ان اداروں کا ملاپ ملازمتوں کے مواقعوں میں کمی لے آئے گا

ایک سو چوبیس ہوائی اڈوں کے تیس ہزار کے قریب کارکن بھی یونائٹیڈ فورم آف بینک یونین کی اس ہڑتال میں شریک ہوں گے۔ یہ کارکن حکومت کے نج کاری کے منصوبوں کی مخالفت کر رہے ہیں۔

آل انڈیا بینک ایمپلائز ایسو سی ایشن یا اے آئی بی ای اے کا کہنا ہے کہ ان اداروں کا ملاپ ملازمتوں کے مواقعوں میں کمی لے آئے گا۔

اے آئی بی ای اے کے کمال بھٹاچاریہ نےخبر رساں ادارے رائٹر کو بتایا کہ اس وقت ان اداروں کی برانچو ں کےدائرہ کار کو بڑھانے کی ضرورت ہے نا کہ انہیں ادغام کے نام پر کم کردیا جائے ۔ ’اس سلسلے میں سماجی پہلوؤوں کو نظر انداز کیا جا رہا ہے‘۔

بھارت میں سرکاری بینک ملک کی بینکاری کا چھیاسٹھ فیصد انتظام
سنبھالتےہیں۔ اگرچہ ادغام کی بات ہو رہی ہے لیکن حکومت کا کہنا ہے کہ وہ سرکاری بینکوں کی نجکاری نہیں کرے گی۔ وہ سرکاری بینکوں مثلاً سٹیٹ بینک آف انڈیا، بینک آف انڈیا، بینک آف برودا اور یونین بینک آف انڈیا، کے حصصوں کی بڑی تعداد اپنی پاس رکھے گی ۔

یونائیٹڈ فورم آف بینک یونینز کا کہنا ہے کہ وہ ملک کے تقریبًا پچانوے فیصد یعنی بینک اور انشورنس کمپنیوں میں کام کرنے والے ایک اعشاریہ تین ملین ملازمین کی نمائندگی کر رہے ہیں۔

اس سے قبل مارچ میں ہونے والی ہڑتال میں دس لاکھ کارکن شریک ہوئے تھے۔ اس مرتبہ یہ قیاس آرائی کی جارہی ہے کہ اس ہڑتال میں نجی اور غیر ملکی بینکوں کے بھی کچھ اراکان کے شریک ہونے کا امکان ہے۔

کارکن اس سلسلے میں ائر ٹریفک کے سوا ہوائی اڈوں کی تمام سروسز کو بند کرنے کی دھمکی دے رہے ہیں۔