 |  پٹنہ کی دوکانوں میں اس کھلونے کی فروخت سے لالو پرساد پھولے نہیں سما رہے |
بہار کے سابق وزیر اعلی اور مرکزی وزیر ریل لالو پرساد یادو کو اپنے چاہنے والوں کا ایک نیا حلقہ ملا ہے اور یہ حلقہ ہے بچوں کا۔دراصل بہار کے بچوں کے لیے لالو جی نام کا نیا کھلونا آیا ہے پٹنہ کی دکانوں میں اس کھلونے کی فروخت سے لالو پرساد پھولے نہیں سما رہے۔ بچوں میں اپنی مقبولیت کے ذریعے انہیں اپنے ووٹروں کو متاثر کرنے کی امید ہو رہی ہوگی۔ لالو پرساد نے نامہ نگاروں سے بات کرتے ہوئے کہا ’دیکھو ہم کتنے مقبول ہیں ہر گھر میں لوگ ہم سے کھیل رہے ہیں‘۔ خبر ساں ایجنسی اے ایف پی کے مطابق یہ کھلونہ ممبئی کی ایک کمپنی نے بنایا ہے جو پٹنہ کی دوکانوں میں 144 روپے میں فروخت ہو رہا ہے۔ اس گڈے کے بالوں کا اسٹائل لالو پرساد کی طرح ہے۔اور انہیں کی طرح اس کھلونے کو سفید کرتا اور پاجامہ پہنایا گیا ہے۔ بہار کے حالیہ انتخابات میں کوئی بھی سیاسی جماعت حکومت نہیں بنا سکی تھی۔اس سال اکتوبر اور نومبر میں وہاں نئے انتخابات کرائے جانے کا امکان ہے۔ اس میں کوئی حیرانی نہیں ہوگی کہ لالو یادو اس مرتبہ اپنی انتخابی مہم میں اپنی پارٹی کے انتخابی نشان لال ٹین کے ساتھ ساتھ لالوجی نام کے اس گڈے کو بھی استعمال کریں۔ | 
یہ صفحہ دوست کو ای میل کیجیئے
پرِنٹ کریں
