تیل کی قیمتوں کے بڑھنے کی قیاس آرائیاں کئی ہفتوں سے ہورہی تھیں

حکومت نے پیٹرول کی فی لیٹر قیمت میں پانچ روپے جبکہ ڈیزل کی قیمت میں تین روپے فی لیٹر اضافہ کیا ہے۔گھریلو استعمال کی ایل پی جی گیس کی قیمتوں میں فی سلنڈر پچاس روپے کا اضافہ کیا گیا ہے تاہم مٹی کے تیل کی قیمت نہیں بڑھائی گئی۔

نئی قیمتوں کا نفاذ بدھ اور جمعرات کی درمیانی شب بارہ بجے سے ہوگا اور اس اضافے کے ساتھ دلی میں پیٹرول کی قیمت پچاس روپے چھپن پیسے، ڈیزل کی قیمت چونتیس روپے اسی پیسے فی لیٹر جبکہ ممبئی میں یہ قیمتیں بالترتیب پچپن روپے چوّن پیسے اور انتالیس روپے بارہ پیسے فی لیٹر ہو جائیں گی۔

یہ بھارت میں اس برس پیٹرولیم مصنوعات میں کیا جانے والا دوسرا اضافہ ہے۔ اس سے قبل گزشتہ فروری میں بھی پیٹرول اور ڈیزل کی قیتموں میں اضافہ کیا گيا تھا۔

حکومت کا کہنا تھا کہ عالمی بازار میں تیل کی قیمتوں میں اضافے کے پیش نظر قیمتیں بڑھانا ناگزير تھا لیکن عوام کا خیال رکھتے ہوئے قیمتوں میں اضافہ کم سے کم کیا گیا ہے۔

پیٹرولیم کے وزیر مرلی دیورا نے کہا ہے کہ تیل کی قیمتوں میں اضافہ ناگزیر تھا اور قیمتیں کم سے کم بڑھائی گئی ہیں۔ حکومت کا کہنا ہے کہ قیمتیں نہ بڑھانے سے سرکاری کمپنیوں کو روزانہ تقریباً سات کروڑ روپے کا نقصان ہو رہا تھا۔

پیٹرلیم کی قیمتوں میں اضافے اور مہنگائی کے سوال پر وزیر اعظم منموہن سنگھ بدھ کی شام قوم سے خطاب بھی کر رہے ہیں۔ اس سے قبل پیر کو وزیراعظم منموہن سنگھ نے کہا تھا کہ حکومت عالمی بازار میں خام تیل کی قیمتوں ميں زبردست اضافے کے نتیجے میں صارفین کو مزید رعایت دینے کی حالت میں نہیں ہے۔

تیل کی قیمتوں کے بڑھنے کے بارے میں قیاس آرائیاں کئی ہفتوں سے ہورہی تھیں حکومت نے اس کا اعلان کافی کشمکش کے بعد کیا ہے۔ حکومت کی اتحادی بایں بازو کی جماعتوں سمیت جزب اختلاف نے حکومت کے اس فیصلے پر سخت نکتہ چينی کی ہے۔