تیل کی قمیتوں کے اضافے کا اثر ضرورت کی ہر اشیاء کی قمیتوں پر پڑے گا

دو روز پہلے ہی حکومت نے تیل کی قمیتوں میں اضافے کے اعلان کیا ہے۔ کہا جارہا ہے کہ تیل کی قیمتوں میں اضافے کے سبب ہی افراط زر میں اضافہ ہوا اور خدشہ ظاہر کیا جا رہا ہے کہ آئندہ ہفتے افراط زر کی شرح میں مزید اضافہ ہوسکتا ہے جو کہ عام آدمی کے لیے اچھی خبر نہیں کیونکہ اس سے پہلے ضروری اشیاء کی قیمتیں مزید بڑھیں گی۔ حالانکہ اس ہفتے ملک میں پھل، سبزیوں اور مسالوں کی قیمتوں میں تھوڑی کمی ہوئی ہے لیکن کھانے کے تیل، ربر، کپاس اور مونگ پھلی مہنگی ہوئی ہے۔

اقتصادیات کے ماہرین کا کہنا ہے کہ تیل کی قیمتوں میں اضافے کے بعد آئندہ دو ہفتوں میں افراط زر کی شرح نو فی صد تک پہنچ سکتی ہے۔

اسی دوران حکومت کے تیل کی قیمتوں میں اضافے کے فیصلے کے خلاف مغربی بنگال سیمت کئی ریاستوں میں بائیں بازوں کی جماعتیں اور حزب اختلاف کی جماعت بھارتیہ جنتا پارٹی کے مظاہرے جاری ہے۔

وہیں عام عوام مہنگائی کے معاملے پر حکومت سے سخت ناراض ہیں۔

افراط زر کی موجودہ شرح سے یہ بات صاف ہوگئی ہے کہ مہنگائی پر قابو پانے کی حکومت کی تمام کوششیں اور وعدے غلط ثابت ہوئے ہیں۔

وزیر خزانہ پی چدامبرم نے مہنگائی پر تشویش ظاہر کرتے ہوئے کہا کہ خام تیل کی قیمتوں میں اضافے کے سبب افراط زر کا برا حال ہے۔

مرکزی حکومت نے وزراء اور اعلیٰ اہلکاروں اور صوبائی حکومتوں کو مشورہ دیا ہے کہ عوامی خزانے پر بوجھ کم کرنے لیے جہاں تک ممکن ہو کفایت شعاری سے کام لیں۔ اطلاعات کے مطابق بعض مرکزی وزرا نے غیر ممالک کے اپنے دورے منسوخ کر دیئے ہیں۔