 | | | یہ پینٹنگ جس کا نام سٹڈی فار پورٹریٹ II ہے 1956 میں بنائی گئی تھی |
مصور فرانسس بیکن کی ایک پینٹنگ نے لندن میں نیلامی کے دوران ایک نیا ریکارڈ قائم کیا ہے۔ یہ پینٹنگ چودہ ملین ڈالر میں فروخت ہوئی ہے۔ یہ پینٹنگ جس کا نام ’سٹڈی فار پورٹریٹ II‘ ہے 1956 میں بنائی گئی تھی۔ اس کی نیلامی لندن کی کرسٹی نامی ایک گیلری میں جمعرات کو کی گئی اور اپنی شناخت ظاہر نہ کرنے والے ایک خریدار نے اس کے لیے اسے 14 ملین ڈالر کی بولی دے کر خرید لیا۔ یہ پینٹنگ بیکن کی اس سلسلہ وار پینٹنگز میں سے ایک ہے جس میں انہوں نے کیتھولک چرچ کے پچاس رہنماؤں کے پورٹریٹ بنائے تھے۔ توقع کی جا رہی تھی کہ یہ پورٹریٹ بارہ ملین ڈالر میں فروخت ہو گا۔ اس سے پہلے بیکن کی ہی ایک پینٹنگ گزشتہ سال، امریکہ، نیو یارک میں پندرہ ملین ڈالر میں فروخت کا ریکارڈ قائم کر چکی ہے۔ ان کے اس پینٹنگ کا نام ’ورشن نمبر ٹو آف لائینگ فیگر ود سرنج‘ تھا۔ کہا جاتا ہے کہ جمعرات کو نیلام کی جانے والی پینٹنگ میں ہمدردانہ پہلو نمایاں کرتے ہوئے پوپ کو ایک ایسے ٹریجک ہیرو کے طور پر پیش کیا گیا ہے جو خارجی طاقتوں میں گھرا ہوا ہے۔ کرسٹی میں ہم عصر مصوری کے ڈائریکٹر پیلار اورڈوواس کا کہنا ہے کہ ’بیکن کی بنائی ہوئی پوپ سیریز کا یہ ایک اہم ترین شاہکار ہے جو بازار میں نیلامی کے لیے آیا ہے‘۔ ان کا کہنا ہے کہ اس فن پارے سے فرانسس بیکن کی حیثیت بیسویں صدی کے سرکردہ مصوروں میں مستحکم ہو گی۔ فرانسس بیکن انگریز والدین کے ہاں آئر لینڈ میں پیدا ہوئے تھے لیکن وہ لڑکپن ہی میں سپین چلے گئے اور وہیں 1992 میں انتقال کیا۔ | 
مصوری میں غزہ کے روز و شب
