بینو جوشی بی بی سی، جموں

	فوج کے مطابق آپریشن ابھی بھی جاری ہے

جمعہ کے روز اس آپریشن میں ایک پولیس اہلکار کی ہلاکت کے ساتھ ہلاک ہونے والوں کی تعداد سات ہوگئی ہے جس میں چار شدت پسند بھی شامل ہیں۔

جھڑپ کے دوران بھاری گولہ باری جاری ہے اورگریینڈ داغے گئے ہیں۔ سیکورٹی اہلکاروں نے علاقے کو گھیر لیا ہے۔

پولیس کے ذرائع کا کہنا ہے کہ گزشتہ رات سیکورٹی فورسز اور شدت پسندوں کے درمیان بھاری گولہ باری کا تبادلہ ہوا ہے۔ اس واقعہ میں فوج کو شدت پسندوں کے خلاف لڑنے میں مدد دینے والے ایک اسپیشل پولیس افسر نریش کمار ہلاک ہوگئے ہیں۔

ادھمپور میں واقع فوج کی شمالی کمانڈ کے ہیڈکواٹر کے ترجمان کرنل ڈی کچاری کے مطابق جمعرات کو فوج کو خبر ملی تھی کہ پونچھ کے جنگلات میں کچھ شدت پسند چھپے ہوئے ہیں ، اس کے بعد فوج نے علاقے کو گھیر لیا۔

کرنل ڈی کے کچاری نے بتایا ہے کہ سیکورٹی فورسز نے چار شدت پسندوں کو مار گرایا ہے لیکن ان کی لاشیں ابھی تک نہیں ملی ہیں۔ انکا کہنا ہے کہ جائے وقوع پر موجود سکیورٹی اہلکاروں نے شدت پسندوں کی لاشوں کو دیکھا ہے۔

فوج کا کہنا ہے کہ علاقے میں پاکستانی شدت پسند تنظیم جش محمد اور لشکرِ طیبہ کے اعلی کمانڈوز چھپے ہوئے ہیں۔

فوج اور پولیس کے اعلی اہلکاروں نے حالات کا جائزہ لینے کے لیے علاقے میں کیمپس لگائے ہوئے ہیں۔

دریں اثناء پولیس ذرائع کا کہنا ہے کہ پولیس کے ایک ریٹائرڈ سب انسپکٹر مظفر شاہ کو گرفتار کیا گیا ہے۔

پولیس کے مطابق مظفر شاہ نے مبینہ طور پر شدت پسندوں کو مدد کی اور پناہ دی تھی۔ مظفر شاہ کو مزید تفتیش کے لیے جموں کے جوائنٹ انٹیروگیشن سینٹر بھیج دیا گیا ہے۔