بینو جوشی بی بی سی، جموں

	سکیورٹی دستوں اور شدت پسندوں کے درمیان تصادم کا یہ سلسلہ ابھی بھی جاری ہے

تصادم کا یہ واقعہ اتوار کی صبح جموں میں سابنا کے کیلی منڈی علاقے میں پیش آيا ہے۔ حکام کے مطابق دو شدت پسندوں نے صبح صبح اچانک گولی باری شروع کردی۔

جموں رینج کے ڈپٹی انسپکٹر حنرل آف پولیس فاروق خان کے مطابق اس فائرنگ میں ہوشیار سنگھ سامیال اور ان کی اہلیہ موقع پر ہلاک ہوگئے۔ جبکہ ہوشیار سنگھ سامیال کی بیٹی اور ان کے گھر پر آئے ایک مہمان زخمی ہوگئے ہیں۔

ہلاک ہونے والوں میں مقامی اخبار کا ایک فوٹو جرنلسٹ بھی ہے۔ جو تصادم کی تصویریں اتار رہا تھا۔ فوٹو گرافر کا نام اشوک سوڈھی بتایا گیاہے۔

فاروق خان کا کہنا ہے کہ حملہ کرنے کے بعد شدت پسندوں نے ایک مکان میں پناہ لے رکھی ہے۔ سکیورٹی دستے نے اس مکان کو اپنے محاصرہ میں لے لیاہے اور دونوں طرف سے گولی باری کا سلسلہ رک رک کرجاری ہے۔

شدت پسندوں نے تصادم کے دوران گرنیڈ بھی استمعال کیے ہیں اور مکان میں موجود بعض افراد کو یرغمال بنا رکھا ہے۔ یرغمال بنائے گئے لوگوں میں بعض خواتین اور بچے ہیں۔

سکیورٹی افواج کے مطابق مکان میں پناہ لیے ہوئے شدت پسندوں کی تعداد ممکنہ طور پر دو سے زيادہ بھی ہوسکتی ہے۔

مقامی باشندوں کا کہنا ہے کہ تصادم والے علاقے میں کئی صحافی پھنسے ہوئے ہیں۔ سکیورٹی دستوں نے فی الحال سیاحوں کو علاقے میں جانے سے روک دیا ہے۔

سیکورٹی دستے کے مطابق جمعرات کو ہوئے تصادم کے دوران یہ شدت پسند بھارتی کشمیر میں داخل ہوئے ہوں گے۔ حالانکہ اس سے قبل انٹیلی جینس ایجنسیوں نے اس بات سے انکار کیا تھا۔