل سے ’قابل اعتراض‘ مواد بھی برآمد ہوا ہے جس کی جانچ کی جارہی ہے۔