ریاض مسرور بی بی سی اُردو ڈاٹ کام، سرینگر

	شورش زدہ ریاست میں پولیس اور فوج کی فائرنگ سے عام شہری بھی نشانہ بن جاتے ہیں

پولیس کے مطابق ضلع بڈگام کے ماگام علاقے میں ڈگری کالج کے قیام کا مطالبہ لےکر مقامی لوگوں نے جلوس نکالا تھا جس پر قابو پانے کے لئے پولیس نے فضا میں گولیاں چلائیں اور لاٹھی چارج کیا۔

عینی شاہدین کے مطابق لاٹھی چارج کرنے پر پولیس اور مظاہرین کے درمیان تصادم شروع ہوا اور پولیس کی فائرنگ کے نتیجہ میں مقامی نوجوان ظہور احمد میر ہلاک ہوگئے۔

ہلاکت کے بعد مظاہرین مزید مشتعل ہوگئے اور سرکاری ٹرانسپورٹ کی ایک مسافر بس کو نذرآتش کردیا۔ عینی شاہدین کا کہنا ہے کہ بس میں سوار کئی مسافروں کو معمولی چوٹیں آئیں۔ علاقے میں پولیس اور سی آر پی ایف کی ٹکڑیاں گشت کر رہی ہیں۔

ظہور احمد کے بھائی غلام محمد میر نے بی بی سی کو چشم دید واقعہ سناتے ہوئے کہا: ’ ہم لوگ احتجاج کر رہے تھے، اتنے میں تیز رفتار جپسی آئی جس میں مقامی تھانے دار اور باقی پولیس اہلکار تھے۔ انہوں نے اندھادھند گولیاں چلائیں اور میرا بھائی وہیں ڈھیر ہوگیا، مجھے لگا وہ صرف زخمی ہے، لیکن بعد میں پتہ چلا کہ اس کی موت ہوگئی ۔‘

لیکن ضلع بڈگام کے ایس ایس پی عاشق بخاری نے بی بی سی کو بتایا کہ مظاہرہ دراصل ڈگری کالج کے مطالبے کو لے کر ہورہا تھا لیکن مظاہرین مشتعل ہوگئے۔
’انہوں نے ایک پولیس اہلکار پر جان لیوا حملہ کیا اور اس کی انساس رائفل چھین لی، جواب میں پولیس کو گولی چلانا پڑی۔‘

قابل ذکر ہے کہ گزشتہ روز حکومت نے کئی علاقوں میں اٹھارہ ڈگری کالجوں کے قیام کا اعلان کیا تھا۔ ماگام کے لوگوں کا کہنا ہے کہ خواندگی کی بہتر شرح ہونے کی بنا پراس علاقے میں بہت پہلے ڈگری کالج کو قائم کرنا چاہیے تھا۔