نیلسن منڈیلا کا یہ پیغام کہ ’ آؤ اس سال غربت کو ماضی بنانے کے لئے کام کریں‘ موسیقی کے پروگراموں کا بنیادی نعرہ تھا

مورے فیلڈ سٹیڈیم میں موسیقی کے تقریباً 60000 مداح جمع ہوئے ۔

اس کنسرٹ میں آئرلینڈ کے بینڈ یوٹو کے گلوکار بونو نےجنوبی افریقہ کے سابق صدر نیلسن منڈیلا کے ایک ریکارڈ شدہ بیان سنایا۔ جس میں مسٹر منڈیلا نےکہا ’آؤ اس سال غربت کو ماضی بنانے کے لیے کام کریں اس کے بعد ہم سر اٹھا کر چل سکیں گے‘۔

اپنے اس پیغام میں مسٹر منڈیلا نے کہا’ایسے عظیم کام کرنے کا موقع کبھی کبھی کسی نسل کو ملتا ہے اور آپ وہ نسل ہو سکتے ہیں جسے وقت نے یہ موقع دیا ہے‘۔

دنیا کے آٹھ امیر ترین ممالک کی سکاٹ لینڈ میں ہونے والی سربراہ کانفرنس پر اخلاقی دباؤ ڈالنے کے لیے ہونے والا یہ موسیقی پروگرام ان موسیقی پروگراموں میں سے تھا جو دنیا کے مختلف شہروں میں ’غربت کو ماضی بنادو‘ کی مہم کے حولے سے منعقد کیے جا رہے ہیں۔

اس کنسرٹ کا اختتام جیمز براؤن کی بہترین پرفارمنس پر ہوا۔ اس کے علاوہ جیمی کولم نے بیٹل کلاسک ’آل یو نیڈ از لو‘ سے مداحوں کا دل جیتا نتاشا بیڈنگ فیلڈ نے بھی اپنا ہٹ گانا گایا۔

پاپ بینڈ میک فلائی نے بھی اپنے فن کا مظاہرہ کیا اس کے علاوہ ٹی وی شو بگ برادر کی پیشکار ڈاوینا میک کال بچوں کے جی8 وفد کے ہمراہ اسٹیج پر نمودار ہوئیں۔ جی8 کا اجلاس اتوار کو ایڈنبرا میں شروع ہوا تھا۔

ان کا کہنا تھا کہ’افریقہ میں ہر ایک منٹ میں 20 بچے موت کا شکار ہو جاتے ہیں صرف اس لیے کیونکہ وہ غریت میں پیدا ہوئے ہیں لیکن انہیں مرنے سے بچایا جا سکتا ہے‘۔

بونو کا کہنا ہے کہ کروڑوں لوگوں نے اس مہم کی حمایت کی ہے

ان کا کہنا تھا’خود میرے دو بچے ہیں اور میں تمام افریقی ماؤں کی جانب سے دنیا کے سیاسی رہنماؤں سے اپیل کرتی ہوں کہ وہ اس سلسلے میں کچھ کریں‘۔

اس کنسرٹ میں شرکت کرنے والوں میں بیورلی نائٹ ، کیتھرین جینکن، اور سنو پیٹرو بھی شامل تھے۔