ہارون رشید بی بی سی اردو ڈاٹ کام، اسلام آباد

	’سرحد میں اب سب کچھ اسفندیار ولی کے ہاتھ میں ہے‘

اسفندیار ولی ایک ایسی شخصیت ہیں جنہوں نے دو ہزار دو کے انتخابات میں اے این پی کی انتہائی بری کارکردگی کے بعد پارٹی صدارت سے استعفی بھی دے دیا تھا اور مخلوط حکومت سے بھی علیحدگی اختیار کر لی تھی۔

سیاسی تجزیہ نگاروں کے مطابق ان کی صلاحتیوں کا اصل امتحان اب شروع ہوگا۔ ان کی جماعت کو ایک طویل عرصے کے بعد صوبائی حکومت میں شراکت نہیں بلکہ قیادت کی ذمہ داری ملی ہے۔ ذمہ داری بڑی ہے لہذا ناکامی کی صورت میں خطرہ بھی زیادہ۔

اب سب کچھ اسفندیار ولی کے ہاتھ میں ہے۔ وہ سب کچھ بنا بھی سکتے ہیں یا پھر ایم ایم اے کی طرح بہت کچھ بگاڑ بھی سکتے ہیں۔ وہ اپنی والدہ بیگم نسیم ولی اور دیگر رہنماؤں کو سیاسی اختلاف کی وجہ سے پہلے ہی ’سائڈ لائن‘ کر چکے ہیں،’اچھے‘ سیاستدانوں کو جماعت میں واپس لا چکے ہیں لیکن کیا وہ ماضی کے برعکس جماعت کو بدعنوانی سے دور رکھ پائیں گے؟ ماضی میں حکومت میں آنے والے اے این پی کے بعض وزراء پر بدعنوانی کے الزامات بھی لوگوں کے ذہنوں میں تازہ ہیں۔

مرکزی حکومت سے زیادہ ان کا امتحان صوبے میں ہوگا جہاں محدود وسائل کا رونا روتے روتے ایم ایم اے حکومت چلی گئی۔ کیا وہ لوگوں کے مسائل حل کر پائیں گے، صوبے کے مرکز سے بجلی کے خالص منافع کے اربوں روپے کے بقایاجات حاصل کر پائیں گے، شدت پسندی کی لہر پر قابو پاتے ہوئے امن عامہ کو بہتر کر پائیں گے اور جماعت کا محبوب ترین ایشو یعنی صوبہ کا نام تبدیل کر پائیں گے؟

اسفندیار ولی اپنی والدہ بیگم نسیم ولی اور دیگر رہنماؤں کو سیاسی اختلاف کی وجہ سے پہلے ہی’سائڈ لائن‘ کر چکے ہیں،’اچھے‘ سیاستدانوں کو جماعت میں واپس لا چکے ہیں لیکن کیا وہ ماضی کے برعکس جماعت کو بدعنوانی سے دور رکھ پائیں گے؟

اتحادی بننے سے قبل انہوں نے پیپلز پارٹی اور مسلم لیگ نواز سے کس قسم کی یقین دہانیاں حاصل کی ہیں ابھی واضح نہیں لیکن دیکھنا یہ ہے کہ وہ ماضی کی طرح غصہ دکھاتے ہوئے حکومت کو الوداع کہہ دیں گے یا پھر اندر رہتے ہوئے تمام چیلنجوں کا مقابلہ کریں گے؟

ان تمام سوالات کے جواب کے لیے اب شاید انہیں اور عوام کو زیادہ انتظار نہیں کرنا پڑے گا۔