ریحانہ بستی والا بی بی سی اردو ڈاٹ کام، ممبئی

	وزیر داخلہ نے یہ بھی کہا ہے کہ شدت پسندوں سے نمٹنے کے لیے سخت سے سخت کاروائی کی جائے گی

ممبئی میں جن مقامات پر حملے ہوئے وہاں کا معائنہ کرنے کے بعد پی چدمبرم نے ریاستی پولیس ہیڈکوارٹر میں ہنگامی طور پر طلب کی گئی پریس کانفرنس کے دوران کہا کہ وہ اعتراف کرتے ہیں کہ یہ حملے سکیوریٹی ایجنسی کی ناکامی کی وجہ سے ہوئے ہیں۔

انہوں نے کہا کہ حکومت انٹیلیجنس اور سیکوریٹی ایجنسیوں کو مزید طاقتور بنانے کی ہر ممکن کوشش کرے گی۔ انہوں نے ان حملوں کو انڈیا کی روح پر حملہ قرار دیا۔

چِدمبرم کا مزید کہنا تھا کہ شدت پسندوں نے ملک اور ممبئی کے نادر اور نایاب نشان تاج ہوٹل پر حملہ کر کے اسے تہس نہس کرنے کی ناپاک کوشش کی۔ ان کا کہنا تھا کہ شدت پسند بین الاقوامی سطح پر اپنی دہشت گردی کی چھاپ چھوڑنا چاہتے تھے اس لیے انہوں نے ممبئی کو نشانہ بنایا لیکن اب حکومت نے طے کر لیا ہے کہ وہ دہشت گردی کی اصل جڑ تک پہنچ کر ہی رہے گی۔

وزیر داخلہ نے کہا کہ وہ ان حملوں کی تفتیش سے متعلق اس وقت کچھ نہیں کہہ سکتے۔

ممبئی کرائم برانچ سرکاری طور پر اس کیس کی تفتیش کر رہی ہے اور دیگر تفتیشی ایجنسیاں اس کا ساتھ دے رہی ہیں۔ چدمبرم نے واضح کیا کہ ایجنسیوں کے پاس کافی ثبوت موجود ہیں لیکن ابھی تصویر پوری طرح واضح نہیں ہوئی ہے۔ تصویر مکمل ہونے کے بعد وہ پارلیمنٹ میں بیان دیں گے۔

چدمبرم نے ان حملوں میں ہلاک ہونے والوں کو خراج عقیدت پیش کرتے ہوئے کہا کہ انہیں ان جانبازوں کی موت کا صدمہ ہے، وہ دل کی گہرائیوں سے مہلوکین کو خراج عقیدت پیش کرتے ہیں اور ساتھ ہی ہلاک ہونے والے سیکوریٹی اہلکار، پولیس عملہ اور ہوم گارڈز کو سیلوٹ کرتے ہیں جن کی جانبازی نے ہزارہا لوگوں کی جانیں بچائی۔

چدمبرم نے حکومت سے کہا کہ مہلوکین اور زخمیوں کو معاوضہ اکتیس دسمبر تک مل جانا چاہیے۔آخر میں انہوں نے ممبئی اور ریاست مہاراشٹر کے لوگوں سے اپیل کی کہ وہ حکومت کی دہشت گردی کے خلاف لڑائی میں ساتھ دیں تاکہ یہ شہر دوبارہ خوابوں کا شہر بن سکے۔

چدمبرم شہر کے سرکاری جے جے ہسپتال گئے جہاں انہوں نے چند زخمیوں کی عیادت کی اس کے بعد وہ وی ٹی ریلوے سٹیشن ، ہوٹل تاج اور ہوٹل اوبیرائے بھی گئے۔