ریحانہ بستی والا بی بی سی اردو ڈاٹ کام ، ممبئی

	چوپڑہ بھارتی فلمی صنعت کی ایسی تیسری شخصیت ہیں جنہیں یہ اعزاز حاصل ہو رہا ہے

چورانوے سالہ چوپڑہ بھارتی فلمی صنعت کی ایسی تیسری شخصیت ہیں جنہیں یہ اعزاز حاصل ہو رہا ہے اس سے پہلے سنیل دت اور دلیپ کمار کو یہ اعزاز حاصل ہو چکا ہے۔

بی آر چوپڑہ کو انڈین فلمی صنعت میں ایک کامیاب اور بہترین فلمساز ہدایت کار اور مصنف کے طور پر جانا جاتا ہے۔ انیس سو چودہ میں لدھیانہ میں پیدا ہونے والے بی آر چوپڑہ نے لاہور یونیورسٹی سے انگریزی ادب میں ایم اے کیا۔ انہیں فلموں سے لگاؤ تھا اسی لیے وہ پہلے فلمی صحافی بنے اس کے بعد انہوں نے انیس سو پچپن میں ’بی آر پروڈکشن ‘ نامی اپنی کمپنی قائم کی۔

چوپڑہ اپنے وقت کے سماجی مسائل اور گھریلو معاملات پر فلمیں بنانے کے لیے مشہور ہیں۔ان کی فلموں ’نیا دور‘،’ایک ہی راستہ‘ ، ’دھول کا پھول‘، ’گمراہ‘ اور’ قانون‘ کا شمار بہترین فلموں میں کیا جاتا ہے۔

بی آر پروڈکشن کمپنی نے ٹی وی کی دنیا میں ایک تہلکہ مچایا تھا۔انہوں نے ٹی وی سیریل ’مہا بھارت ‘ بنائی جو اب تک کی ٹی وی کا سب سے مشہور سیریل مانا گیا ہے۔

چوپڑہ اپنے وقت کے سماجی مسائل اور گھریلو معاملات پر فلمیں بنانے کے لیے مشہور ہیں۔ان کی فلمیں ’نیا دور‘،’ایک ہی راستہ‘ ، ’دھول کا پھول‘، ’گمراہ‘ اور’ قانون‘ کا شمار بہترین فلموں میں کیا جاتا ہے

چوپڑہ اس عمر میں بھی کافی چاق و چوبند ہیں۔انہوں نے فلم باغبان اور بابل کی کہانی لکھی جس میں امیتابھ بچن نے کام کیا ہے۔ان کی دیگر کامیاب فلموں میں نکاح، انصاف کا ترازو، سادھنا، مزدور، آدمی اور انسان شامل ہیں۔

چوپڑہ کو اس سے قبل فلم فیئر لائف ٹائم اچیومنٹ ایوارڈ، دادا صاحب پھالکے ایوارڈ اور فلم ’قانون‘ میں بہترین ہدایت کاری کے لیے فلم فیئر ایوارڈ سے نوازا جا چکا ہے۔

روی چوپڑہ اور اودے چوپڑہ ان کے دو بیٹے ہیں۔روی فلمساز ہیں لیکن اودے چوپڑہ فلموں میں اداکاری بھی کر رہے ہیں۔ چوپڑہ کے چھوٹے بھائی یش چوپڑہ ہیں اور ان کے بیٹے آدتیہ چوپڑہ بھی فلمسازی کے میدان میں ہیں۔

روی چوپڑہ نے بی بی سی سے بات کرتے ہوئے کہا کہ بہ حیثیت فلمساز اور ہدایت کار ان کے والد ان کے لیے ایک مثال ہیں۔ان کے والد نے اس دور میں ایسی فلمیں بنانے کی ہمت کی جب کوئی ان موضوعات کو چھونے کی ہمت بھی نہیں کر سکتا تھا۔اسی لیے ان کے نقش قدم پر چلتے ہوئے وہ گھریلو اور سماجی مسائل کو اجاگر کرنے والی فلمیں بنانا چاہتے ہیں۔

روی چوپڑہ نے اپنے والد کی فلم ’نیا دور‘ کو رنگین لبادے میں ڈھالا ہے اور اب وہ مزید فلموں کو رنگین بنا رہے ہیں۔ ان کا کہنا ہے کہ وہ نئی نسل کو ان کے والد کے یادگار کام سے روشناس کرانا چاہتے ہیں۔