’سلمان کی بریانی کا انتظار، میری عید خراب نہ کریں‘

عید کے موقع پر بالی وڈ کے سپر سٹار شاہ رخ خان صحافیوں سے مخاطب ہوئے اور کئی چیزوں سے متعلق بات چیت کی لیکن انہوں نے ایسا کوئی بھی سوال نہ پوچھنے کو کہا جس سے ان کی ’عید خراب ہو جائے۔‘

بات چیت کے دوران ایک صحافی نے ان سے ڈھاکہ سمیت حالیہ شدت پسند حملوں کے تعلق سے مذہبی شدت پسندی کے بارے میں سوال کیا۔

اس پر شاہ رخ خان نے کہا: ’پچھلی بار میری سالگرہ پر صحافیوں اور ٹی وی والوں نے میری چھوٹی سی بات کا بتنگڑ بنایا تھا۔ میں نے جو بات کی تھی، اچھی بات کی تھی، مہذب بات کہی تھی۔ لیکن اسے غلط طریقے سے پیش کیا گيا۔۔۔اس لیے اب ایسے سوال پوچھ کر میری عید مت خراب کرو، پلیز۔‘

اس وقت شاہ رخ نے ملک میں بڑھنے والی عدم رواداری پر بات کی تھی جس کی وجہ سے دائیں بازو کے خیالات رکھنے والے ایک طبقے کی جانب سے ان پر زبردست نکتہ چینی ہوئی تھی۔

عید کے موقع پر ہونی والی بات چيت میں سلمان خان کی فلم ’سلطان‘ اور عامر خان کی آنے والی فلم ’دنگل‘کے حوالے سے ایک سوال کے جواب میں شاہ رخ خان نے کہا کہ وہ کشتی پر کوئی بھی فلم نہیں کرنا چاہتے ہیں۔

شاہ رخ نے کہا: ’یہ دونوں (سلمان عامر) بہت ہیں۔ پوری طرح سنبھال لیں گے۔ میں تو محبت کرنے والا شخص ہوں۔ کشتی تو مجھے آتی نہیں ہے۔‘

انہوں نے یہ بھی کہا کہ عید کے موقع پر وہ سلمان خان کے گھر سے آنے والی بریانی کا انتظار کرتے ہیں۔

شاہ رخ خان نے کہا: ’سلمان خان کے گھر کا کھانا بہت اچھا ہوتا ہے۔ وہاں بہت سے پکوان بنتے ہیں۔‘

انہوں نے یہ بھی کہا کہ عید کے موقع پر وہ سلمان خان اور عامر خان کے ساتھ ایک جگہ پر ملنے کا پروگرام طے کرتے ہیں۔

انہوں نے کہا: ’ہم کوشش کرتے ہیں کہ ایک جگہ طے کر لیں جہاں ہم تینوں مل کر بریانی کھا سکیں۔‘