ریفل کی بنائی یہ پینٹنگ نجی نوادرات گھروں میں موجود ان کی کچھ پینٹنگز میں سے ایک ہے

فلورینس کے حکمران لورینزو ڈی میڈیچی کا یہ پورٹریٹ 1968 کے بعد سے منظرِ عام پر نہیں آیا تھا۔ یہی وہ وقت تھا جب اس پورٹریٹ کو محض تین سو پچیس ڈالر میں فروخت کیا گیا اور اسی دوران اس پورٹریٹ کے اصل ہونے کے بارے میں آرٹ کی دنیا کے ماہرین کی آراء دو حصوں میں منقسم ہو گئی تھی۔

تاہم ماہرین کا اب اس بات پر اتفاق ہے کہ یہ پورٹریٹ اصلی ہے۔ نوادرات کے نیلام گھر کرسٹی کے منتظمین نے اس پورٹریٹ کو نیلامی کے لیے پیش کی جانے والی یورپ کے نشاطِ ثانیہ دور کی پینٹنگز میں سے ایک نادر پینٹگ قرار دیا ہے۔

اس پورٹریٹ کا پس منظر کچھ یوں ہے کہ پاپ لیو ایکس نے اپنے بھتیجے لورینزو ڈی میڈیچی کی فرانس کے بادشاہ فرانکوئس اول کی ایک کزن سے شادی کروانے کے سلسلے میں یہ پورٹریٹ بنانے کا حکم دیا تھا۔ اس پورٹریٹ کا پس منظر گہرے سبز رنگ کا ہے جبکہ لورینزو ڈی میڈیچی خوبصورت سنہری رنگ کے ایک لباس میں سر پر پشم کے حاشیے والی ٹوپی پہنے دکھائی دیتے ہیں۔

معروف مصور ریفائل نے اپنے کیریر کی ابتداء ایک چرچ سے بطور ماہر ڈیکوریٹر کے کی۔ بعد ازاں ان کا شمار اپنے دور کے انتہائی ماہر پینٹرز میں ہونے لگا۔

ریفائل کی بنائی پینٹگز میں سے اس پورٹریٹ کی یہ سب سے انتہائی قیمت ہے جس نے پچھلا ریکارڈ توڑ دیا ہے۔ اس سے قبل 1996 میں ’سڈی فار دی ہیڈ اینڈ ہینڈ آف این پوسٹل‘ نامی پینٹگ پانچ اعشاریہ تین ملین پونڈ میں فروخت کی گئی تھی۔

کرسٹی اولڈ ماسٹر ڈیپارٹمنٹ کے انٹرنیشنل ڈائریکٹر رچرڈ نائٹ کا کہنا تھا کہ اس پورٹریٹ کے خالق ریفائل اور لورینزو ڈی میڈیچی کے ساتھ ساتھ جس دور میں یہ پورٹریٹ بنایا گیا وہ دور اور اس کی تخلیق کا پس منظر انتہائی اہمیت کا حامل ہے، ’اس کا یہی تناظر اب تک نیلامی کے لیے پیش کی گئی اُس دور کی خوبصورتی تخلیقات میں اس پورٹریٹ کو ایک نمایاں مقام دلاتا ہے‘۔