ریاض مسرور بی بی سی اُردو ڈاٹ کام، سرینگر

	ٹربیونل کی تفتیش سال دوہزار تین سے دوہزار آٹھ کے عرصہ پرمحیط ہوگی

انٹرنیشنل یپپلز ٹربیونل کے عنوان سے اس ’عوامی عدالت‘ کے قیام کا اعلان مقامی رضاکار پرویز امروز ، کیلیفورینا یونیورسٹی کی ہندوستانی نژاد پروفیسر اونگنا چٹرجی اور سپریم کورٹ آف انڈیا کے وکیل مِہیر دیسائی نےدیگر ہندوستانی و مقامی رضاکاروں کے ہمراہ سرینگر میں ایک پریس کانفرنس کے دوران کیا۔

ٹربیونل کے دیگر نگراں رضاکاروں میں کولیشن آف سِول سوسائٹیز کے سربراہ پرویز امروز، صحافی ظہیرالدین اور ہندوستان کے نامور انسانی حقوق رضاکار گوتم نولکھا شامل ہیں۔

مسٹر امروز نے ٹربیونل کے طریقہ کار کی تفصیل دیتے ہوئے بتایا کہ فی الحال ٹربیونل کی تفتیش سال دوہزار تین سے دوہزار آٹھ تک کے عرصہ پر محیط ہوگی، تاہم اُنیس سو نواسی (جب کہ مسلح شورش کا آغاز ہوا) سے دو ہزار تین تک ہوئے واقعات تفتیش کا بنیادی حوالہ ہونگے۔

اونگنا چیٹرجی اور مِہیر دیسائی نے اس موقعہ پر کہا کہ’پچھلے اٹھارہ سال سے کشمیریوں کو انصاف نہیں ملا ہے اور انصاف کے بغیر مفاہمت ممکن ہی نہیں‘۔

	کشمیر میں مسلح شورش کے دوران ہزارورں افراد لاپتہ ہوئے ہیں

اونگنا چیٹرجی نے عالمی ٹربیونل کی ضرورت کے بارے میں ایک سوال کا جواب دیتے ہوئے کہا کہ’ہندوستان ایک ابھرتا ہوا سُپرپاور ہےاور اقوام متحدہ کی سلامتی کونسل میں مستقل نشست کا امیدوار بھی۔ ایسے میں ہم چاہتے ہیں کہ حکومت کو جواب دہ بنایا جائے۔ ہم یہ تفتیش جموں کشمیر اور ہندوستان کے آئین اور عالمی ضوابط کے تحت کرنا چاہتے ہیں۔‘

پرویز امروز نے اس موقعہ پر وضاحت کرتے ہوئے کہا کہ پیپلز ٹربیونل کا مقصد کسی کا مواخذہ کرنا نہیں بلکہ انسانیت کے خلاف جرائم کے واقعات کو معتبر طریقہ پر جمع کرکے عالمی رائے عامہ کو منظم کرنا ہے۔

انہوں نے کہا کہ تفتیش کا یہ کام دو سال کے عرصہ میں مکمل کیا جائے گا، اور بعد ازاں تفتیش کے مشاہدات کو عوام اور عالمی اداروں کے سامنے پیش کئے جائیں گے۔