شکیل اختر بی بی سی اردو ڈاٹ کام، دلی

	منموہن سنگھ کی حکومت کے لیے مشکل؟

مارکسی کمیونسٹ پارٹی (سی پی ایم) کی مرکزی کمٹی کے دو روزہ اجلاس کے بعد پارٹی کے رہنما پرکاش کرات نے کہا ’ ہم نہیں چاہتے کہ یہ بحران حکومت پر اثر انداز ہو لیکن حکومت کے استحکام کی ذمہ داری خود حکومت کے اوپر ہوگی۔‘

انہوں نے کہا کہ جوہری معاہدہ کسی طرح بھی عمل میں نہیں آنا چاہیئے۔

سی پی ایم کی مرکزی کمیٹی نے اس سلسلے میں مزید فیصلے کرنے کا تمام اختیار پولت بیورو کو دے دیا ہے۔

مسٹر کرات نے کا کہنا تھا کہ انہوں نے واضح کردیا ہے کہ ’حکومت اگر بائیں محاذ کی حمایت برقرار رکھنا چاہتی ہے تو وہ جوہری معاہدہ کے سلسلے میں اگلا قدم نہ اٹھائے حکومت اس کو روک دے ،اس پر بحث کرے اور جو شک و شبہات اور خدشات ہيں اس کی وضاحت کرے۔‘

مسٹر کرات نے آئندہ مہینے ہند امریکہ مشترکہ بحری مشق کے خلاف بھی احتجاج کے منصوبے کا اعلان کیا۔ انہوں نے کہا کہ بایاں محاذ ہند امریکہ جوہری معاہدے کے خلاف پورے ملک میں مہم چلائے گا۔

موجودہ لوک سبھا میں 539 ارکان ہیں، حکمراں کانگریس اور اس کی اتحاد ی جماعتوں کے ارکان کی تعداد 219 ہے اور کمیونسٹ انسٹھ ارکان کے ساتھ باہر سے حکومت کی حمایت کررہے ہيں۔ اگر بائیں محاذ نے حمایت بند کردی تو منموہن سنگھ کی حکومت اقلیت میں آجائے گی۔

وزیر اعظم منموہن سنگھ نے پہلے ہی واضح کیا ہےکہ مخالفت کے باوجود معاہدے کے حصہ کے طور پر ایٹامک انرجی کمیشن کے چیر مین انل کاکوڈکر آئندہ ماہ بین الاقوامی جوہری ادارے سے بات چیت کریں گے۔

ہند امریکہ جوہری معاہدے کے تنازعے پر ابھی تک کسی جانب سے کسی نرمی کا مظاہرہ نہیں کیا گيا ہے ۔ بائیں محاذ کی طرف سے اس وارننگ سے حکومت اور بائیں بازو کے درمیان تعطل اب مزید گہرا ہوگيا ہے۔