ቅልውላው ትግራይ፡ "ልዕሊ 400 ሽሕ ሰባት ንዓጸቦ ተቓሊዖም" ውድብ ሕቡራት ሃገራት

ሰብ መዚ ሕቡራት ሃገራት፡ ብሰንኪ እቲ ኣብ ትግራይ ዝካየድ ዘሎ ኲናት ልዕሊ 400 ሽሕ ሰባት ንዓጸቦ ተቓሊዖም ከምዘለዉ ገሊጾም።

ባይቶ ጸጥታ ሕቡራት ሃገራት ንኹነታት ትግራይ ኣመልኪቱ ትማሊ ዓርቢ ኣብ ዘካየዶ ፈላማይ ኣኼባ፡ ኣብታ ክልል 33 ሽሕ ዝኾኑ ህጻናት ብጉድለት ምኣዛዊ መግቢ ማሲኖም ከምዘለዉ ገሊጹ።

ብዘይካ እዚ ኣስታት 1.8 ሚልዮን ካብ ህዝቢ እቲ ክልል’ውን ብሰንኪ እቲ ኣብ'ታ ክልል ንሸሞንተ ወርሒ ዝተኻየደን ዝቅጽል ዘሎን ኵናት ሓደጋ ዓጸቦ ኣንጸላልይዎም ከምዘሎ ሰብ መዚ ሕቡራት ሃገራት ኣብሪሆም።

መንግስቲ ፈዴራል ዋላ እኳ ብሰኑይ በይነኣዊ ቶኵሲ ደው ናይ ምባል ስጉምቲ ወሲዱ እንተሃለወ፡ እቲ ኵናት ብሕጂ’ውን ከይቅጽል ባይቶ ጸጥታ ሕቡራት ሃገራት ዘለዎ ስክፍታ ገሊጹ ኣሎ።

እንተኾነ ዋላ እኳ እቲ ምልውዋጥ ቶኵሲ ደው ክብል ዓለምለኻዊ ጸቅጥታት እንተሃለወ፡ እቶም ኣብ ትግራይ ኮይኖም ኣንጻር መንግስቲ ዝቃለሱ ዘለዉ ሓይልታት ትግራይ፡ ነቶም ‘ጸላእትና’ ዝብልዎም ካብታ ክልል ክሳብ ዝወጽኡ ቃልሶም ከምዘይቋርጹ ስለዝገለጹ ሓሓሊፉ ምልውዋጥ ቶኵሲ ይካየድ ከምዘሎ ጸብጻባት ይሕብሩ።

ብሰንኪ እቲ ኣብ ሞንጎ መንግስቲ ኢትዮጵያን ብህወሓት ዝምርሑ ሓይልታት ትግራይን ዝካየድ ዘሎ ኵናት ኣሽሓት ሰባት ክሞቱ እንከለዉ ሚልዮናት ኸኣ ካብ ቤት ንብረቶም ንክፈናቐሉ ምኽንያት ኮይኑ’ዩ።

ኩሎም እቶም ኣብቲ ኵናት ዝተሳተፉ ሓይልታት ብጃምላዊ ቅትለትን ምግሃስ ሰብኣዊ መሰላትን ዝርከብዎም ገበናት ፈጺሞም ተባሂሎም ይኽሰሱ’ዮም።

ብዓርቢ ኣሽሓት ምሩኻት ወተሃደራት መንግስቲ ኢትዮጵያ ኣብ ርእሰ ከተማ መቐለ ተሰሪዖም ከምዝሓለፉ ኒው ዮርክ ታይምስ ኣብ ገጻቱ ኣስፊሩ።

ምክትል ላዕለዋይ ሓላፊ ሰብኣዊ ሓገዛት ሕቡራት ሃገራት ራመሽ ራጃሲንግሃም፡ ኣብቲ ብዓርቢ ዝተኻየደ ኣኼባ ባይቶ ጸጥታ ቀሪቡ፡ ናይ ትግራይ ኩነታት ኣብ ዝሓለፈ ቀረባ ሳምንታት ብሃንደብት ናብ ኣዝዩ ዝኸፈአ ደረጃ ምንቁልቋሉ ንተጋባእቲ ገሊጹ።

ራመሽ ራጃሲንግሃም “እቲ ዞባ ኣብ ዝሓለፈ ዓሰርታተት ዓመታት ኣጋጢምዎ ዘይፈልጥ ዓጸቦ’ዩ ኣጓኒፍዎ ዘሎ” ኢሉ።

ንሱ ብምስዓብ “መብዛሕትኦም ደቂ ኣንስትዮን ህጻናትን ዝኾኑ ኣስታት 5.2 ሚልዮን ሰባት ህጹጽ ሰብኣዊ ሓገዝ የድልዮም ኣሎ” ኢሉ።

መንግስቲ ኢትዮጵያ፡ ናብ ትግራይ ሰብኣዊ ሓገዛት ከይሓልፍ ይኽልክል ኣሎ ንዝብል ክሲ ኣብ መጀመርታ እዚ ሰሙን ምንጻጉ ይዝከር።

ትግራይ፡ መሰረታዊ ነገራት

ላዕለወይቲ ሓላፊት ፖሎቲካዊ ጉዳያት ሕቡራት ሃገራት ሮዝሜሪ ዲካርሎ ንተጋባእቲ ኣብ ዝሃበቶ መብርሂ ኣብ ሞንጎ ሓይልታት ትግራይን ኣብ ሞንጎ እቲ ብሰራዊት ኤርትራን ሰራዊት ክልል ኣምሓራን ዝድገፍ መንግስቲ ኢትዮጵያ ብሕጂ’ውን ኵናት ክህሉ ከምዝኽእል ዘለዋ ስክፍታ ገሊጻ።

ንሳ ብምስዓብ “ብሕጂ’ውን ዝያዳ ምትፍናን ክህሉ ከምዝኽእል ኣንፈታት ኣሎ” ድሕሪ ምባል “ሓይልታት ትግራይ ብቕልጡፍ ጠቕሊሎም ተኹሲ ደው ከብሉ ንጽውዕ” ኢላ።