بھارتی سپریم کورٹ کی انوکھی ہدایات

ایک پٹیشن پر سماعت کرتے ہوئے سپریم کورٹ نے کہا کہ یہ ملازمین انتظامیہ میں ہوں یا پھر کلرک یعنی وہ کتنے ہی اونچے عہدے پر ہوں انہیں یہ بتانا چاہئے کہ انہوں نے دہیز لیا ہے یا نہیں۔

سپریم کورٹ نے مرکزی اور ریاستی حکومتوں کو ہدایت کی ہے کہ وہ ہر طرح کی سرکاری ملازمتوں کی رول بک میں اس بات کو شامل کریں۔

چیف جسٹس ار سی لاہوٹی، جسٹس جی پی ماتھر اور جسٹس پی کے بالا سبرامنیم پر مشتمل ایک بینچ نے اپنی تجاویز میں کہا ہے ’ ہم مرکزی اور ریاستی حکومتوں کو حکم دیتے ہیں کہ وہ اس بات پر غور کریں کہ سرکاری ملازمتوں کے دعویداروں سے جہیز کے بارے میں معلومات حاصل کی جائیں۔

اس کے علاوہ ان لوگوں سے بھی اس بارے میں معلومات حاصل کی جائیں جو پہلے سے ہی سرکاری ملازمتوں میں موجود ہیں۔

بھارت میں جہیز کی رسم کا ابھی بھی خاصا چلن ہے۔

اگر مرکزی اور ریاستی حکومتیں سپریم کورٹ کی اس تجویز کو تسلیم کر لیتی ہیں تو سرکاری ملازمتوں کے امیدوار یا پہلے سے موجود سرکاری ملازمین کوجہیز کے بارے میں بتانا پڑے گا۔

بھارت میں جہیز کے خلاف قانون 1961 میں بنایا گیا تھا اور اس قانون کے تحت جہیز لینے یا دینے والے کو پانچ سال قید اور 15000 روپے جرمانہ ادا کرنا پڑسکتا ہے۔

بینچ نے اس بات پر تشویش ظاہر کی کہ 43 سال بعد بھی مرکزی اور ریاستی حکومتوں نے اس قانون کے نفاذ کے لئے کچھ نہیں کیا۔