’رنبیر ہی راکی والے سنجو جیسا ہے‘

بھارتی فلمساز اور ہدایتکار راجو ہیرانی نے اداکار سنجے دت کے ساتھ ’منا بھائی‘ سیریز کی دو فلمیں بنائی ہیں لیکن اب وہ سنجے دت پر فلم بنانے والے ہیں۔

بی بی سی سے بات کرتے ہوئے راجو نے اس خبر کی تصدیق کی اور کہا کہ سنجے دت سے بات چیت کے دوران انھیں احساس ہوا کہ ان کی زندگی کسی فلمی کہانی جیسی ہے۔

راجو کا کہنا تھا کہ ’گذشتہ دنوں جب سنجے پیرول پر جیل سے باہر آئے تو انہوں نے اپنی زندگی کے کچھ تلخ سچ مجھ سے بانٹے۔‘

انپوں نے کہا کہ ’یہ سن پر مجھے لگا کہ سنجو کی زندگی میں فلموں سے زیادہ ڈرامہ ہے۔ اسی سے متاثر ہوکر میں نے فلم بنانے کا فیصلہ کیا۔‘

راجو سنجے دت پر فلم تو بنا رہے ہیں لیکن سنجے دت عمر کے اس حصے میں ہیں کہ اس فلم میں جوان سنجے کا کردار ادا نہیں کر سکتے۔

اسی وجہ سے راجو ہیرانی نے فلم کے مرکزی کردار کے لیے اداکار رنبیر کپور کا انتخاب کیا ہے۔

اس انتخاب کی وجہ بتاتے ہوئے ان کا کہنا تھا کہ ’مجھے رنبیر کپور میں جوان سنجے دت کی جھلک نظر آتی ہے۔ رنبیر کپور میں ایک سٹارڈم ہے جو سنجے دت میں ان کی پہلی فلم راکی کے وقت نظر آتا تھا۔‘

انھوں نے یہ بھی کہا کہ ’سنجے باہر سے سخت نظر آتے ہیں لیکن وہ اندر سے بڑے معصوم ہیں یہی کوالٹی رنبیر میں ہے۔‘

خیال رہے کہ سنجے دت غیر قانونی ہتھیار رکھنے کے مقدمے میں سزا پانے کے بعد آج کل پونا کی جیل میں قید ہیں۔