ریحانہ بستی والا بی بی سی اردو ڈاٹ کام، ممبئی

	جان من کی تشہیر کے لیئے فلمساز ساجد نڈیاڈ والا نےمیریٹ میں پارٹی رکھی۔

اور جب ایشوریہ کو ڈانٹ پڑی
ایسا نہیں ہے کہ حسینوں کے ناز نخرے ہی اٹھائے جاتے ہیں اور انہیں ڈانٹ ڈپٹ نہیں ہوتی۔ اب ایشوریہ کو لے لیجیئے۔ دنیا چاہے ان کے حسن کے جادو میں کھوئی ہو اور ابھیشیک ان کی زلفوں کے اسیر ہوں لیکن جیا بچن نے ایش کو اس بری طرح ڈانٹا کہ وہ روندھی ہو گئیں۔ نہیں بھئی ابھیشیک کے ساتھ گھومنے پھرنے پر نہیں بلکہ ایش کے دیر سے آنے پر۔

دراصل جیا نے ایش کو گھر پر کھانے پرمدعو کیا تھا ۔جیا وقت کی بہت پابند ہیں اب ایش چند منٹ نہیں دو گھنٹے تاخیر سے پہنچیں اور پھر کیا تھا جیا جی کو منانے میں ایش کے پسینے چھوٹ گئے۔

	ابھیشیک ایش کی زلفوں کے اسیر

اب آگے سنیئے بالی وڈ اداکار عرفان خان اور محمد علی ( جو اس وقت لندن میں سکونت اختیار کر چکے ہیں اور فلم اے مائٹی ہارٹ کے اداکار ہیں ) کو فلم کے پروڈیوسرز نے میڈیا سے بات کرنے سے سختی سے منع کیا ہے۔ اب کوئی ہمیں بتائے کہ ہالی وڈ کا میڈیا آخر اپنے سٹارز کے یہ نخرے کیسے جھیلتا ہے؟

ابھیشیک بنے Gay Icon
ابھیشیک بچن کو شہر کے ہم جنس پرستوں نے اپنا ماڈل سمجھ لیا ہے۔ جان ابراہام جو کبھی ان کی نظروں میں سب سے اچھے تھے اب وہ دوسرے نمبر پر ہیں اور سلو بھیا کا نمبر چوتھا ہے۔ جب ایب کو بتایا گیا تو ان کا چہرہ سرخ ہو گیا اب پتہ نہیں ایش کو کیسا لگے۔

مرچیوں کی سیج
سرخ مرچیوں کی سیج ، کیا یہ آپ کو رومانٹک لگتا ہے ؟ پتہ نہیں لگتا ہے کہ فلمسازوں کا ٹیسٹ کچھ بدل گیا ہے۔ کمالستان اسٹوڈیو میں فلم ’اپنا سپنا منی منی‘ کی شوٹنگ تھی اور ہیرو شری یش تلپڑے کے ساتھ ہیروئین ریاسین کا سرخ مرچیوں کے ڈھیر پر ایک منظر فلمایا جانا تھا۔ ریا کہتی ہیں تیز دھوپ اور اس پر سرخ مرچیاں، شاٹ او کے نہیں ہوا اور کئی ری ٹیک ہوئے جس کے وجہ سے پورا بدن جل رہا تھا حتی کہ یونٹ کے ممبران اپنے ہاتھوں سے ان کے بدن پر برف مل رہے تھے۔ کیا کریں شاید رومانی حس ختم ہوتی جا رہی ہے یا پھر کچھ انوکھا کرنے کی چاہت میں ایسے مناظر ۔۔۔۔۔۔

	شاہ رخ خان کی ڈان اس جمعہ کو ریلیز ہو رہی ہے

سلو بھیا ایک مصور؟
کیا آپ جانتے ہیں کہ سلو بھیا اداکار ہونے کے ساتھ ساتھ ایک مصور بھی ہیں۔ آپ ہم سے سوال کریں گے کہ ہم نے آپ کو نہیں بتایا کہ لیکن ہم خود کیا کریں ہمیں بھی تو ابھی ہی پتہ چلا ہے۔ اور تو اور سلو بھیا نے جو پینٹنگز بنائی ہیں ان میں ایک ہی پیغام ہے محبت، عورت کا حسن پردے میں، اس کے علاوہ سیکولرازم اور عدم تشدد۔ سلو بھیا کا کہنا ہے کہ مصوری میری روح میں ہے یعنی کہ ان کی والدہ سلمٰی ایک اچھی مصورہ ہیں۔

آشا اور سنجو بابا
نامور اور سریلی گلوکارہ آشا بھوسلے نے جب یہ کہا کہ ان کے میوزک البم میں سنجو بابا ان کے ساتھ گائیں گے تو ہر کوئی حیران ہو گیا سنجو ! لیکن آشا جی بضد تھیں اور پھر سنجو بابا نے ان کے ساتھ ان کے میوزک البم میں بنا معاوضہ کے ایک گیت گایا۔ گیت گاتے ہوئے سنجو آبدیدہ ہو گئے۔ پوچھنے پر انہوں نے بتایا کہ آج سے چالیس سال قبل ان کے والد سنیل دت نے آشا جی کے ساتھ فلم ’یہ راستے ہیں پیار کے‘ میں گیت گایا تھا۔

جب ہمیش ڈر گئے
فلم رامو کی شعلے میں امیت جی گبر کا کردار نبھا رہے ہیں یہ تو سب ہی جانتے ہیں لیکن کیا آپ کو پتہ تھا کہ اس فلم میں محبوبہ محبوبہ گیت ہمیش ریشمیاگانے والے تھے لیکن اب پتہ چلا کہ وہ یہ گیت نہیں گا رہے ہیں۔ فلم کے اس منظر میں امیت جی کی آواز بھی ہے۔

	سلمان آج کل اپنی سرخ رنگ کی Hayabusa بائیک پر گھومتے نظر آتے ہیں

کوئی میرا دولہا ڈھونڈے
یہ پکار ہے اداکارہ سلینا جیٹلی کی۔ یقین نہیں آتا تو آپ ان کے والدین سے پوچھ لیجیئے جن سے سلینا نے اپنے لئے ہم سفر ڈھونڈنے کی گزارش کی ہے۔ لگتا ہے سلینا نے یہ دوسرا جنم لے لیا ہو کیونکہ اب وہ فلموں میں جسم کی نمائش نہیں کرنا چاہتی ہیں۔ بیچاری نے ایک فلم کی جس میں انہوں نے مکمل کپڑے پہنے لیکن کوئی ڈسٹری بیوٹر وہ فلم لینے کے لئے تیار نہیں ہے۔ اس لئے سلینا اب شاید گھر بسانے کی جلدی میں ہیں۔ کیا آپ ان کی مدد کر سکتے ہیں۔

چلتے چلتے
سلمان آج کل اپنی سرخ رنگ کی Hayabusa بائیک پر گھومتے نظر آتے ہیں جس پر ان کے ساتھ اکثر قطرینہ کیف بھی مل جاتی ہیں۔ ایک روز وہ کچھ فوٹو گرافرز کے لینس میں قید ہو گئے لیکن جب تک وہ انہیں ہیلو کہتے سلمان غائب۔

پاکستانی غزل گلوکار غلام علی ایک بار پھر آشا بھوسلے کے ساتھ غزل گائیں گے لیکن اس مرتبہ یہ البم غلام علی کے بیٹے بنا رہے ہیں۔

رامو کی شعلے میں اب قطرینہ کیف کی جگہ سشمیتا سین نے لے لی ہے۔ رام گوپال ورما نے اقبال کے ہیرو سری یش تلپڑے کو فلم سے نکال دیا ہے۔

موسیقار اے آر رحمان اب اپنے نغموں کی رائلٹی چاہتے ہیں جس سے فلمساز پریشان ہیں۔

سیف علی خان کی سابقہ بیوی امرتا سنگھ آنے والی ایک فلم میں وویک اوبیرائے کی ماں کا کردار نبھائیں گی۔

اور آپ سب آئندہ جمعہ کو دو بڑے خانوں کی فلمیں ڈان اور جان من دیکھنے کے لئے تیار رہیئے۔