ቀጥታ, ላዕለዋይ መራሒ ኢራን ኣያቶላህ ኻመኒ ዝሃቦ መጠንቀቕታ

ቀጥታዊ ሸፈነ

1. ቅድሚ 9 ሰዓታትኢራን፡ ልዕሊ 60 ሰባት ከምዝተቐትሉ ተሓለቕቲ ገሊጾም

   ኣብቲ ኣብ መላእ ኢራን ዝካየድ ዘሎ ህዝባዊ ተቓውሞታት ብዙሓት ሰባት ከምዝተቐትሉ ተሓለቕቲ ሰባዊ መሰላት ይገልጹ።

   ኣብ ኣመሪካ ዝመደበሩ 'ሃራና' ተባሂሉ ዝፍለጥ ትካል ከምዝበሎ፡ ዛጊት 48 ናዕበኛታት ተቐቲሎም ኣለዉ።

   ብወገን ሓይልታት ጸጥታ'ውን 14 ኣባላት ከምዝተቐትሉ እቲ ትካል ይጠቅስ።

   ሓደ ኣብ ኖርወይ ዝርከብ ካልእ ማሕበር ሰባዊ መሰላት ኣብ ዘውጽኦ ጸብጻብ ግን፡ 9 ቆልዑ ዝርከብዎም 51 ናዕበኛታት ተቐቲሎም ኢሉ ኣሎ።

   ቢቢሲ ዝርከብዎም ዓለምለኻውያን ማዕከናት ዜና ናብታ ሃገር ክኣትዉ ስለዘይክኣሉ፡ ካብታ ሃገር ብማሕበራዊ መራኸቢታት ኣብ ዝወጽእ ሓበሬታ'ዮም ክምርኮሱ ጸኒሖም።

   እንተኾነ፡ ኢንተርነት ካብ ትማሊ ሓሙስ ጀሚሩ ዳርጋ ምሉእ ብምሉእ ተቛሪጹ ይርከብ። መንግስቲ ነቲ ኩነታት ንምርግጋእ ኢንርነት ክቋረጽ ከምዝወሰነ ብዓርቢ ኣፍሊጡ።

   ቢቢሲ ቋንቋ ፋርሲ ግን ዛጊት 22 ካብ ናዕበኛታት ከምዝተቐትሉ'ዩ ኣረጋጊጹ ዘሎ።

   ሰብመዚ ኢራን ብወገኖም፡ ሽዱሽተ ኣባላት ጸጥታ ከምዝተቐትሉ ሓቢሮም ኣለዉ።

2. 9 ጥሪ 2026ኢራን፡ ደገፍ ተቓወምቲ ዝረክብ ዘሎ ወዲ ንጉስ መን'ዩ?

   ረዛ ፓህላቪ፡ ብ31 ጥቅምቲ 1960 ዝተወልደ፡ ቦኽሪ ወዲ ናይቲ ኣብ 1979 ብእስላማዊ ሰውራ ካብ ስልጣኑ ዝተኣልየ ናይ መወዳእታ ሻህ (ንጉስ) ኢራን እዩ።

   ስድራቤቱ ካብ መንበረ ንግስነቶም ድሕሪ ምውራዶ ኣብ ኣመሪካ ዝነብር ዘሎ ኮይኑ ኣብዚ ዝካየድ ዘሎ ተቓውሞታት ዓቢ ኣቓልቦ ረኺቡ ኣሎ።

   ብዛዕባ'ቲ ዝቕጽል ዘሎ ህዝባዊ ናዕቢ ኣመልኪቱ ኣብ ዝሃቦ ርእይቶ፡ ሚልዮናት ኢራናውያን ናጽነቶም ይሓቱ ኣለው ክብል ተዛሪቡ።

   ይኹን'ምበር፡ ብቐጥታ ንግስነት ኢራን ምምላስ ከም ዘይደሊ ብምግላጽ፡ ኣብ ክንድኡ ኣብ መጻኢ ስርዓት ኢራን ህዝበ-ውሳነ (ረፈረንደም) ክካየድ ይጽውዕ።

   ብዙሓት ካብቶም ናዕበኛታት እቲ ወዲ 65 ዓመት ረዛ ፓህላቪ ካብ ስደት ክምለስ'ዮም ዝጽውዑ ዘለዉ።

   ቅድሚ ሕጂ ካብታ ዝነብረላ ከተማ ዋሽንግተን ኮይኑ፡ ህዝቢ ኢራን ኣንጻር እቲ ብኣያቶላህ ኻመኒ ዝምራሕ እስላማዊ ስርዓት ክለዓል ክጽውዕ ጸኒሑ'ዩ።

   ኣብ ሓደ እዋን'ውን፡ ድሕሪ ለውጢ ክህሉ ንዝኽእል መሰጋገሪ መንግስቲ ክመርሕ ቅሩብ ምዃኑ ተዛሪቡ ነይሩ።

   ሕጂ'ውን፡ ን100 መዓልታት ዝጸንሕ መሰጋገሪ ምምሕዳር ዘኽእል ውጥን ኣቕሪቡ ኣሎ።

   "እዚ ነቲ ዝሓለፈ [ንግስነት] ንምምላስ ዘይኮነ. . .ንኹሎም ኢራናውያን ዘገልግል ደሞክራስያዊ መጻኢ ምውሓስ እዩ" ይብል።

   ቅድሚ ሕጂ ሓያል ልፍንቲ ተቓወምቲ ንክህሉ ዝገበሮ ፈተነታት ብሰንኪ ምርኻሻትን ምፍንጫላትን ክሰልጦ ኣይክኣለን።

   እዞም ስሙ እናጨርሑ ኣንጻር ስርዓት ኣያቶላህ ገጢሞም ዘለዉ ዜጋታት ኢራን ግን፡ እቲ ወዲ ሻህ ዝሓሸ መራሒ ክኾኖም ከምዝኽእል'ዮም ዝኣምኑ።

   ገለ ግን ምስ ምዕራባውያን ሃገራት ጥቡቕ ዝምድና ስለዘለዎ ንክኣምንዎን ክድግፍዎን ይዝጽገሙ እዮም።

   ናይ መወዳእታ ሻህ ኢራን ዝነበረ መሓመድ ረዛ ፓህላቪ ካብ 1941 ክሳብ 1979 ንጉስ እታ ሃገር ዝነበረ'ዩ።

   ብመሪሕነት ኣያቶላህ ሩሖላህ ኾመይኒ ተደፊኡ ካብታ ሃገር ድሕሪ ምውጽኡ፡ እቲ ንጉስ፡ ኣብ ፓናማ፡ ግብጺ፡ ሞሮኮ፡ ባሃማስን ሜክሲኮን ብስደት ክነብር ድሕሪ ምጽናሕ ኣብ 1980 ኣብ መበል 60 ዓመቱ ኣብ ካይሮ ግብጺ ዓሪፉ።

3. 9 ጥሪ 2026ላዕለዋይ መራሒ ኢራን ዝሃቦ መጠንቀቕታ

   ላዕለዋይ መራሒ ኢራን ኣያቶላህ ዓሊ ኻመኒ ኣብ ልዕሊ'ቶም ተቓውሞታቶም ዘስምዑ ዘለዉ ዜጋታት ተሪር ስጉምቲ ከምዝውሰድ ኣጠንቂቑ።

   ሎሚ ንግሆ ንደገፍቲ መንግስቲ ኢራን ኣብ ዝሃቦ መግለጺ፡ እቶም ተቓወምቲ፡ ንፕረዚደንት ኣመሪካ ንምሕጓስ ጥራይ ኣብ ቴህራንን ካልእ ቦታታትን ወጺኦም ህንጻታት ናይ ገዛእ ርእሶም ሃገር የዕንው ኣለው ክብል ነቒፉ።

   "እዚ ዝዀነሉ ምኽንያት ድማ ንናዕበኛታትን ንሃገር ዝጎድኡ ሰባትን ይድግፈኩም’የ ዝብል ዘረባ ዕሽነት ስለ ዘቕረበ’ዩ። ዓቕሚ እንተሃልይዎ ንሃገሩ ይምራሕ” ኢሉ።

   እቲ ካብ 1989 ጀሚሩ ኣብ ስልጣን ዝጸንሐ መራሒ ኢራን፡ ኣእዳው ትራምፕ "ብደም ኣብቲ ን12 መዓልታት ዝቐጸለ ምስ እስራኤል ዝተኻየደ ረጽሚ ዝተሰውኡ ልዕሊ ሓደ ሽሕ ኢራናውያን ዝረስሐ እዩ፡” ንመግለጺታት እቲ ኣመሪካዊ ፕረዚደንት ኮኒኑ።

   ኣብ ዝሓለፈ ቐዳም ዶናልድ ትራምፕ፡ ሰበስልጣን ኢራን ሰላማዊ ሰልፈኛታት ከይቅተሉ ኣጠንቂቑ ምንባሩ ይዝከር። ዋሽንግተን "ከተድሕኖም ክትመጽእ እያ፡" ዝበለ ትራምፕ፡ "ስጕምቲ ንምውሳድ ድሉዋት ኢና፡" ኢሉ ነይሩ።

   ቀዳማይ ሚኒስትር ብሪጣኒያ ኪር ስታርመር ብወገኑ፡ “ሰበስልጣን ኢራን ልጓም ክገብሩን መሰረታዊ ናጽነታት ከኽብሩን ኣለዎም፡” ብምባል ሓሳብካ ናይ ምግላጽ፣ ናይ ምእካብን ሓበሬታ ናይ ምርካብን ሓርነታት ከይግድቡ ኣተሓሳሲቡ።

   ብመርመራ ቢቢሲ ቨሪፋይን ቢቢሲ ፋርስን ዝተረጋገጸ ቪድዮ፡ ኣብ ምዕራባዊ ግዝኣት ሎረስታን ኣብ እትርከብ ከተማ ኮራማባድ፡ ሰልፈኛታት ነታ ቅድሚ እስላማዊ ሰውራ 1979 ዝነበረት ወግዓዊት ባንዴራ ኢራን ሒዞም ተራእዮም።

   ብኻልእ ወገን፡ እቲ ብ31 ጥቅምቲ 1960 ዝተወልደ፡ ቦኽሪ ወዲ ናይቲ ኣብ 1979 ኣብ እስላማዊ ሰውራ ካብ ስልጣኑ ዝተኣልየ ናይ መወዳእታ ሻህ (ንጉስ) ኢራን መሓመድ ረዛ ፓህላቪ፡ ሚልዮናት ኢራናውያን ናጽነቶም ይሓቱ ኣለው ክብል ተዛሪቡ።

   እቲ ወዲ ሻህ፡ ካብ ሽዑ ጀሚሩ ኣብ ኣመሪካ ኣብ ስደት ዝነብር ዘሎ ኰይኑ፡ ብቐጥታ ንግስነት ኢራን ምምላስ ከም ዘይደሊ ብምግላጽ፡ ኣብ ክንድኡ ኣብ መጻኢ ስርዓት ኢራን ህዝበ-ውሳነ (ረፈረንደም) ክካየድ ይጽውዕ።

   ኣብ ኢራን ብቁጠባዊ ጸገማት ዝተበገሰ ናዕቢ እናዓበየ ኣብ ዝኸደሉ ዘሎ እዋን፡ ሃንበት ዝያዳ ትኹረት ረኺቡ ምህላዉ ይግለጽ ኣሎ።

4. 9 ጥሪ 2026ትራምፕ፡ "ሰልፈኛታት ክቐትል እንተጀሚሩ" ክንሃርሞ ኢና

   ፕረዚደንት ኣመሪካ ዶናልድ ትራምፕ፡ መንግስቲ ኢራን "ሰልፈኛታት ክቐትል እንተጀሚሩ" ክንሃርሞ ኢና ክብል ኣፈራሪሑ።

   ትራምፕ ሎሚ ኣብ ዝገበሮ ቃለ መሕትት፡ ብዛዕባ እቲ ኵነታት ምስ ተሓተተ " ብቐረባ ንከታተሎ ኣለና" ክብል ተዛሪቡ።

   "ንሳቶም ይፈልጡ እዮም፡ ካብቲ ኣብዚ ሕጂ እዋን ዝዛረበኩም ዘለኹ ንላዕሊ ተነጊርዎም፣ ከምኡ እንተገይሮም ሲኦል ክወርዱ እዮም።"

   ዝሓለፈ ሰንበት’ውን ተመሳሳሊ መግለጺ ሂቡ ምንባሩ ይፍለጥ።

5. 9 ጥሪ 2026ኣብ መላእ ኢራን ሰፊሕ ተቓውሞ ጸረ-መንግስቲ ይቕጽል

   መበል 12 መዓልቱ ዝሓዘ ሰልፊ ጸረ-መንግስቲ ኣብ ርእሰ ከተማ ቴህራንን ካልኦት ከተማታት ኢራንን ብሓያል ናህሪ ይቕጽል ኣሎ።

   ኣብቲ ናዕቢ ብውሕዱ 34 ሰልፈኛታትን ኣርባዕተ ኣባላት ጸጥታን ክሞቱ እንከለዉ፡ 2200 ሰልፈኛታት ድማ ኣብ ቀይዲ ከምዝኣተዉ ኣብ ኣመሪካ ዝመደበሩ ማዕከን ዜና ተጣባቒ ሰብኣዊ መሰላት ሓቢሩ።

   ኣብ ስደት ዝነብር ወዲ ሻህ ኢራን ረዛ ፓህላቪ፡ ዓርቢ ምሸት ብኣቆጻጽራ እታ ሃገር ሰዓት 20፡00 (16፡30 GMT) እቲ ተቓውሞ ብናህሪ ክቕጽል ጸዊዑ።

   ኣብ ኤክስ፡ "ሎሚ ምሸት ብሚልዮናት ዝቑጸሩ ኢራናውያን ናጽነቶም ሓቲቶም" ክብል ጽሒፉ።

   ኣብታ ሃገር "ብደረጃ ሃገር ኢንተርነት" ተዓጽዩ ከምዘሎ ጸብጻባት ሓቢሮም።

   ፕረዚደንት ኣመሪካ ዶናልድ ትራምፕ፡ ሓይልታት መንግስቲ ነቶም ብሰንኪ ቁጠባዊ ቅልውላው እታ ሃገር ሰልፊ ዘካይዱ ዘለዉ ሰልፈኛታት እንተቐቲሎም፡ "ንኢራን ኣበርቲዕና ክሃርማ ኢና" ዝብል ምፍርራሕ ደጊሙ ገሊጹ’ሎ።

   ቢቢሲ ዘረጋገጾ ቪድዮታት ኣብ ገለ ከተማታት ብዙሕ ህዝቢ ከምዝተኣከበ ዘርኢ ኰይኑ፡ መንግስታዊ መራኸቢ ብዙሃን ኢራን ግን ነቲ ተቓውሞ ኣቃሊለንኦ ኣለዋ።

6. 8 ጥሪ 2026ብወኪል ኢሚግሬሽን ኣሜሪካ ዝተቐተለት ሬኔ ኒኮል ጉድ መን’ያ?

   ጓል 37 ዓመት ኣሜርካዊት ሬኔ ኒኮል ጉድ ብሓደ ኣባል ትካል ምቁጽጻር ኢሚግሬሽን (ኣይ-ሲ-ኢ) ተድሕሪ ምቕታላ፡ ተቓውሞታት ይካየዱ ኣለዉ።

   ሰብመዚ ፌደራል፡ መዋቲት ሬኔ ኒኮል ጉድ ካብቲ ብረት ዝዓጠቐ ኣባል ንምህዳም ፈቲና’ኳ እንተበለ፡ ከንቲባ እታ ከተማ ግና ብሸለልትነት ስጉምቲ ከም ዝወሰደ ከሲሱ።

   ወላዲ ሬኔ ኒኮል ጉድ፡ ኣብ ቅትለት እታ ካብ ከባቢ ትነብረሉ ገዛ ዝተቐተለት ጓሉ ርኢቶ ሂቡ።

   ኣቡኣ ቲም ጋርነር፡ “ሰናይ ግን ድማ በዳሂ ህይወት'ዩ ነይርዋ። እተደንቕ ሰብ'ያ ነይራ” ብምባል ገሊጹዋ።

   ሰነተር ክፍለሃገር ሚኒሶታ ዝኾነት ቲና ስሚዝ ብወገና፡ ሬኔ ኒኮል ጉድ ሽልምቲ ገጣሚትን ኣብ ትርፊ ግዜኣ ድማ ጊታር ትፃወትን ነይራ ኢላ።

   ኣመሓደርቲ እታ ከተማ፡ ሬኔ፡ ንሕጋውነት ምንቅስቓስ ኣባላት ምቁጽጻር ኢሚግሬሽን (ኣይስ) ትከታተል ከም ዝነበረት ገሊፆም።

   ምምሕዳር ትራምፕ ግና “ናይ ውሽጢ ዓዲ ኣሸባሪት” ብምባል እዩ ገሊጹዋ ዘሎ።

   ወላዲታ ዶና ጋርነር፡ ውላዳ ምስቶም ኣባላት ኣብ ዝተፋጠጠትሉ ምናልባት “ፈሪሓ ነይራ ትኸውን” ብምባል፡ “ካብ ዝፈልጦም ሕያዎት ሰባት ሓንቲ እያ ነይራ” ብምባል ሓዘናን ንጓላ ዘለዋ ናእዳን ገሊጻ።

   እቲ ቅትለት ከመይ ከም ዝተፈፀመ ዘርእይ ተንቀሳቐሲ ምስሊ፡ እቶም ባላት፡ ኣብ ማእከል መገዲ ናብ ዘሎ መኪና እንትፅግዑ የርእይ።

   እቲ መኪና ምንቅስቓስ እንትጅምር፡ ሓደ ካብቶም ኣባላት ሽጉጡ ብምቕናዕ፡ ብውሕዱ ክልተ ግዘ እንክትኰስ ይርአ።

   ፌደራላዊ ትካል መርመራ (ኤፍ-ቢ-ኣይ)፡ ምስቲ ቅትለት ብዝተሓሓዝ ገበናዊ ምጽራይ የካይድ ኣሎ።

   ዋይት ሃውስ ሰነድ ንዘይብሎም ስደተኛታት ካብ ኣሜሪካ ንምስጓግ የካይዶ ዘሎ ወፍሪ ስዒቡ፡ ኣብ ሚኒያፖሊስ ብኣማኢት ዝቑፀሩ ሓደሽቲ ኣባላት ኣይስ ተዋፊሮም ይርከቡ።

   ኣደ ሰለስተ ቆልዑ ዝኾነት ሬኔ ኒኮል ጉድ፡ ብመኮንን ኢሚግሬሽን ብዝተተኰሳ ጥይት ምቕታላ ስዒቡ፡ ነበርቲ እታ ከተማ ሽምዓ ብምብራህ፣ ጭርሖታት ብምግዋሕን ይቃወሙ ኣለዉ።

   ኣመሓዳሪ ሚኒሶታ ቲም ዋልዝ፡ መንግስቲ ፌደራል ብዛዕባ እዚ ቅትለት ንዝበሎ ከም ዘይቕበልን፡ “ሙሉእ፣ ፍትሓዊን ቅልጡፍን መርመራ ክካየድን” ሓቲቱ'ሎ።

7. 8 ጥሪ 2026ኣሜሪካ ንሶማልያ እትህቦ ሓገዝ ደው ከምዘበለቶ ኣፍሊጣ

   ክፍሊ ጉዳያት ወጻኢ ኣመሪካ ብረቡዕ ኣብ ዘውጽኦ መግለጺ፡ ንመንግስቲ ሶማልያ ዝህቦ ዝነበረ ኵሉ ዓይነት ደገፍ ደው ከምዘበለ ኣፍሊጡ።

   ሰበስልጣን ሶማልያ ብሓገዝ ኣመሪካ ዝተሃንጸ መኽዘን ፕሮግራም ምግቢ ዓለም ብምዕናውን ንዝተጸገሙ ሰባት ዝዓለመ 76 ሜትሪክ ቶን መግቢ ድሕሪ ምሓዞምን እቲ ሓገዝ ከምዝተቛረጸ እቲ ክፍሊ ጉዳያት ወጻኢ ኣመሪካ ገሊጹ።

   "ምምሕዳር ትራምፕ ብኽነት መግቢ፡ዝምታን ምቍራጽ ህይወት ዘድሕን ሓገዝን ኣይጻወርን'ዩ" ክብል ማዕከን ዜና ኣሶሸይትድ ፕረስ ሓቢሩ።

   እቲ መግለጺ ወሲኹ፡ "መንግስቲ ኣመሪካ ንፈደራላዊ መንግስቲ ሶማልያ ዝህቦ ዝነበረ ኵሉ ደገፍ ከቋርጽ'ዩ" ኢሉ።

   “መንግስቲ ሶማልያ ነቲ ዘይቅቡል ስጕምትታቱ ሓላፍነት ወሲዱ ኣድላዪ ውሳነ ምስ ዝወስድ ጥራይ እዩ እቲ ተቛሪጹ ዘሎ ደገፍ ዳግማይ ዝጅመር።”

8. 8 ጥሪ 2026ኣብ እዋን መጥቃዕቲ ኣመሪካ ዝተቐትሉ ወተሃደራትን ሲቪላትን ቬነዝዌላ እንታይ ንፈልጥ?

   ኣመሪካ ኣብ ልዕሊ ቬነዝዌላ ዘካየደቶ መጥቃዕቲ፣ ፕረዚደንት ኒኮላስ ማዱሮን በዓልቲ ቤቱ ሲልያ ፍሎረስን ብምምራኽ ዝተዛዘመ ስርሒት፡ ቅድሚ ሕጂ ተራእዩ ዘይፈልጥ ወተሃደራዊ ስርሒት ሳዕቤና - ኣሃዛት ግዳያትን ንዋታዊ ዕንወትን - ዝምልከት ገና ዝተማልኣ ሓበሬታ ኣይወጸን ዘሎ።

   ምኒስተር ውሽጣዊ ጉዳያት ቬነዝዌላ ዲዮስዳዶ ካቤሎ፡ ሰራዊት ኣመሪካ ድሕሪ ዘካየዶ መጥቃዕቲ ኣባላት ሰራዊትን ሲቪላትን ዝርከብዎም 100 ሰባት ከምዝሞቱ ገሊጹ።

   ቅድሚ ሕጂ፡ ኣብ ካራካስን ኣብ ካልኦት ሰለስተ ግዝኣታትን ኣብ ልዕሊ ወተሃደራውን መንግስታውን ቦታታት ኣብ ዝተፈጸመ መጥቃዕቲ ብውሑዱ ዕስራ ወተሃደራት ቬነዝዌላ ከምዝሞቱ ወተሃደራዊ ሰብመዚ ሓቢሮም ነይሮም።

   እዚ ከምዚ’ሉ እንከሎ፡ መንግስቲ ኩባ፡ "ተልእኾ ዝፍጽሙ ዝነበሩ" 32 ዜጋታቱ፡ በቲ መጥቃዕቲ ከምዝሞቱ ብሰንበት ኣረጋጊጹ።

   ግዝያዊት ፕረዚደንት ደልሲ ሮድሪገዝ ብወገና፡ ንኽብሪ "ሃገርና ንምክልኻል ህይወቶም ዝሃቡ መንእሰያት ሰማእታት" ብምባል ንሸውዓተ መዓልታት ሃገራዊ ሓዘን ክካየድ ኣዚዛ።

9. 7 ጥሪ 2026ኣሜሪካ ንምንታይ’ያ ንመርከብ ማሪነራ ክትሃድና ፀኒሓ?

   ዋሽንግተን፡ ንቤላ 1 ብዝብል ሽም ትፍለጥ ነዳዲ ዝፀዓነት መርከብ ማሪነራ ክትሃድና ቀንያ።

   እዛ መርከብ ኣብ ዝሓለፈ ወርሒ ናብ ቬንዝዌላ ትጓዓዝ ከም ዘላ ድሕሪ ምፅብፃቡ ኣብ ካሪብያን ተራእያ ነይራ።

   ኣባላት ሓለዋ ገማግም ባሕሪ ኣሜሪካ ድማ፡ ነዛ መርከብ ኣብ ቀይዲ ንምውዓል ትእዛዝ ቤት ፍርዲ ብምውፃእ ክፅበዩ ፀኒሖም።

   ዋሽንግተን፡ መርከብ ማሪነራ ንሕጊ ኣሜሪካ ከም ዝጠሓሰትን ናይ ኢራን ነዳዲ ከም ዝፀዓነትን እያ ትኸስስ።

   ነዚ ስዒቡ ድማ እታ መርከብ ሽም ካብ ምቕያር ብዝዘለለ፡ ዝሰቐለቶ ባንዴራ ናብ ናይ ሩስያ ቀይራ። ትጓዓዘሉ መገዲ’ውን ብምግዳፍ ናብ ኻልእ ኣንፈት ቀይራ።

   ቅድም ብስኑዕ (ግጉይ) መንገዲን ብባንዴራ ጋያናን እያ ትንቀሳቐስ ነይራ።

   ሓይልታት ኣሜሪካ ነዛ መርከብ ኣብ ቀይዲ ንምውዓል ኣብ ሰሜን ኣትላንቲክ ዝተዋፈሩ ክኾኑ እንከለው፡ ሩስያ ድማ ነዛ መርከብ ካብ ሓይልታት ኣሜርካ ንምሕላው ብሳብማሪን ተዓጂባ ተንቀሳቒሳ።

   እንተኾነ ፡ ኣብ መወዳእታ ኣሜሪካ ነታ መርከብ ኣብ ቀይዲ ከምዘውዓለት ኣፍሊጣ።

10. 7 ጥሪ 2026አሜርካ ባንዴራ ሩስያ ተንበልብል ንዝነበረት መርከብ ነዳዲ ሒዛ

    አሜርካ፡ ነታ ክትሃድና ዝቐነየት ባንዴራ ሩስያ ተንበልብል ዝነበረት መርከብ ኣብ ውቅያኖስ ኣትላንቲክ ከም ዝሓዘት ኣፍሊጣ።

    ምስ ቬንዝዌላ ርክብ ዘለዋ ካልአይቲ መርከብ'ውን፡ ኣብ ባሕሪ ካሪብያን ሒዛ ኣላ።

    ኣብ ኣውሮጳ ዝርከብ እዚ ሰራዊት አሜርካ፡ ምስ ነዳዲ ቬንዝዌላ ርክብ ዘለዋን ብአሜርካ ክትህደን ዝፀንሐትን ነዳዲ ዝፀዓነት መርከብ ከምዝተቖፃፀረ ገሊፁ።

    እቲ እዚ ንክፍሊ ፍትሒ አሜርካን ቤት ፅሕፈት ሃገራዊ ውሽጣዊ ፀጥታን ብምፅራሕ፡ “ኤም/ቪ ቤላ 1" ማዕቐብ አሜርካ ብምጥሓሳ” ኣብ ቀይዲ ውዒላ ክብል ብመገዲ ኤክስ ሓቢሩ።

    “እታ መርከብ ካብ ፌደራላዊ ቤትፍርዲ አሜርካ ብዝወፅአ ትእዛዝ መሰረት፡ ኣብ ሰሜን ኣትላንቲክ ኣብ ቀይዲ ውዒላ”።

    መርከብ ኵናት ዩኤስሲጂሲ ሙንሮ፡ ነታ ነዳዲ ዝፀዓነት ማሪነራ ትበሃል መርከብ ተኸታቲሉ ኣብ ከምዝሓዘ'ዩ እቲ ሓበሬታ ዝጠቅስ።

    እታ መርከብ ኣብ 2024 ሕጋዊ ዘይኮነ ነዳዲ ብምምልላስ ማዕቐብ ዝተነበራ ኰይና፡ ዋንነታን ባንዴራኣን ናብ ሩስያ ብምቕያር ክትንቀሳቐስ ፀኒሓ።

    ሩስያ ነታ ነዳዲ ዝፀዓነት መርከብ ንምዕጃብ ሳብማሪንን ሓይሊ ባሕሪን ዋላ’ኳ እንተዋፈረት፡ አሜርካ ነታ መርከብ ኣብ ቀይዲ ከም ዘውዓለት'ያ ኣፍሊጣ ዘላ።

    ብተዛማዲ ዜና፡ ምስ ቬንዝዌላ ርክብ ዘለዋ ካልአይቲ መርከብ ነዳዲ ድማ ኣብ ባሕሪ ካሪብያን ኣብ ቀይዲ ከም ዘውዓለት ዋሽንግተን ገሊፃ ኣላ።

    ደቡባዊ እዚ ሰራዊት አሜርካ ብወገኑ፡ ሎሚ ወጋሕታ ኣብ ባሕሪ ካሪብያን “ናይ ዝኾነት ሃገር ባንዴራ ዘየንበልበለት፣ ንማዕቐባት ብምጥሓስ ብሕጊ አሜርካ ዝተኣገደት፣ ስርዓታት ምክትታል ዘይብላ ( ኰነ ተባሂሉ ክጠፍእ ዝተገበረ) ኣብ ቀይዲ ውዒላ” ክብል ሓቢሩ።

    ናብቲ ዝሓለፈ ቀዳም ኣብ ዘውግሕ ለይቲ ኣብ ቬንዝዌላ መጥቃዕትታት ብምፍፃም ንፕረዚደንት ኒኮላስ ማዱሮ ኣብ ቀይዲ ዘእተወ ምምሕዳር ትራምፕ፡ ኣብ ዝሓለፈ ታሕሳስ ካብ ቬንዝዌላ ኣብ ልዕሊ ዝወፅኣን ዝኣትዋን መራኽብ ማዕቐብ ከም ዘንበረ ይፍለጥ።

11. 7 ጥሪ 2026ትራምፕ፡ ቬንዝወላ 50 ሚልዮን በርሚል ነዳዲ ንኣመሪካ ከተረክብ ምዃና ይገልጽ

    ፕረዚደንት ኒኮላስ ማዱሮ ካብ ስልጣኑ ንምእላይ ወተሃደራዊ ስርሒት ክካየድ ዝኣዘዘ ዶናልድ ትራምፕ፡ ቬንዝወላ 50 ሚልዮን በርሚል ዝኸውን ነዳዲ ንኣሜሪካ ከተረክብ ምዃና ገሊጹ።

    እቲ ፕረዚደንት ኣብ ማሕበራዊ ሚድያ ኣብ ዝዘርግሖ ጽሑፍ፡ እቲ ነዳዲ ክሽየጥን፡ ካብኡ ዝተረኽበ ኣታዊ ኸኣ ባዕሉ ክቈጻጸሮ ምዃኑን ኣመልኪቱ። ካብዚ መሸጣ ዝረኽብዎ ኣታዊ “ንቬንዝወላን ኣመሪካን ዝጠቅም” ምዃኑ ወሲኹ ሓቢሩ።

    ትራምፕ ነዚ ዝበለ፡ ኢንዱስትሪታት ነዳዲ ኣመሪካ ኣብ ውሽጢ ሓደ ዓመት ኣብ ቬንዝወላ ምንቅስቓስ ከምዝጅምሩ ድሕሪ ምግላጹ’ዩ።

    ቢቢሲ ዝተወከሶም ተንተንቲ፡ ምህርቲ ነዳዲ ቬንዝወላ ናብቲ ቅድሚ ሕጂ ዝነበሮ ደረጃ ንምምላስ ዓሰርተታት ቢልዮናት ዶላራትን ምናልባት’ውን ዓሰርተታት ዓመታትን ክወስድ ከምዝኽእል የመልክቱ።

    ትራምፕ ብሰሉስ ኣብ ትዊተር ኣብ ዝዘርግሖ ጽሑፍ፡ “በዓል መዚ መሰጋገሪ ምምሕዳር ቬንዝወላ ካብ 30 ክሳብ 50 ሚልዮን በርሚል ልዑል ጽሬት ዘለዎ፣ እገዳ ዝተገብረሉ ነዳዲ ናብ ኣመሪካ ከምዘብጽሕ ብሓጐስ ይሕብር” ይብል።

    “እዚ ነዳዲ በቲ ኣብ ዕዳጋ ዘሎ ዋጋ ነዳዲ ክሽየጥ እዩ። ከም ፕረዚደንት ኣመሪካ መጠን እቲ ገንዘብ ንረብሓ ህዝቢታት ቬንዙወላን ኣሜሪካን ክውዕል ክከታተሎ እየ!” ይውስኽ ትራምፕ ኣብ ጽሑፉ።

    ትራምፕ እዚ ዝብል ዘሎ፡ ደልሲ ሮድሪገዝ ፕረዚደንት ግዝያዊ መንግስቲ ቬነዝወላ ኰይና ቃለ መሓላ ድሕሪ ምፍጻማ፡ ሓደ መዓልቲ ጸኒሑ እዩ።

    እዚ ከምዚ’ሉ እንከሎ፡ ኣብ ዋሽንግተን ብሓይልታት ጸጥታ ካብታ ሃገር ዝተወስደ ኒኮላስ ማዱሮ፡ ብዘይሕጋዊ ምስግጋር ዕጸፋርስን ገበናት ኣጽዋርን ተኸሲሱ ብሰኑይ ናብ ቤት ፍርዲ ቀሪቡ።

    ፕረዚደንት ኣመሪካ ንኤንቢሲ ኒውስ ብሰኑይ ኣብ ዝሃቦ ሓበሬታ፡ “ከም ቬንዝወላ ዝኣመሰለት ነዳዲ እተፍሪ ሃገር ምህላዋ ጽቡቕ’ዩ ምኽንያቱ ዋጋ ነዳዲ ትሑት ስለ ዝገብሮ።”

    ወከልቲ ዓበይቲ ኩባንያታት ነዳዲ ኣመሪካ ኣብዚ ሰሙን ምስ ምምሕዳር ትራምፕ ክራኸቡ መደብ ኣለዎም።

12. 6 ጥሪ 2026ናብ ሶማሊላንድ ዝበጽሐ ሚኒስተር ጉዳያት ወጻኢ እስራኤል

    ሚኒስተር ጉዳያት ወጻኢ እስራኤል ንፈለማ ግዜ ኣብ ሶማሊላንድ ወግዓዊ ምብጻሕ ኣካይዱ።

    ጊዴዎን ሳእር፡ እስራኤል ንሶማሊላንድ ከም ናጻን ልኡላዊትን ሃገር ኣፍልጦ ድሕሪ ምሃባ'ዩ ሎሚ ናብ ርእሰከተማ ሃርጌሳ ኣትዩ።

    እስራኤል ወሲዳቶ ዘላ ውሳነ ካብ ሞቓድሾ፡ ግብጺ፡ ንግስነት ስዑዲ ዓብ፡ ጂቡቲ፡ ኤርትራን ቱርኪን ዝርከብአን ሃገራት እቲ ዞባ ሓያል ተቓውሞ ገጢምዎ ከምዘሎ ይፍለጥ።

    ቀዳማይ ሚኒስተር ነታንያሁ ብዓርቢ 26 ታሕሳስ ኣብ ዘውጽኦ መግለጺ፡ "ሎሚ፡ ንሪፓብሊክ ሶማሊላንድ ከም ናጻን ልኡላዊትን ሃገር ወግዓዊ ኣፍልጦ ከም ዝሃብናያ ኣፍሊጠ፡" ክብል ሓቢሩ ነይሩ።

    እቲ እስራኤላዊ ብዓልስልጣን ምስ መራሕቲ ሶማሊላንድ ድሕሪ ምርኻቡ ቀልጢፉ ናብ ሃገሩ ከምዝተመልሰ ጸብጻባት ሓቢሮም ኣለዉ።

13. 6 ጥሪ 2026'ኣነ እሱር ኲናት እየ' - ማዱሮ ኣብ ቤት ፍርዲ

    መራሒ ቬንዝወላ ኒኮላስ ማዱሮ ናብ ቤት ፍርዲ ከተማ ኒውዮርክ ክኣቱ እንከሎ ኣብኡ ንዝነበሩ ጋዜጠኛታትን ህዝብን "ተጨውየ" ክብል ተዛሪቡ።

    ናብቲ ቤት ፍርዲ ምስኣተወ ድሕሪ ሒደት ደቓይቕ ዳኛ ኣልቪን ሄለርስታይን ንማዱሮ መንነቱ ከረጋግጽ ሓቲትዎ።

    "ኣነ ሰር ኒኮላስ ማዱሮ እየ። ፕረዚደንት ሪፓብሊክ ቬንዝወላ። ካብ 3 ጥሪ ጀሚረ ድማ ኣብዚ ተጨውየ ኣለኹ" ክብል ብቋንቋ ስጳኛ ንቤት ፍርዲ ተዛሪቡ።

    ኣስዒቡ "ኣብ ካራካስ ቬንዝወላ ኣብ ዝርከብ ገዛይ እየ ተታሒዘ" ኢሉ።

    ሽዑ እቲ ወዲ 92 ዓመት ዳኛ "ነዚታት ኵሉ እትዛረበሉ ግዜን ቦታን ክህሉ እዩ" ክብል ንዘረባ ማዱሮ ኣቋሪጽዎ።

    ኣብቲ ትማሊ ድሕሪ ቀትሪ ን40 ደቓይቕ ዝቐጸለ ድራማዊ መስርሕ ቤት ፍርዲ፡ ማዱሮን በዓልቲ ቤቱ ሲልያ ፍሎረስን ብዝቐረበሎም ክሲ ምዝውዋር ሓሽሽን ኣጽዋርን ገበነኛታት ከምዘይኰኑ ሞጕቶም።

    ማዱሮ "ኣነ ንጹህ እየ። ጭዋ ሰብ እየ" ክብል ከሎ፡ ፍሎረስ ድማ "ምሉእ ብምሉእ ንጹህቲ" ምዃና ተዛሪባ።

    ማዱሮን በዓልቲ ቤቱን ኣብ እዋን መስርሕ ፍርዶም መሰል ዋሕስ ክሕለወሎም ኣይሓተቱን። ምናልባት ድሒሮም ግን ክገብርዎ ይኽእሉ እዮም። ስለዚ ኣብ ትሕቲ ቀይዲ ፈደራል ክጸንሑ እዮም።

    ኣሜሪካ ንማዱሮ ብውዲት ናርኮ-ሽበራ፡ ውዲት ዕድጊ ኮኬይን፡ ምስግጋር ዕጥቅን ኣዕነውቲ መሳርሒታትን ከሲሳቶላ።

    ማዱሮ ምስ በዓልቲ ቤቱ፡ ወዱን ካልኦት ሓያሎ ሰባትን እዩ ተኸሲሱ። ኣብዚ ጉዳይ ዝቕጽል መስርሕ ቤት ፍርዲ ንዕለት 17 መጋቢት ቈጸራ ተታሒዙሉ ኣሎ።

14. 5 ጥሪ 2026“ዓለምለኸ ሕጊ ዘይምኽባሩ ዘሻቕል’ዩ”- ዋና ፀሓፊ ሕቡራት ሃገራት ኣንቶንዮ ጉተረዝ

    ዋና ፀሓፊ ሕቡራት ሃገራት ኣንቶንዮ ጉተረዝ፡ “ዓለምለኸ ሕጊ ኣይተኸበረን” ኢሉ።

    ጉተረዝ፡ ኣብ ጉዳይ ቬንዝወላ ንምዝርራብ ብቤት-ምኽሪ ፀጥታ ሕቡራት ሃገራት ኣብ ዝተፀውዐ ህፁፅ ኣኼባ’ዩ፡ ነዚ መልእኽቲ ኣሕሊፉ።

    ብምኽትሉ ሮዝሜሪ ዲካርሎ ኣብቲ ቤት-ምኽሪ ዝተነበበ መልእኽቲ እቲ ዋና ፀሓፊ፡ ምስ ስጕምትታት ኣመሪካ ኣብ ቬንዝወላ ብዝዛመድ፡ “ዓለምለኸ ሕጊ ዘይምኽባሩ ኣዝዩ ዘሻቕል’ዩ” ብምባል ስግኣቱ ገሊፁ።

    ኣንቶንዮ ጉተረዝ፡ ንስጕምቲ ኣመሪካ ስዒቡ፡ ኣብ ቬንዝወላ ክስዕብ ዝኽእል “ዘይምርግጋእ፣ ከምኡ’ውን ኣብቲ ዞባ ዘስዕቦ ፅልዋ” ኣዝዩ ከም ዘሻቐሎ” ገሊፁ።

    ስጕምቲ ኣመሪካ፡ ኣብ መንጎ ሃገራት ዓለም ኣብ ቀፃሊ ንዝህሉ ርክብ ኣሉታዊ ኣብነት ብምዃን ስግኣት ዝፈጥር እዩ ኢሉ።

15. 5 ጥሪ 2026መንግስቲ ስዊዘርላንድ ንብረት ማዱሮ ከይንቀሳቐስ ኣጊዱ

    መንግስቲ ስዊዘርላንድ፡ ንብረት ፕረዚደንት ቬንዝወላ ኒኮላስ ማዱሮን፡ “ናይ ካልኦት ምስኡ ርክብ ዘለዎም ውልቀሰባትን” ከይንቀሳቐስ ኣጊዱ።

    እቶም ንብረታት ካብ ስዊዘርላንድ ከይወፅኡ ንምክልኻል ከም ዝኾነ ዝገለፀ መንግስቲ እታ ሃገር፡ ኣብ ቀፃሊ እቶም ንብረታት ሕጋዊ ብዘይኰነ መገዲ ከም ዝተጠረዩ እንተድኣ ተኣሚኑ ንህዝቢ ቬንዝወላ ንምምላስ ቃል ኣትዩ።

    ስዊዘርላንድ ካብ 2018 ጀሚራ፡ ኣብ ልዕሊ ቬንዝዌላ ማዕቀብ ከም ዘንበረት ይፍለጥ።

    በዚ ማዕቀብ፡ 54 ውልቀሰባት እገዳ መገሻን ንብረትን ተነቢርዎም’ዩ።

    ኒኮላስ ማዱሮ፡ ኣብ ስዊዘርላንድ ክንደየናይ ንብረት ከምዘለዎ ዝፍለጥ’ኳ እንተዘይኰነ፡ ኣብ 2021 ጋዜጣ ስዊዝ ልሒኹ ንዝወፅአ ሰነድ ብምጥቃስ፡ ኣስታት 10 ቢልየን ዶላር ኣብ ሕሳብ ባንኩ ከም ዝርከብ ፀብፂቡ ነይሩ።

    ኣኽባሪ ሕጊ ስዊዘርላንድ፡ እዚ ገንዘብ ካብ ቬንዝዌላ ተጓሒሉ ዝወፅአ ከም ዝኾነ እዩ ዝገልፅ።

    ስዊዘርላንድ ኣንቢራቶ ዘላ ማዕቀብ ብቐጥታ ተግባራዊ ዝኸውን እዩ። ንዝቕፅሉ ኣርባዕተ ዓመታት ድማ ተግባራዊ ኰይኑ ክፀንሕ እዩ።

16. 5 ጥሪ 2026ኒኮላስ ማዱሮ ብመቑሕ ተኣሲሩ ናብ ቤት-ፍርዲ ተወሲዱ

    ፕረዚደንት ቬንዝወላን በዓልቲቤቱ ብመቑሕ (ካቴና) ተኣሲሮም፡ ናብ ቤት-ፍርዲ ማንሃታን ተወሲዶም።

    እቶም መፃምዲ ኣብ ቤት-ፍርዲ፡ ንዝቐርብሎም ብዙሕ ክስታት ክሰምዑ እዮም።

    ሪፖርተር ቢቢሲ ኣብ ደቡብ ኣመሪካ ኣዮን ዌልስ፡ “ዝወፅኡ ዘለዉ ኣሳእል ኣመና ዘደንቑ እዮም። ንብዙሕ ዓመታት ኣብ ስልጣን ዝፀንሐ ውልቀሰብ፡ ሕጂ ዓቕሚ ኣልቦ ኰይኑ ክርአ፡ ቬንዝወላውያን እንታይ ይብሉ ይዀኑ?” ብምባል ትሓትት።

    ኒኮላስ ማዱሮን በዓልቲቤቱ፡ ብሄሊኮፕተር’ዮም ኣብ ማንሃታን ናብ ዝርከብ ቤት-ፍርዲ ተወሲዶም።

    ብዙሓት መኮንናት በዓል ስልጣን ቍፅፅር ዕፀፋርስ (ዲኢኤ) ንማዱሮን በዓልቲቤቱን ዓጂቦም ክወስድዎም ተራእዮም።

    ክዳን ቤት-ማእሰርቲ ዝተኸደኑ ኒኮላስ ማዱሮን በዓልቲቤቱን፡ ቅሩብ ክሕንክሱ ይረኣዩ።

    ኣብ 2013 [ኣ.ኣ] ንፕረዚደንት ቬንዝወላ ነበር ሁጎ ቻቬዝ ተኪኡ ነታ ሃገር ክመርሕ ዝፀንሐ ማዱሮ፡ ኣብ ዝሓለፈ ቀዳም’ዩ ኣብ ትሕቲ ቀይዲ ኣመሪካ ኣትዩ።

    ምምሕዳር ትራምፕ፡ ንማዱሮ ብዝውውር ዕጸ-ፋርስን ኣፅዋርን ብምኽሳስ፡ ናብ ቤት-ፍርዲ ከቕርቦ ወሲኑ።

    ኒኮላስ ማዱሮ ግን፡ ነቲ ብኣመሪካ ዝቐርበሉ ክስታት ይነፅጎ።

17. 5 ጥሪ 2026ማዱሮ ብህጹጽ ክፍታሕ ቻይናን ኢራንን ጸዊዐን

    መሓዙት ቨነዙዌላ ዝኾና ቻይናን ኢራንን፡ ኒኮላስ ማዱሮን ብዓልቲቤቱን ብህጹጽ ክፍትሑ ጸዊዐን።

    ሚኒስትሪ ጉዳያት ወጻኢ ቻይና ኣብ ዘውጽኦ መግለጺ፡ ኣመሪካ ዝወሰደቶ ስጉምቲ "ቅሉዕ ምጥሓስ ዓለምለኻዊ ሕጊን ንዓለምለኻዊ ዝምድናታት ዝገዝእ ክብርታትን" ምዃኑ ነቒፉ።

    ነቲ ኣብ ቨነዙዌላ ዘሎ ምዕባለታት ብቐረባ ትከታተሎ ምህላዋ'ውን በይዢንግ ገሊጻ'ላ።

    ዋሽንግተን፡ "ንመንግስቲ ቨነዙዌላ ንምድኻም ትገብሮ ዘላ ጻዕርታት ደው ኣቢላ ብልዝብን ዘተን ጉዳያት ክትፈትሕ" ኣለዋ ክትብል ቻይና ተማሕጺና።

    ኢራን ብወገና፡ ማዱሮን ሰበይቱን "ተጨውዮም" ብምባል መርገጺኣ ኣነጺራ።

    "ዘሐብን ኣይኮነን፣ ዘይሕጋዊ ተግባር'ዩ" ክብል ሚኒስትሪ ጉዳያት ወጻኢ ኢራን ተቓውሞኡ ከምዝገለጸ፡ ኣገልግሎት ዜና ኤ-ኤፍ-ፒ ጸብጺቡ'ሎ።

    "ህዝቢ ቨነዙዌላ ከምዘስመረሉ፡ ፕረዚደንቶም ክፍታሕ ኣለዎ" ትብል ቴህራን።

18. 5 ጥሪ 2026ኩባ ንማዱሮ እናተኸላኸሉ ዝተቐትሉ 32 ዜጋታታ መዓልቲ ሓዘን ኣዊጃ

    ኩባ፡ ኣመሪካ ንኒኮላስ ማዱሮ ንምሓዝ ኣብ ዘካየደቶ ስርሒት 32 ዜጋታታ ከምዝተቐትሉ ኣፍሊጣ።

    እታ ብደሳዊ ሰልፊ እትመሓደር፣ ኣብ ነዳዲ ቬንዝላ እትምርኮስ ሃገር፡ ጸጥታ ማዱሮ ንምሕዋስ ሓይልታት ኣዋፊራ ነይራ። ኣብ መላእ ሰራዊት ቬንዝወላ ድማ ኣባላት ኣለውዋ።

    ፕረዚደንት ኩባ ሚገል ዲያዝ-ካነል "ነቶም ኣንጻር'ቶም ንፕረዚደንት ቬንዝወላን በዓልቲ ቤቱን ካብ ሃገሮም ዝጨወዩን ብዘይሕጋዊ መንገዲ ዘውጽኡን ሃጸያዊ ዩኒፎርም ዝለበሱ ኣሸበርቲ ክዋደቑ ዝወደቑ ተባዓት ተጋደልቲ ኩባ" ብምዝካር ንኽልተ መዓልቲ ሃገራዊ ሓዘን ኣዊጁ።

    ዶናልድ ትራምፕ ብዛዕባ ተኽእሎታት ካልእ ወተሃደራዊ ስጕምቲ ምስ ተሓተተ፡ ኩባ ባዕላ ክትወድቕ ተኽእሎ ስለዘለዋ ኣብ ልዕሊ ኩባ ወተሃደራዊ ስርሒት ኣየድልን እዩ ኢሉ።

    ኣብ ኮሎምብያ ምትእትታው ግን ኣይነጸጎን፡ ንጸጋማዊ ፕረዚደንታ ጉስታቮ ፔትሮ፡ ነጋዳይ ዕጸፋርስን "ሕሙም"ን ክብል ገሊጽዎ። ፔትሮ ነቲ ክስታት ብምንጻግ፡ ትራምፕ ኣንጻሩ ይገብሮ ካብ ዘሎ ጸለመ ክቝጠብ ኣጠንቂቑ።

19. 5 ጥሪ 2026ትራምፕ፡ ንሓዳስ መራሒት ቬንዝወላ ኣፈራሪሑ -'ህዝቢ ኣመሪካ ብደምን ዶላርን ዝኸፍሎ እዩ'

    ዶናልድ ትራምፕ ንሓዳስ መራሒት ቬንዙወላ ደልሲ ሮድሪገዝ "ቅኑዕ እንተዘይገይራ" ንሳውን "ኣዝዩ ከቢድ ዋጋ - ምናልባት'ውን ካብ ናይ ማዱሮ ዝኸፍአ - ክትከፍል ከምትኽእል ምስ ኣትላንቲክ ኣብ ዝገበሮ ቃለ መሕትት ኣጠንቂቝ።

    ትራምፕ ነዚ ዘስምዐ፡ ካብ ስልጣኑ ዝተኣልየ ፕረዚደንት እታ ሃገር ኒኮላስ ማዱሮ ሰኑይ ኣብ ቤት ፍርዲ ኒውዮርክ ክቐርብ ኣብ ዝተዳለወሉ እዋን እዩ።

    ኣመሪካ ነቲ ብገበናት ዘይሕጋዊ ምስግጋር ዕጸፋርስን ኣጽዋርን ተኸሲሱ ዘሎ ማዱሮ፡ "ናርኮ-ሽበራዊ" መርበብ ከም ዝሃነጸ፡ ትኸስስ፣ ንሱ ግን ነቲ ክሲ ይነጽጐ።ምሉእ ትሕዝቶ ኣብዚ መላግቦ ኣቲኹም ኣንብቡ

20. 5 ጥሪ 2026ፕረዚደንት ቬንዝወላ ኒኮላስ ማዱሮ ብኸመይ ተማሪኹ

    ሰለይቲ ኣመሪካ፡ ንፕረዚደንት ቬንዝወላ ኒኮላስ ማዱሮ፡ ንኣዋርሕ ዝኣክል ንነፍሲ ወከፍ ምንቅስቓስ እቲ ፕረዚደንት ኣበይ ከም ዝድቅስ፡ እንታይ ከም ዝበልዕን እንታይ ከም ዝኽደንን ክዕዘቡ ጸኒሖም’ዮም።

    እቲ ስርሒት ናይ ክልተ ሰዓትን ዕስራ ደቓይቕን ኰይኑ፡ ብኣየር፡ መሬትን ባሕርን ዝተፈጸመ፣ ንብዙሓት ኣብ ኣመሪካን ኣብ መላእ ዓለምን ዘደንጸወ ፍጻመ እዩ ነይሩ።

    እቲ ስርሒት ከመይ’ዩ ተጋሂዱ?

    • ሰዓት 22፡46 ብኣቈጻጽራ እታ ሃገር ዓርቢ (03፡46 GMT)፡ ትራምፕ እቲ ስርሒት ክጅምር ኣዚዙ።
    • ሰዓት 02፡01 ድማ (06፡01 GMT)፡ኣብ ካራካስ ሓያለ ፍንጀራታት ክስማዕን ትኪ ኣብ ልዕሊ እታ ከተማ ክለዓልን ተራእዩ። እዚ ከምዚ ኢሉ እንከሎ፡ ብኸቢድ ዝዓጠቑ ሓይልታት ኣመሪካ ናብ ርእሰ ከተማ ካራካስ ይብገሱ ነይሮም፣ ምስኦም ድማ መዓጹ ናይቲ ውሑስ ገዛ ማዱሮ ክስርስሩ ዝሕግዝ መሳርሒታት ዓጢቘም ነይሮም። መጥቃዕቲ ኣመሪካ ድሕሪ ምጅማሩ ነዊሕ ከይጸንሑ ኣብቲ ማዱሮ ዝርከበሉ ቦታ በጺሖም።
    • ብመሰረት ትራምፕ፡ ማዱሮ ናብ ውሑስ ክፍሊ ክሃድም ፈቲኑ፤ "ናብቲ ማዕጾ በጺሑ፣ ክዓጽዎ ኣይከኣለን" ኢሉ።
    • 04፡20፡ ሄሊኮፕተራት ንማዱሮን በዓልቲ ቤቱን ኣብ መርከብ ሒዘን ካብ መሬት ቬንዝወላ ወጺአን።