اسد علی بی بی سی اردو ڈاٹ کام ایمسٹرڈم

یش چوپڑا نے امید ظاہر کی فیسٹیول اور اس طرح کی تقریبات سے بھارتی فلموں کو دوسرے ممالک میں متعارف کروانے میں آسانی ہوگی

بھارتی فلم ڈائریکٹر یش چوپڑا نے فلم دیکھنے کے لیے آنے والے افراد سے مختصراً خطاب کیا اور امید ظاہر کی اس طرح کی تقریبات سے بھارتی فلموں کو دوسرے ممالک میں متعارف کروانے میں آسانی ہوگی۔

اگلے دو دنوں میں ایمسٹرڈیم میں تقریباً دو درجن بھارتی فلمیں دکھائی جائیں گی۔ ویر زار کو دیکھنے کے لیے ہالینڈ کے شہریوں سمیت ایک سو کے قریب افراد موجود تھے۔

بھارتی فلم ڈائریکٹر اور موقع پر موجود برطانوی بین الاقوامی فلم کونسل کی ڈائریکٹر کلیر وائز کے مطابق یورپ میں ایشیا کی مارکیٹ کے بارے میں آگہی پیدا ہو رہی ہے اور بھارتی فلموں کی طرف رجحان میں اضافہ ہوگا۔

کلیر وائز نے بتایا کہ وہ برطانوی حکومت کی طرف سے بھاری حکومت کے ساتھ ایک معاہدے پر کام کر رہی ہیں جس کے تحت برطانیہ، بھارت اور یورپ مل کر فلمیں بنائیں گے۔ (کلیر وائز فلم کونسل کی ڈائریکٹر ہونے کے ساتھ برطانوی حکومت کی سٹریٹیجک باڈی فار فلمز کے لیے کام کر رہی ہیں)

انہوں نے بتایا کہ برطانیہ میں بھارتی فلمیں بہت کامیاب رہی ہیں۔ انہوں نے کہا کہ گزشتہ سال برطانیہ میں پچپن بھارتی فلمیں ریلیز ہوئیں اور انہوں نے سولہ ملین امریکی ڈالر کا کاروبار کیا۔

انہوں نے کہا کہ وہ چاہتی ہیں کہ زیادہ سے زیادہ بھارتی فلمیں برطانیہ میں بنیں اور جس معاہدے کےلیے وہ کام کر رہی اس کے تحت اس کا زیادہ امکان ہوگا۔

کلیر وائز نے بتایا کہ بھارتی فلمیں بہت زبردست ہوتی ہیں۔ ان میں سے زیادہ تر بھارتی لوگوں کے لیے دلچسپی کی حامل ہوتی ہیں لیکن کچھ فلمیں دوسرے لوگوں کے لیے بھی تھیں۔

نمائش کے لیے پیش کی جانے والی بھارتی فلموں میں بلیک، مجھ سے شادی کرو گی، دھوم، مقبول، ایک حسینہ تھی، ہم تم، یوا، لکشیہ، لٹل ٹیررسٹ، پھر ملیں گے، دل چاہتا ہے، کوئی مل گیا، ناچ اور وقت شامل ہیں۔

جمعہ کی شام کو ایک کرکٹ میچ بھی ہوگا جس میں بھارتی فلمی ستاروں کے علاوہ کچھ کرکٹر بھی حصہ لیں گے۔اس موقع پر شہر میں ایک کاروباری نمائش کا بھی اہتمام کیا گیا ہے۔

اس میچ شاہ رخ خان اور رتک روشن مخالف ٹیموں کے کپتان ہوں گے۔