صلاح الدین بی بی سی اردو ڈاٹ کام دلی

	بی جے پی رہنما مرلی منوہر جوشی

پارٹی کا کہنا ہے کہ حال میں امریکی کانگریس کی ایک بااثر کمیٹی نے بھارت اور امریکہ کے درمیان سویلین مقاصد کے جس معاہدے کو منظوری دی ہے اس میں کہا گیا ہے کہ اگر بھارت مستقبل میں کوئی ایٹمی دھماکہ کرتا ہے تو اس سے معاہدہ ختم ہو سکتا ہے۔

پارٹی رہنما مرلی منوہر جوشی نے ایک بیان میں کہا ہے کہ حکومت نے ابھی تک یہ بات واضح نہیں کی ہے کہ وہ جوہری تجربے کے اپنے حق کو محفوظ رکھنا چاہتی ہے یا نہیں۔ ’ہمیں جوہری تجربے کے اپنے حق کو کسی بھی صورت میں نہیں چھوڑنا چاہیے، کسی ایسی شرط کو بھی تسلیم نہ کیا جائے جس سے ہمارے جوہری نظام کی آزادی خطرے میں ہو۔ حکومت کو چاہیے کہ وہ اس بات پر غور کرے کہ اس بارے میں جو اقدامات کیے جارہے ہیں اس سے ملک کا فائدہ ہوگا یا پورے جوہری نظام کو گروی رکھا جارہا ہے۔‘

ہمیں جوہری تجربے کے اپنے حق کو کسی بھی صورت میں نہیں چھوڑنا چاہیے، کسی ایسی شرط کو بھی تسلیم نہ کیا جائے جس سے ہمارے جوہری نظام کی آزادی خطرے میں ہو۔ حکومت کو چاہیے کہ وہ اس بات پر غور کرے کہ اس بارے میں جو اقدامات کیے جارہے ہیں اس سے ملک کا فائدہ ہوگا یا پورے جوہری نظام کو گروی رکھا جارہا ہے۔ پارٹی رہنما مرلی منوہر جوشی

مسٹر جوشی کا کہنا تھا کہ اس معاہدے کی منظوری کے لیے بھارت پر جو شرائط عائد کی جارہی ہیں اس سے ملک کا جوہری تحقیقی نظام متاثر ہوگا اور بھارت دوسرے آزاد ممالک سے کافی پیچھے ہوجائے گا۔ ’ملک کے سائنس دان حیرت میں ہیں کہ آخرتحقیقی نظام آزادانہ طور پر کیسے آگے بڑھے گا۔ پابندیوں کے سبب ہمارا تکنیکی معیارگرجائے گا۔ پاکستان پر ایسی کوئی پابندی نہیں ہوگی اور وہ ہم سے آگے نکل سکتا ہے۔‘

مرلی منوہر جوشی کا کہنا تھا کہ اگر معاہدہ منظور ہوجائے تو چھ ہزار میگا واٹ بجلی پیدا کرنے کے لیے بھارت کو امریکہ سے کئی ری ایکٹرز خریدنے پڑیں گے جس کی قیمت پچاس سے اسّی ارب ڈالر ہے۔

ان کے مطابق اس عمل میں بیس برس کا وقت لگے گا اور اس پورے عمل سے ملک کی مجموعی توانائی کی ضرورت کی صرف چھ فیصد بجلی پیدا ہوسکے گی۔ انہوں نے کہا کہ حکومت کو اس پورے معاملے پر ازسر نو غور کرنے کی ضرورت ہے کہ کیا یہ سب ملک کے مفاد ہے۔