بینو جوشی بی بی سی، جموں

	جموں کشمیر میں پر تشدد مظاہرے چند ہفتوں سے جاری ہیں

کشمیر میں غیر کشمیری مزدور سنیچر کی رات بسوں میں چڑھ کر فوری طور پر جموں کے ریلوے سٹیشن پہنچ گئے تاکہ وہ اپنے اپنے گھروں کو واپس جاسکیں۔ بیشتر مزدوروں کا تعلق ریاست بہار اور جھارکھنڈ سے ہے۔ بہار کے سوانگ علاقے سے تعلق رکھنے والے سنتوش کمار گزشتہ دو برس سے سری نگر میں عمارتوں کو رنگنے کا کام کررہے تھے۔ وہ ہردن ڈیڑھ سو روپے کماتے تھے۔

گزشتہ دنوں کشمیر میں ہونے والے ہند مخالف احتجاج کے واقعات کے بارے میں انہوں نے بی بی سی کو بتایا ’ ہم نے زندگی میں ایسا کبھی نہیں دیکھا تھا جب ایک ہجوم ہند مخالف اور پاکستان کی حمایت میں نعرے بازی کررہے تھے اور ہم سے کہہ رہے تھے کہ تم ہندوستانیوں کے لیے کشمیر میں کوئی جگہ نہیں ہے۔ فوراً یہ جگہ چھو‍ڑ دو ورنہ تمہیں ٹکڑے ٹکڑے کردیا جائے گا۔ ‘

انکا مزید کہنا تھا کہ ’وہ جگہ پاکستان بن گئی ہے۔ ہمیں نہیں لگتا ہے وہ اب انڈیا کہ ایک حصہ ہے۔ ‘

کشمیر چھوڑو  ہم نے زندگی میں ایسا کبھی نہیں دیکھا تھا جب ایک ہجوم ہند مخالف اور پاکستان کی حمایت میں نعرے بازی کررہے تھے اور ہم سے کہہ رہے تھے کہ تم ہندوستانیوں کے لیے کشمیر میں کوئی جگہ نہیں ہے۔ فوراً یہ جگہ چھو‍ڑ دو ورنہ تمہیں ٹکڑے ٹکڑے کردیا جائے گا۔ سنتوش کمار، مزدور

بہار کے سیتامڑھی علاقے کے ورندر کمار کا کہنا ہے ’ وہ ہمارا نام پوچھتے تھے اور کہتے تھے کہ بہاری ہندؤں کو مارو۔ وہ ہم سے فوراً کشمیر چھوڑنے کو کہتے تھے۔ ایک مقامی بشیر احمد نے مجھے دس ہزار روپے دینے تھے لیکن اس نے کہا کہ تم ہندوستانی بھاگ جاؤ یہاں سے تمہیں ایک پیسہ بھی نہیں ملے گا۔‘

سری نگر کی ایک دکان پر کام کرنے والے جھارکھنڈ کے راجش کمار نے بتایا ’وہ کہتے تھے یہ پاکستان ہے انڈیا نہیں ہے۔‘

سوانگ کے ہی ایک اور باشندے راج کشور نے بتایا کہ ’ایک ہجوم آزادی اور پاکستان حمایتی نعرے لگا رہا تھا اور یوم آزادی پر لال چوک میں انڈیا کا پرچم ہٹا کر پاکستان کا پرچم لہرا دیا‘۔

سخت گير علیحدگي پسند رہنما سید علی شاہ گلانی نے 29 جولائی 2007 کو کہا تھا کہ بہاری مزدور کشمیر چھوڑ دیں اس دوران شدت پسندوں نے بعض حملے کیے تھے جس میں آدھا درجن بہاری مزدور ہلاک ہوئے تھے۔