سبیر بھومک بی بی سی، کولکاتہ

	ای میل میں کولکاتہ ہائی کورٹ میں بھی دھماکے کرنے کی با ت کہی گئی ہے

منگل کو کولکتہ میں بعض میڈیا اداروں کو دھمکی بھرے ای میل ملے تھے جس ميں شہر کے کئی مقامات پر دھماکے کرنے کی دھمکی دی گئی تھی۔

بی بی سی کولکتہ آفس کو بھی یہ ای میل ملا ہے۔

ای میل میں کہا گيا ہے کہ’ تم جو کرنا چاہو کر سکتے ہو، کر لو۔ لیکن ہمیں کولکتہ ميں دھماکے کرنے سے نہیں ررک سکتے۔ دھماکے دس بجے رات کو شروع ہوں گے۔‘

ای میل بھیجنے والے نے بعض علاقوں کے نام بھی بتائے ہیں جہاں دھماکے کرنے کی دھمکی دی ہے۔ ان مقامات میں کولکتہ ہائی کورٹ، تفریحی مقام، نکو پارک، پارک سٹریٹ، سالٹ لیک، پولو ہسپتال، پارک سرکس اور نیو علی پور شامل ہے۔

حالانکہ ہائی کورٹ اور نکو پارک میں رات کے وقت بھیڑ نہیں ہوتی ہے لیکن بقیہ تمام علاقے ایسے ہیں جو آبادی کے لحاظ سے گنجان ہیں۔ ای میل میں جو نام دیے گئے ہیں ان میں پارک سٹریٹ کے علاوہ تمام علاقوں میں رات کو لوگ سڑکوں پر بہت کم ہی ہوتے ہیں۔

خفیہ اہلکاروں کا کہنا ہے کہ ان کے پاس اس قسم کی اطلاعات ہیں کہ کولکتہ میں مسلم شدت پسند تنظمیں سرگرم ہیں۔ تاہم ان کا خیال ہے کہ ان تنظیموں نے دھماکے کا کوئي منصوبہ بنایا بھی ہوگا تو یہ ای میل سیکورٹی ایجینسیوں کو بظاہر گمراہ کرنے کی کوشش معلوم ہوتی ہے۔

پولیس کا موقف  اس بات کے کم ہی امکان ہیں کہ وہ ان جگہوں پر دھماکے کريں گے جن کے نام لکھے ہیں۔ یہ ہم لوگوں کا دھیان ہٹانے کی کوشش ہوسکتی ہے صوبائی پولیس

ان کا مزید کہنا تھا ’شدت پسند ریلوے سٹیشن، ہوائی اڈے یا بندر گاہ جیسے بھیڑ والے مقامات پردھماکے کر سکتے ہیں۔‘

پولیس نے شہر میں سیکورٹی سخت کر دی ہے اور تلاشی کا کام زور و شور سے شروع کر دیا ہے۔

واضح رہے کہ جمعہ اور سنیچر کو بنگلور اور احمدآباد میں بالاترتیب سلسلے وار چوبیس بم دھماکے ہوئے تھے جس میں کم ازکم پچاس افراد ہلاک اور سو سے زیادہ افراد زخمی ہوئے تھے۔

ان دھماکوں کے بعد پولیس کا دعوی کیا ہے کہ اس نے صوبے گجرات کے شہر سورت اور تمل ناڈو کے شہر چینئی میں بھی اس قسم کے دھماکوں کی سازش کو نام کردیا ہے۔