ریحانہ بستی والا بی بی سی اردو ڈاٹ کام، ممبئی

	دھماکے میں عید کے لیے خریداری کرنے والے لوگ ہلاک ہوئے تھے

ایڈیشنل پولیس کمشنر پرم بیر سنگھ نے اس گرفتاری کی تصدیق کی ہے۔ کرنل سری کانت پروہت کو بدھ کی شام کو ناسک عدالت میں پیش کیا گیا۔

اے ٹی ایس نے مالیگاؤں بم دھماکے کے سلسلہ میں اس سے پہلے سادھوی پرگیہ سنگھ ٹھاکر اور سابق میجر رمیش اپادھیائے کو گرفتار کیا تھا اور انہیں سے تفتیش کے دوران کرنل پروہت کا نام سامنے آیا تھا۔

فوج سے اجازت طلب کرنے کے بعد سے گزشتہ کئی دنوں سے ان سے تفتیش کی جارہی تھی۔ دھماکہ میں ان کے مبینہ طور پر ملوث ہونے کے ثبوت ملنے کے باوجود ان کی گرفتاری کے لیے فوج سے اجازت طلب کی گئی ہے۔

ذرائع کے مطابق کرنل پر مبینہ طور پر فوجی اسلحہ اور ڈپو سے آر ڈی ایکس فراہم کرنے کا الزام عائد کیا گیا ہے۔

اے ٹی ایس نے دعویٰ کیا ہے کہ انہوں نے مالیگاؤں بم دھماکے کے ذریعہ ملک میں ’ہندتوا‘ کے شدت پسند چہرے کو بے نقاب کیا ہے۔

دو سال قبل ناندیڑ میں آر ایس ایس کے ممبر کونڈوار کے گھر میں بم بناتے ہوئے دھماکہ ہوا تھا جس میں دو افراد موقع پر ہی ہلاک ہوئے تھے۔اس واقعے کے بعد زخمی افراد کے نارکو ٹیسٹ میں یہ راز افشاں ہوا تھا کہ پربھنی پورنا اور جالنہ کی مساجد میں انہیں لوگوں نے دھماکے کیے تھے۔اس کے بعد تفتیشی ایجنسیوں پر ان دھماکوں کی سست روی کے ساتھ تفتیش کے الزامات بھی عائد ہوئے تھے۔