ریحانہ بستی والا بی بی سی اردو ڈاٹ کام، ممبئی

	مغل اعظم کی پاکستان میں ریلیز سے تعلقات میں بہتری کے آثار دکھائی دے رہے تھے

مکالمہ نویس اور کہانی کار جاوید صدیقی پاکستانی فلمساز شہزاد رفیق کی ایک فلم پر کام کر رہے ہیں۔ اس فلم کی کہانی اور مکالمے انہوں نے لکھے ہیں۔ نغمے گلزار کے ہیں اور فلم کی ہیروئین مہیما چودھری ہیں۔ ابھی اس فلم پر کام شروع نہیں ہواہے۔ شہزاد رفیق اپنی پنجابی فلم کی شوٹنگ پاکستان میں ختم کر کے ممبئی میں فلم کا پوسٹ پروڈکشن مکمل کرنا چاہتے تھے لیکن بھارتی حکومت نے انہیں ویزا نہیں دیاہے۔

شہزاد رفیق مایوس ہیں اور انہوں نے اب فلم کا کام بنکاک میں مکمل کرنے کا فیصلہ کیا ہے۔ اگر حکومت نے انہیں آئندہ بھی ویزا نہیں دیا تو ان کا دوسرا پروجیکٹ بھی نہیں شروع ہوپائے گا۔

جاوید صدیقی کو بہت افسوس ہے ۔’اس طرح کے حالات دونوں ممالک کے عوام کو ذہنی طور پر اذیت پہنچاتے ہیں۔ کبھی تو ایسا ہوتا ہے کہ لوگ ایک دوسرے کی خیریت فون کے ذریعہ معلوم کرتے ہیں۔ کبھی ماحول گھریلو ہوتا ہے اور پھر اچانک تعلقات کے درمیان سرد مہری آجاتی ہے۔‘

جاوید صدیقی کے مطابق بڑی مشکل اور کانٹوں بھری رہگزر پر چلنے کے بعد فنکاروں نے ماحول کو بہتر بنانے کی جان توڑ کوشش کی تھی اور اس میں دونوں ممالک کا فائدہ ہے۔ ’اگر شہزاد رفیق یہاں کام کرتے تو ملک کو ہی مالی فائدہ ہوتا ۔لیکن انہیں ویزا نہیں ملا پتہ نہیں آگے اور کیا ہوگا۔‘

فلمساز مہیش بھٹ نے بھی پاکستانی فلمساز سہیل کے ساتھ فلم بنانے کا اعلان کیا تھا۔ انہیں کی کوششوں کا نتیجہ ہے کہ دونوں ملکوں کے درمیان خوشگوار تبادلہ شروع ہوا تھا۔ مہیش بھٹ نے بہر حال امید کا دامن نہیں چھوڑا ہے۔

ان کا کہنا ہے کہ ’حالات چاہے جو ہوں میں مایوس نہیں ہوں۔ ندی کے بہاؤ کے ساتھ تو ہر کوئی بہتا ہے، مزہ تو تب ہے جب آپ اس کا یا تو رخ بدلیں یا پھر اس کے مخالف بہنے کی قوت پیدا کریں ۔ہم سب ایک بار پھر کوشش کریں گے اور حالات پھر بہتر ہوں گے ۔‘ آنے والے دن ہی بتاسکیں گے کہ دونوں ملکوں کے تعلقات کا بالی وڈ پر کیا اثر پڑتا ہے۔