ریحانہ بستی والا بی بی سی اردو ڈاٹ کام، ممبئی

	’شاہ رخ کے لیئے چارٹر طیارہ تو میرے لیئے کیوں نہیں‘

ایشوریہ کی مشکل
ملکہ حسن ایشوریہ رائے اور ابھیشیک بچن کی شادی کی خبریں پھیل چکی ہیں۔ پہلے تو خبر تھی کہ ’امراؤ جان ادا‘ کی تشہیر کے لیئے یہ ہنگامہ کیا گیا ہے لیکن ہمیں کسی نے کہا کہ بات میں سچائی ہے۔

	ایشوریہ شادی کے لیئے سنجیدہ مگر بچن خاندان تیار نہیں

سنا گیا ہے کہ ایشوریہ اب شادی کے معاملے میں سنجیدہ ہو گئی ہیں کیونکہ عمر اب ان کے ہاتھوں سے پھسلتی جا رہی ہے۔ اس لیئے وہ آدتیہ چوپڑہ کی فلم سے تاریخیں لے کر جے پی دتہ کی فلم ’امراؤ جان ادا‘ کے لیئے دے رہی ہیں تاکہ زیادہ سے زیادہ وقت وہ ابھیشیک کے ساتھ گزار سکیں لیکن نہ تو خود ابھیشیک اور نہ ہی امیت جی اور جیہ بچن ابھی اپنے بیٹے کی شادی کے لیئے تیار ہیں۔ ان کا کہنا ہے کہ ابھی تو ابھیشیک کا کیریئر شروع ہوا ہے اور وہ کئی برسوں تک شادی کے بارے میں سوچ بھی نہیں سکتے۔ ایش جی کہیں ایسا نہ ہو کہ جس طرح آپ نے سلمان خان اور وویک کو شادی کے لیئے دھوکہ دیا ، وہی دھوکہ آپ خود کھا جائیں اور شہرت کی بلندیوں پر پہنچنے کے بعد ابھیشیک بھی آپ کو بھول جائیں ۔وہ کہا جاتا ہے نہ کہ جیسے کو تیسا۔

ایشا کے بولڈ سٹیپ
ہیما مالنی اور دھرمیندر کی بیٹی ایشا دیول فلم ’دھوم‘ کے بعد سے اب زیادہ ’بولڈ‘ مناظر فلمانے کے لیئے بھی تیار ہیں۔ پہلے ہی فلم ’دھوم‘ میں چھوٹے کپڑے پہننے پر ان کے پاپا اور گھر والے ناراض تھے اور اب ایشا فلم ’ان کہی‘ میں صرف دو کپڑوں میں نظر آئیں گی۔ ایک صحافی کو انٹرویو دیتے ہوئے ایشا نے خیال ظاہر کیا کہ وہ بدلتے ماحول کے ساتھ خود کو بدلنا چاہتی ہیں اور اگر یہ کپڑے رول کی ڈیمانڈ ہیں تو اس میں کسی کو کیا اعتراض ہو سکتا ہے۔

	بدلتے ماحول کے ساتھ خود کو بدلنا چاہتی ہوں: ایشا دیول

ایشانے دو قدم آگے بڑھ کر فوراً ہی صفائی بھی دے ڈالی کہ اس نے فلم کے اس منظر کو فلمانے کے دوران سیٹ سے سب کو ہٹا دیا تھا ۔ایشا جی یہ آپ کس کو بہلا رہی ہیں کیا سیٹ پر سے سب کو ہٹانے کے بعد آپ فلم کے پردے سے وہ منظر ہٹا سکیں گی جسے کروڑوں لوگ دیکھیں گے۔ بھئی کیا بات ہے ہر ہیروئین کامیاب ہونے کے لیئے اب کپڑے اتارنے کے لیئے بھی تیار ہے اور ساتھ ہی ان کے پاس اس کا جواز بھی ہے۔

دِیا مرزا کے ساتھ مذاق
دیا مرزا کی ابھی تک کوئی فلم کامیاب نہیں ہو سکی اور وہ اب بھی کسی کامیاب فلم کی چاہ میں ہیں۔ فلم ’پرینیتا‘ میں ان کا کردار اتنا مختصر ہے کہ ناظرین کو یہ پتہ بھی نہیں چلتا کہ وہ فلم میں کب آئیں اور کب چلی گئیں لیکن فلم کی پبلسٹی میں انہوں نے اس طرح بڑھ چڑھ کر حصہ لیا جیسے فلم کی ہیروئین ودیا بالن کے بجائے وہی ہوں۔ دیا نے بھی دیگر کئی ہیروئینوں کی طرح اپنی کامیابی کو کم کپڑوں اور جذباتی مناظر میں سمیٹنے کی کوشش کی ہے۔اپنی آنے والی فلم کے سیٹ پر اپنے مد مقابل ہیرو کے ساتھ انہوں نے بوس و کنار کرنا منظور کر لیا۔

	دیا مرزا پاورفل رول کے انتظار میں ہیں

اب کیا کریں عمران ہاشمی کے علاوہ بھی تو کوئی ہو جو یہ کہہ سکے وہ بھی اس میں ماہر ہے۔ خیر دِیا کا کہنا ہے کہ ہیرو ان کی خوبصورتی کی وجہ سے ان کے ساتھ بوس و کنار کا منظر فلمانے سے ہچکچا رہا تھا ۔ انہوں نے ہیرو کی ہمت بڑھائی اور بڑھ کر خود بوسہ کا سین کیا ۔ یہ سین لمبا ہوتا گیا اور جب کسی نے کٹ نہیں کہا تو دیا نے خود کو روک لیا۔ پتہ چلا وہ سین فلمایا ہی نہیں گیا اور یہ تو ان کے ساتھ مذاق کیا جا رہا تھا۔ دیا جی ایسا ہی ہوتا ہے ۔مضطرب ہو کر کپڑے اتارنے اور بولڈ مناظر دینے سے فلمیں ہٹ نہیں ہوتیں۔

عائشہ کی مجبوری
ادکارہ عائشہ تاکیہ کے بارے میں خبریں گرم ہیں کہ وہ شادی کر رہی ہیں اور اس لیئے وہ دو ماہ کے اندر اندر اپنی ساری فلمیں پوری کرنا چاہتی ہیں۔ ان کا کہنا ہے کہ یہ خبر ان کے دشمنوں نے اڑائی ہوگی اور ان کا ابھی شادی کا کوئی ارادہ نہیں ہے ۔وہ جب بھی شادی کریں گی تو پھر فلمی دنیا کو چھوڑ دیں گی۔

	ابھی شادی نہیں کر رہی: عائشہ تاکیہ

ہم کہتے ہیں کہ اس میں کون سی قربانی والی بات ہے، اگر وہ فلموں کو نہیں چھوڑیں گی تو فلمیں انہیں چھوڑ دیں گی کیونکہ اس گلیمر کی دنیا میں شادی شدہ ہیرو تو چل جاتا ہے لیکن شادی شدہ ہیروئین نہیں کیونکہ اس کے چاہنے والے کروڑوں نوجوان انہیں پردے پر تو ہیرو کی بانہوں میں دیکھ سکتے ہیں لیکن نجی زندگی میں کسی کے ساتھ دیکھنا گوارا نہیں کرتے۔

نام بدلنے سے کام نہیں ملتا
ہمیں وویک اوبرائے کے ساتھ پوری ہمدردی ہے۔ اب دیکھیئے نا زمانے کے ساتھ ساتھ تقدیر نے بھی ان کے ساتھ کیسا مذاق کیا کہ جس ہیروئین کے لیئے انہوں نے سلمان خان جیسے انسان کو میڈیا کے سامنے برا بھلا کہا اور کئی الزام لگائے اسی لڑکی نے انہیں چھوڑ دیا۔

	ویویک اوبرائے، فلم اور عشق دونوں میں ناکامی

فرسٹریشن کا شکار بیچارے وویک اب عبادت گاہوں پر جا رہے ہیں اور نجومیوں سے مشورے کر رہے ہیں کیونکہ وہ اپنا پورا دھیان فلموں پر لگانا چاہتے ہیں۔ انہیں علم جفر کے ماہر ایک نجومی نے کہا ہے کہ اگر وویک اپنے نام کے ہجے بدل دیں اور اپنے نام کے ساتھ آنند جوڑ لیں تو ان کی قسمت کا ستارہ بلند ہو سکتا ہے۔ کیا پتہ ایسا ہو بھی کیونکہ یہ تو ہم نےدیکھا تھا کہ ایشوریہ سے الگ ہونے کے بعد سلمان کا ستارہ بھی عروج پر پہنچ گیا تھا۔ خیر ہم یہ کہنا چاہتے ہیں کہ فلمیں اچھی اداکاری کی وجہ سے چلتی ہیں نجومیوں کی پیشن گوئیوں کی وجہ سے نہیں۔