ہیری اور میگھن کی ٹی وی سیریز نے نیٹ فلکس پر ریکارڈ قائم کر دیا

ڈیوک اور ڈچز آف سسیکس کے متعلق نیٹ فلکس کی نئی سیریز برطانیہ میں جمعرات کو 20 لاکھ سے زیادہ لوگوں نے دیکھی۔ 

ریٹنگز کے مطابق ہیری اینڈ میگھن نامی اس شو کی پہلی قسط لانچ کے دن 24 لاکھ لوگوں نے دیکھی ہے۔ 

اکتوبر میں نیٹ فلکس اور ریٹنگز ادارے بارب کے درمیان معاہدے کے بعد سے یہ نیٹ فلکس کے لیے ایک دن کی سب سے بڑی آڈیئنس ہے۔ 

یہ ’دی کراؤن‘ نامی تازہ ترین سیریز کے پہلے دن کے اعداد و شمار سے دو گنا زیادہ ہے اور جمعرات کو بی بی سی ون کا پروگرام ایسٹ اینڈرز بھی اتنے ہی لوگوں نے دیکھا ہے۔ 

ڈیوک اور ڈچز کی اس چھ قسطوں پر مشتمل سیریز کی بے حد تشہیر کی گئی تھی اور اب اس کی تین قسطیں نیٹ فلکس پر دستیاب ہیں۔ 

پہلی قسط 24 لاکھ لوگوں نے، دوسری قسط 15 لاکھ لوگوں نے اور تیسری قسط آٹھ لاکھ لوگوں نے دیکھ لی ہے۔ 

اس کے مقابلے میں دی کراؤن کے پانچویں سیزن کی پہلی قسط اس کی لانچ کے دن 11 لاکھ لوگوں نے دیکھی تھی۔ 

بارب کے اعداد و شمار میں صرف وہ افراد شامل ہیں جنھوں نے اپنے ٹی وی سیٹس پر نیٹ فلکس دیکھی۔ 

جمعرات کو روایتی ٹی وی چینلز پر بی بی سی ون کے دی ون شو کو 24 لاکھ لوگوں نے دیکھا، جبکہ آئی ٹی وی کا سوپ ڈرامہ کورونیشن سٹریٹ 35 لاکھ لوگوں نے دیکھا۔ 

اس دن سب سے زیادہ دیکھے گئے پروگرامز میں بی بی سی نیوز ایٹ سکس اور دیگر مقامی خبریں تھیں جنھیں 41 لاکھ لوگوں نے دیکھا۔ 

روایتی ٹی وی چینلز کے برعکس نیٹ فلکس اپنی ریٹنگز میں ان لوگوں پر توجہ دیتا ہے جو طویل عرصے تک کوئی شو دیکھیں۔ چنانچہ ہیری اینڈ میگھن اور دی کراؤن جیسے شوز طویل عرصے تک دیکھے جائیں گے۔ 

’ہیری اینڈ میگھن‘ میں اس جوڑے اور ان کے دوستوں کے انٹرویوز اور ان کی ویڈیو ڈائری شامل ہے جس میں پریس کے ساتھ ان کے مشکل تعلق، میگھن کے متعلق نسل پرستانہ مضامین کی اشاعت پر شاہی خاندان کے ردِ عمل اور دیگر موضوعات پر بات کی گئی ہے۔ 

ہیری نے کہا کہ میڈیا کے ساتھ منفی تجربہ ایسی چیز ہے جس کا سامنا ’سب کو کرنا پڑتا ہے۔‘ 

’خاندان کے کچھ ارکان نے کہا، ’میری اہلیہ کو بھی اس سے گزرنا پڑا تھا، تو آپ کی گرل فرینڈ کے ساتھ مختلف رویہ کیوں ہو؟ آپ کے ساتھ کیوں خصوصی برتاؤ کیا جائے؟ اُنھیں کیوں تحفظ دیا جائے؟‘ 

’میں نے کہا: ’یہاں فرق یہ ہے کہ اس میں نسل کا عنصر شامل ہے۔‘ 

ہیری نے یہ بھی کہا کہ اُنھیں فخر ہے کہ ان کے بچے مکس نسل کے ہیں اور اس سے ان میں ’دنیا کو ان کے لیے ایک بہتر جگہ بنانے‘ کی خواہش پیدا ہوتی ہے۔ 

’مگر اسی طرح جو بات ہم دونوں کے لیے سب سے زیادہ اہم ہے وہ یہ کہ ہم وہ غلطیاں نہ دہرائیں جو شاید ہمارے والدین نے کیں۔‘ 

اس جوڑے نے دیگر شاہی شخصیات سے ملنے کے بارے میں بھی بات کی۔ میگھن نے کہا کہ اُنھیں یہ بہت حیران کن لگا کہ رکھ رکھاؤ اس وقت بھی جاری رہتا ہے جب عوامی نظروں سے دور ہوں۔‘ 

’جب ولیم اور کیٹ آئے اور میں ان سے پہلی مرتبہ ملی تو وہ ڈنر کے لیے آئے تھے۔ مجھے یاد ہے کہ میں نے پھٹی ہوئی جینز پہنی ہوئی تھی اور میں ننگے پاؤں تھی۔ میں ہمیشہ گلے لگنا پسند کرتی ہوں۔ مجھے یہ احساس نہیں ہوا تھا کہ بہت سے برطانویوں کو اس سے دھچکا لگتا ہے۔‘ 

’شاید میں نے یہ بہت جلد ہی سمجھنا شروع کر دیا تھا کہ باہر والا رکھ رکھاؤ اندر بھی جاری رہتا ہے۔‘ 

ہیری اور میگھن سنہ 2020 میں شاہی خاندان کے سینیئر ارکان کی حیثیت سے دستبردار ہو گئے تھے۔ 

اب وہ کیلیفورنیا میں اپنے دو بچوں آرچی اور للیبیٹ کے ساتھ رہتے ہیں۔ 

اُنھوں نے برطانیہ کے ٹیبلائڈ پریس میں نسل پرستانہ کوریج کو اپنے فیصلے کی ایک وجہ قرار دیا ہے۔ 

اس سیریز کی آخری تین قسطیں جمعرات 15 دسمبر کو نیٹ فلکس پر دستیاب ہوں گی۔