ریاض مسرور بی بی سی اُردو ڈاٹ کام، سرینگر

	ہندوستان کے زیر انتظام جموں کشمیر میں پیر کو پہلے مرحلے کے لیے ووٹ ڈالے جائيں گے

ادھر نیشنل کانفرنس نےانتخابات کو ملتوی کرنے کی تجویز دی ہے۔

صوبائی ناظم مسعود سامون نے بی بی سی کوبتایا ’سکیورٹی اداروں کو امن و امان میں بگاڑ کا خدشہ تھا اس لیے وادی میں دفعہ ایک سو چوالیس نافذ ہے، جس کی رُو سے چار سے زائد افراد ایک جگہ جمع نہیں ہوسکتے۔ کرفیو کہیں پر نہیں ہے۔‘

واضح رہے کہ سید علی گیلانی نے جمعہ کو لوگوں سے اپیل کی تھی کہ وہ لال چوک کے ٹی آر سی گراونڈ میں جمع ہوجائیں، جہاں وہ نئی دلّی سے واپسی پر خطاب کرینگے۔ میرواعظ عمر فاروق نے بھی بانڈی پورہ جاکر الیکشن کے خلاف مہم کا اعلان کیا تھا۔

چنانچہ جمعرات کو ہی وادی بھر میں برفباری ہوئی جس کے سبب مختلف اضلاع کے درمیان سڑک رابطے مسدود ہوگئے۔ لیکن علیحدگی پسندوں کی کال کے پیش نظر سرینگر، اننت ناگ اور بارہمولہ اضلاع میں نیم فوجی عملے کی بھاری تعداد کو تعینات کرکے لوگوں کی نقل وحرکت کی اجازت نہیں دی گئی۔

مقامی یونیورسٹی نے جمعرات کو ہی جمعہ کو منعقد ہونے والے تمام امتحانات ملتوی کردیے تھے۔ برفباری کی وجہ سے حج پر جانے والے عازمین کو بھی مشکلات کا سامنا کرنا پڑا ہے۔

واضح رہے کہ بھارت کے چیف الیکشن کمشنر نے گزشتہ روز سرینگر میں ایک پریس کانفرنس کے دوران کہا تھا کہ علیحدگی پسندوں کی سرگرمیوں سے مجوزہ الیکشن عمل متاثر نہیں ہویں گے گا، تاہم انہوں نے اعتراف کیا تھا کہ موسم اس کام میں رخنہ ڈال سکتاہے۔

ادھر نیشنل کانفرنس کے صدر عمر عبداللہ نے ایک بیان میں الیکشن کمیشن سے اپیل کی ہے کہ وہ موسم کی خرابی کے باعث انتخابات کو اگلے سال مارچ یا اپریل تک مؤخر کردے۔