فیشن میگزین کے لیے شہزادی کیٹ کی تصاویر
فیشن کے لیے دنیا کی معروف میگزین ووگ نے سو برس مکمل ہونے پر اپنے برطانوی ایڈیشن میں ڈچز آف کیمبرج کی بعض خاص تصاویر شائع کرنے کا اعلان کیا ہے۔
میگزین نے آئندہ جون میں شائع ہونے والے اپنے رسالے میں سات خاص تصویریں شائع کرنے کی بات کی ہے۔
شہزادی کیٹ کی یہ تصویریں فوٹوگرافر جوش اولنز نے نورفوک کے دیہی علاقوں میں کھینچی ہیں۔
اس طرح کسی بھی میگزین کے لیے پہلی بار فوٹو کھنچوانے والی شہزادی کیٹ آرام دہ کپڑوں میں بالکل مطمئن نظر آرہی ہیں۔
یہ فوٹو نیشنل پورٹریٹ گیلری کے اشتراک سے کھینچی گئی ہیں اور ایک صدی مکمل ہونے پر اس سلسلے میں ووگ نے گيلری میں ’ووگ 100: اے سنچری آف سٹائل ایگزیبشن‘ کے نام سے جس نمائش کا اہتمام کیا ہے اس میں دو تصویریں بھی پیش کی گئی ہیں۔
شہزادی کو خود بھی فوٹوگرافی کا بہت شوق ہے اور وہ 2012 سے نیشنل پورٹریٹ گیلری کی سرپرست ہیں۔
گيلری کے ڈائریکٹر نکولس کلینن کا کہنا ہے کہ ’جوش نے ڈچز کی بالکل ویسی ہی تصاویر لی ہیں جیسی وہ اصل زندگی میں ہیں: زندگی کی رعنائیوں سے پر، طنز و مزاح کی حس سے بھر پور، فکرمند اور ذہین اور حقیقت میں بہت ہی حسین۔‘
ان کا کہنا تھا کہ یہ خاص تصویریں اس حقیقیت کی بھی عکاس ہیں جو ووگ گذشتہ ایک صدی سے فیشن کی دنیا کے نت نئے رنگوں کو اجاگر کرتا رہا ہے۔
End of سب سے زیادہ پڑھی جانے والی
برطانوی ایڈشن کے مدیر الیگزنڈر شلمین کا کہنا ہے کہ ڈچز آف کیمبرج کے شوٹ کیے گئے فوٹوگرافز کو میگزین میں شائع کرنا ان کی بڑی امنگوں میں سے ایک تھی اور گیلری کے اشتراک سے صحیح معنوں میں ان کی یہ صد سالہ تقریب ہوسکی۔
ان کا کہنا تھا: ’یہ نوجوان عورت کو حقیقی معنوں میں خراج تحسین بھی ہے جنھیں خود فوٹوگرافی اور دیہی علاقوں میں زبردست دلچسپی ہے۔‘
اس سے پہلے اس میگزین میں شہزادی ڈایانا کی تصویریں چار بار شائع ہوئی تھیں اور شہزادی این بھی اس پر نظرآ چکی ہیں۔
