ریحانہ بستی والا بی بی سی اردو ڈاٹ کام ، ممبئی

	انتیس ستمبر کو عید سے دو روز قبل مالیگاؤں میں دھماکہ ہوا تھا

اے ٹی ایس سربراہ ہیمنت کرکرے نے اس معاملہ میں کسی بھی طرح کی تصدیق کرنے سے یہ کہتے ہوئے انکار کر دیا ہے کہ ابھی کچھ کہنا قبل از وقت ہو گا لیکن پولیس کے ایک اہلکار نے نام ظاہر نہ کرنے کی شرط پر اس کی تصدیق کی ہے اور یہ بھی کہا ہے کہ انہیں آج ناسک کے ہالی ڈے کورٹ میں پیش کیا جائے گا۔

مالیگاؤں اور سورت کے شہر موڈاسا بم دھماکوں میں آر ڈی ایکس کا استعمال کیا گیا تھا اس لیے اے ٹی ایس شروع سے اس بات کی تفتیش کر رہی تھی کہ ہندتوا وادی تنظیم ہندو جن جاگرن منچ کو بم بنانے کے لیے کس نے آر ڈی ایکس فراہم کیا اور بم بنانے کی تربیت کس نے دی؟

ذرائع کا کہنا ہے کہ فوج کے ان دو سابق افسران کو اے ٹی ایس نے پونے سے حراست میں لیا تھا اور ان سے گزشتہ کئی دنوں سے تفتیش کی جا رہی تھی۔

ذرائع کا کہنا ہے کہ سابق فوجی جنرل گرفتار سادھوی پرگیہ سنگھ ٹھاکر کی شعلہ بیان تقریر سے بہت متاثر ہوئے تھے۔سادھوی نے اڑیسہ میں سوامی لکشمانند کے قتل پر تقریر کی تھی۔اے ٹی ایس نے شعلہ بیان سادھوی کی مذہبی تقاریر کی کئی کسیٹس جمع کی ہیں۔

اے ٹی ایس نے چوبیس اکتوبر کو ہندو جن جاگرن منچ کے تین اراکین کو بم دھماکوں کے سلسلہ میں گرفتار کیا تھا۔سادھوی وشو ہندو پریشد کی خواتین ونگ درگا واہنی کی رکن بھی ہیں۔

بی جے پی کا رخ  کوئی بھی ہندو تنظیم کسی بھی طرح کے بم دھماکوں میں ملوث نہیں ہے۔جبکہ ایسے سینکڑوں معاملات ہیں جن میں مسلم شدت پسند ملوث ہیں بھارتیہ جنتا پارٹی لیڈر، نتن گڈکری

اے ٹی ایس کے مطابق گرفتار ملزمان میں سے شام لال ساہو کامرس گریجویٹ ہیں جن کی اپنی موبائیل کی دکان ہے جبکہ دیگر ملزم شیو نارائن سنگھ بی ایس سی گریجویٹ ہیں۔اے ٹی ایس کو شبہ ہے کہ ان دونوں نے مبینہ طور پر بم بنائے ہوں گے۔اے ٹی ایس کے مطابق مالیگاؤں میں بم بنانے سے قبل ملزمین نے ایک سے زیادہ مرتبہ مالیگاؤں کا دورہ بھی کیا تھا۔

اے ٹی ایس ذرائع کا کہنا ہے کہ آئندہ چند دنوں میں مزید گرفتاریاں ہو سکتی ہیں۔اے ٹی ایس کی ٹیم مدھیہ پردیش کے شہر اندور میں موجود ہے۔اب تک جتنی گرفتاریاں ہوئی ہں وہ سب اندور شہر کے رہنے والے ہیں۔

اس دوران سادھوی کی گرفتاری کے بعد سے ملک بھر کی سخت گیر ہندو تنظیموں نے اعتراض کرنا شروع کر دیا ہے۔وہ اسے سیاسی مفاد سے جوڑ کر دیکھ رہے ہیں۔

ریاست مہاراشٹر میں حزب اختلاف سیاسی جماعت بھارتیہ جنتا پارٹی لیڈر نتن گڈکری کا کہنا ہے کہ کوئی بھی ہندو تنظیم کسی بھی طرح کے بم دھماکوں میں ملوث نہیں ہے۔جبکہ ایسے سیکڑوں معاملات ہیں جن میں مسلم شدت پسند ملوث ہیں۔

دوسری جانب اوما بھارتی نے بھی سادھوی کی گرفتاری پر احتجاج کیا۔ان کا کہنا تھا کہ پرگیہ محض ایک سادھوی ہیں ان کا کسی بھی دہشت گردی سے کوئی لینا دینا نہیں ہے۔