ریحانہ بستی والا بی بی سی اردو ڈاٹ کام، ممبئی

	بالی وڈ میوزیم میں فلمی صنعت سے متعلق تمام اشیاء دستیاب ہوں گی

بالی وڈ فلم انڈسٹری سال میں ہالی وڈ سے بھی زیادہ فلمیں بنارہی ہے لیکن اب تک یہ ایک طرح سے بکھری ہوئی ہے۔

اس کی کئی ایسوسی ایشنز ہیں لیکن کوئی ایک ایسا ادارہ نہیں جہاں فلمی ستاروں یا بالی وڈ سے متعلق پوری معلومات مل سکیں۔

عام طور پر میوزیم میں نادر و نایاب تصاویر، مجسمے، اشیاء اور لٹریچر وغیرہ ہوتا ہے لیکن بالی وڈ میوزیم ایک مختلف میوزیم ہوگا جہاں زندہ انسانوں یعنی فلمی ستاروں سے ملاقات ہوگی۔

یہاں فلمی ستاروں کے بارے میں مکمل معلومات مل سکے گی۔ وہ کیا کھاتے ہیں، کیا پہنتے ہیں اور ان کیا مشاغل ہیں۔ ان کی تصاویر، ان کے بارے میں کتابیں، ان کی رہائش گاہ کی معلومات، ان کے پہنے ہوئے کپڑوں کی نمائش اور بہت کچھ۔ اگر آپ ان سے ملنے کے خوہش مند ہیں یا ان کے ساتھ کچھ وقت گزارنا چاہتے ہیں تو یہ بھی کچھ مشکل نہیں ہوگا اور یہی اس میوزیم کی خصوصیت ہوگی۔

’پرسیپٹ ہولڈنگز‘ کے صدر اجے اپادھیائے کے مطابق اب بالی وڈ انڈسٹری تیزی سے پھیل رہی ہے اور دنیا بھر میں بالی وڈ ستاروں کے پرستار موجود ہیں جو ممبئی آتے ہیں لیکن اپنے فلمی ستاروں کی ایک جھلک بھی دیکھنے سے قاصر رہتے ہیں۔ انہیں اس میوزیم میں وہ سب کچھ ملے گا جس کی وہ خواہش کریں گے۔ یہاں شوٹنگ بھی دکھائی جائے گی اور فلمی ستاروں کے علاوہ بالی وڈ کی دیگر بڑی ہستیوں جیسے موسیقاروں، گلوکاروں ، فلمسازوں اور کہانی نویسوں سے بھی ملنے کا موقع مل سکتاہے۔

بالی وڈ پر ریسرچ کرنے اور دیگر معلومات حاصل کرنے کے لیے یہ میوزیم ایک لائیبریری یا معلومات کے مرکز کی مانند ہوگا۔

میوزیم بنانے کے لیے جگہ کی تلاش جاری ہے۔ اجے اپادھیائے کے مطابق ممبئی میں اتنی بڑی جگہ تلاش کرنا آسان کام نہیں ہے لیکن چند مقامات کی نشاندہی ہو چکی ہے بس اس میں سے ایک کا انتخاب باقی ہے۔