نارائن باریٹھ بی بی سی، جے پور

	خواجہ معین الدین چشتی کے عقیدت مند ہمیش ریشمیا اپنی آنے والی فلم ’آپکا سرور‘ کی کامیابی کے لیے دعا کرنے گئے تھے

گزشتہ منگل کی رات ہمیش ریشمیا جب برقعہ پہن کر زیارت کرنے پہنچے تو ہنگامہ شروع ہوگیا لیکن بعد میں ہمیش کے معافی مانگنے پر معاملہ رفع دفع ہوگیا۔

درگاہ کی انتظامی کمیٹی ’انجمن‘ کا کہنا ہے کہ ہمیش نیک نیتی سے درگاہ پر آئے تھے۔ ’وہ محض عبادت کے لیے آئے تھے‘۔

ہمیش کے ذرائع کا کہنا ہے کہ خواجہ معین الدین چشتی کے عقیدت مند ہمیش ریشمیا اپنی آنے والی فلم ’آپکا سرور‘ کی کامیابی کے لیے دعا کرنے گئے تھے۔

مداحوں نے برقعے پر مجبور کر دیا ہمیش نے پہلے درگاہ کے نظام گیٹ سے اندر جانا چاہا لیکن ان کے مداحوں کی بھیڑ نے انہیں اندر داخل نہیں ہونے دیا

ان کے مطابق بعد میں درگاہ کے خادموں کی مشورے پر وہ برقعہ پہن کر درگاہ میں داخل ہوئے لیکن برقعے کے نیچے سے انکی پینٹ دکھائی دے رہی تھی اور اسی پر ہنگامہ شروع ہوگیا۔

بعض خادموں نے اس پر اعتراض کیا لیکن انجمن نے اس تنازعہ کو یہ کہہ کر ختم کردیا کہ ہمیش نیک نیتی سے درگاہ آئے ہیں۔

	ہمیش ریشمیا گلو کار ہیں اور اب ان کی پہلی فلم ’آپ کا سرور‘ کے نام سے آ رہی ہے

ہمیش نے انجمن سے کہا ’اگر میرے برقعہ پہننے سے کسی کے جذبات کو ٹھیس پہنچی ہے تو میں اس کے لیے معافی مانگتا ہوں‘۔

اس سے پہلے گزشتہ سال اکتوبر میں اداکارہ قطرینہ کیف کے سکرٹ پہن کر درگاہ میں داخل ہونے پر تنازعہ ہو چکا ہے۔